អ៊ីស្រាអែល-ប៉ាឡេស្ទីន

ប្រេសិតពិសេសរបស់អូបាម៉ាទៅធ្វើទស្សនកិច្ចនៅដើមបូព៌ា

ដោយ សេង ឌីណា

អត្ថបទចុះផ្សាយកាលពីថ្ងៃទី 27/01/2009 កែប្រែលើកចុងក្រោយកាលពីថ្ងៃទី 27/01/2009 14:23 ម៉ោងសកល

នៅថ្ងៃអង្គារនេះ លោក Georges Mitchell ប្រេសិតពិសេសរបស់ប្រធានាធិបតី Obama នឹងចាប់ផ្តើមដំណើរទស្សនកិច្ចនៅជុំវិញតំបន់ដើមបូព៌ា ដើម្បីស្វែងរកដំណោះស្រាយសន្តិភាពរវាងអ៊ីស្រាអែល និងប៉ាឡេស្ទីន។ នេះជាការបំពេញតាមពាក្យសន្យារបស់លោក Obama ដែលថា លោកនឹងចាប់ផ្តើមគិតគូរពីវិបត្តិនៅដើមបូព៌ា ចាប់ពីថ្ងៃទីមួយដែលលោកចូលកាន់តំណែងទៅ។

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោក Obama ជួបជាមួយលោកស្រី Hillary Clinton (ឆ្វេង) និងលោក Georges Mitchell (ស្តាំ) មុនពេលលោក Mitchell ចេញដំណើរទៅដើមបូព៌ា
(រូបថត៖ Reuters)

ចាប់តាំងពីសង្រ្គាមនៅ Gaza បានផ្ទុះឡើង កាលពីថ្ងៃទី២៧ ធ្នូ ២០០៨ គ្រប់គ្នាទន្ទឹងរង់ចាំមើលសកម្មភាពរបស់រដ្ឋាភិបាលលោក Barack Obama ព្រោះគេដឹងថា អាមេរិកគឺជាប្រទេសដែលមានឥទ្ធិពលខ្លាំងនៅក្នុងតំបន់ដើមបូព៌ា ជាពិសេស ឥទ្ធិពលទៅលើប្រទេសអ៊ីស្រាអែល និងទៅលើបណ្តាប្រទេសអារ៉ាប់មួយចំនួនទៀត ដូចជា អេស៊ីព្ទ អារ៉ាប៊ី សាអ៊ូឌីត និង Jordanie ជាដើម។

កាលពីមុនពេលស្បថឡើងកាន់តំណែង លោក Barack Obama ធ្លាប់បានសន្យាថា លោកនឹងចាប់ផ្តើមធ្វើការភ្លាមៗ ចាប់ពីថ្ងៃទីមួយ ដែលលោកឡើងកាន់តំណែងជាប្រធានាធិបតីអាមេរិក ដើម្បីស្វះស្វែងរកដំណោះស្រាយសន្តិភាព នៅដើមបូព៌ា។ មកទល់ពេលនេះ លោក Obama ពិតជាបានធ្វើតាមពាក្យសន្យានេះមែន។ គ្រាន់តែបានឡើងកាន់តំណែងភ្លាម លោកបានតែងតាំងប្រេសិតពិសេសមួយភ្លាម ដើម្បីធ្វើការនៅដើមបូព៌ា។

ប្រេសិតពិសេសនេះ គឺលោក Georges Mitchell អតីតសមាជិកព្រឹទ្ធសភា និងធ្លាប់ធ្វើជាប្រេសិតពិសេសរបស់លោក Bill Clinton ហើយបានដោះស្រាយយ៉ាងជោគជ័យនូវជម្លោះនៅអៀរឡង់ខាងជើង។

នៅថ្ងៃអង្គារនេះ លោក Mitchell បានចាប់ចេញដំណើរទៅធ្វើទស្សនកិច្ចជាលើកដំបូង ទៅកាន់តំបន់ដើមបូព៌ា ដើម្បីជួបជាមួយប្រមុខដឹកនាំប្រទេសអេស៊ីព្ទ អ៊ីស្រាអែល ប៉ាឡេស្ទីន អារ៉ាប៊ី សាអ៊ូឌីត Jordanie និងទួរគី។ ក៏ប៉ុន្តែ នេះគ្រាន់តែជាដំណើរទស្សនកិច្ចជាជំហានដំបូងប៉ុណ្ណោះ ហើយប្រហែលជាមិនមានលទ្ធផលអ្វីធំដុំនោះដែរ។ លោក Mitchell នឹងទៅដើរមើលមួយជុំសិន ដើម្បីស្ទាបស្ទង់មើលអំពីជំហររបស់ប្រទេសក្នុងតំបន់ជាមុនសិន។ លោកនឹងទៅស្តាប់គេ ច្រើនជាងឲ្យយោបល់។ និយាយឲ្យសាមញ្ញ នេះជាដំណាក់កាលបឋមមួយ ដែលលោក Mitchell គ្រាន់តែយកជើងទៅលក្នុងទឹកបន្តិចសិន ដើម្បីឲ្យដឹងថា ទឹកហ្នឹងក្តៅ ឬក៏ត្រជាក់ប៉ុណ្ណា មុននឹងចុះទៅក្នុងបឹង។

ម្យ៉ាងវិញទៀត នៅពេលនេះ អាមេរិកក៏នៅមិនទាន់ចង់និយាយអ្វីច្រើនជាមួយអ៊ីស្រាអែលនៅឡើយដែរ ព្រោះថា រដ្ឋាភិបាលរបស់លោក Ehoud Olmert នឹងផុតអាណត្តិនៅមួយខែទៀត ហើយការបោះឆ្នោតសភាថ្មី នឹងធ្វើទៅក្នុងខែក្រោយនេះ។ ដូច្នេះ លោក Obama ប្រាកដជាចង់ចាំមើលសិនថា តើគណបក្សណានឹងឡើងមកកាន់អំណាចក្រោយការបោះឆ្នោត មុននឹងចាប់ផ្តើមនិយាយសាច់ការជាមួយអ៊ីស្រាអែល៕