សុខភាព

ផ្តាសាយជ្រូក ៖ ការប្រមូលផ្តុំដើម្បីទប់ស្កាត់ និងការការពារការឆ្លង

ដោយ អៀង សុខម៉ិញ

អត្ថបទចុះផ្សាយកាលពីថ្ងៃទី 25/04/2009 កែប្រែលើកចុងក្រោយកាលពីថ្ងៃទី 25/04/2009 12:14 ម៉ោងសកល

បន្ទាប់ពីបានប្រកាសភាពអាសន្ន នៃការរាតត្បាតរបស់ជម្ងឺគ្រុនផ្តាសាយ អស់រយៈពេលមួយសប្តាហ៍មក ស្ថានភាពនៃជម្ងឺនៅតែជាមន្ទិលមួយជានិច្ចនៅក្នុងប្រទេសម៉ិចស៊ិក។ ជម្ងឺផ្តាសាយខុសរដូវ ដែលបង្កមកពីសត្វជ្រូក បណ្តាលឲ្យមានមនុស្សស្លាប់ ៦៨នាក់ និងកំពុងមានជម្ងឺក្នុងខ្លួនចំនួន ១០០៤នាក់។ នេះបើយោងតាមការប្រកាសរបស់អាជ្ញាធរម៉ិចស៊ិក។ ម្យ៉ាងវិញទៀតនេះ វីរុសនេះអាចឆ្លងពីមនុស្សម្នាក់ទៅមា្នក់ទៀតបានដោយគ្មានព្រំដែន ហេតុដូច្នេះហើយបានជាសហរដ្ឋអាមេរិកជាប្រទេសជិតខាងក៏មានករណីឆ្លងជម្ងឺផ្តាសាយជ្រូកនេះ ដល់ទៅ៨ករណីដែរ។

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

យោធាម៉ិចស៊ិកចែកចាយម៉ាសដល់អ្នកដំណើរ ថ្ងៃទី ២៤ មេសា ២០០៩
(រូបថត : Reuters)

ដើម្បីចៀសវាងការឆ្លងជម្ងឺគ្រុនផ្តាសាយ ពីមនុស្សម្នាក់ទៅមនុស្សម្នាក់ ដោយផ្ទាល់ ឬដោយប្រយោល អភិបាលក្រុងម៉ិចស៊ិកកូ បាន ចេញប្រកាស បន្តបិទការិយាល័យសាធារណៈទាំងអស់ និងបានទូន្មានដល់ប្រជាជនឲ្យសំរាកនៅក្នុងផ្ទះរៀងខ្លួនៗ។

ចំណែកឯ ថ្នាំគ្រុនផ្តាសាយវិញលក់ដាច់អស់ស្ទើរគ្មានសល់ក្នុងស្តុកនៅតាមឱសថស្ថាន។ អាជ្ញាធរអាចផ្តល់ព័ត៌មានបានគ្រប់គ្រាន់ទាន់ពេលវេលា ដែលអាចបញ្ចៀសភាពភ័យស្លន់ស្លោបានមែន ប៉ុន្តែដើម្បីឲ្យបណ្តាជនម៉ិចស៊ិកូមានភាពប្រុងប្រយ័ត្ន និងរក្សាអនាម័យក្នុងការរស់នៅប្រចាំថ្ងៃឲ្យបានខ្ជាប់ខ្ជួន អាជ្ញាធរនៅតែប្រកាន់ជំហរយ៉ាងមុតមាំថា ជម្ងឺផ្តាសាយកើតក្នុងខែនេះមិនមែនជាគ្រោះថ្នាក់តូចតាចឡើយ។

វីរុសនៃជម្ងឺគ្រុនផ្តាសាយសត្វជ្រូកនេះទំនងជាវីរុសដែលមានទម្រង់ Génétique ដូចវីរុសដែលកើតនៅលើមនុស្សជាច្រើននាក់ នៅរដ្ឋកាលីហ្វ័នី សហរដ្ឋអាមេរិក។ វាក៏ទំនងជាវីរុសដែលគេរកឃើញ កាលពីឆ្នាំ១៩៧៦ នៅលើសត្វជ្រូកអាស៊ីបង្កាត់ជាមួយជ្រូកអឺរុប។

ពង្រឹងវិធានការការពារ

ជម្ងឺគ្រុនផ្តាសាយនេះមានគ្រោះថ្នាក់ខ្លាំងណាស់ ពីព្រោះវាអាចក្លាយទៅជាជម្ងឺរលាកសួតរ៉ាំរៃ និងអាចធ្វើឲ្យអ្នកជម្ងឺស្លាប់បាន។ អង្គការសុខភាពពិភពលោកមិនលាក់កំបាំងការព្រួយបារម្ភរបស់ខ្លួនឡើយ។ ប៉ុន្តែក្រុមអ្នកជំនាញផ្នែកនេះបានណែនាំ មិនឲ្យបណ្តាជនម៉ិចស៊ិកចាក់ថ្នាំវាក់សាំងការពារជម្ងឺគ្រុនផ្តាសាយទេ ព្រោះវាគ្មានប្រសិទ្ធភាពសំរាប់ពេលនេះទេ។ ផ្ទុយទៅវិញ អង្គការត្រៀមជាស្រេចនឹងធ្វើអន្តរាគមន៍ ដោយប្រើពពួកថ្នាំ ប្រឆាំងនឹងវីរុស ដើម្បីទប់ស្កាត់ការឆ្លង។

រដ្ឋាភិបាលប្រទេសម៉ិចស៊ិក បានប្រមែប្រមូលរដ្ឋមន្ត្រីក្រសួងសុខាភិបាលចំនួនទាំង ៣២ រដ្ឋ ដើម្បីពិភាក្សាគ្នាលើប្រធានបទជាបន្ទាន់នេះ។ ពេលនេះ ក្រុមសុខាភិបាលក្តាប់បានស្ថានភាពទូទៅនៃការឆ្លងជម្ងឺហើយ តែគេត្រូវតែពង្រឹងវិធានការការពារ។

វីរុសគ្រុនផ្តាសាយជ្រូក

នៅសហរដ្ឋអាមេរិក មានករណីកើតជម្ងឺចម្លែកនេះតែ ៨ករណីប៉ុណ្ណោះ។ ពេលនេះអ្នកជម្ងឺទាំង៨រូប ក៏បានជាសះស្បើយហើយ។

ប៉ុន្តែអាជ្ញាធរមានសមត្ថកិច្ចនៅតែព្រួយបារម្ភ និងមិនធ្វេសប្រហែសចំពោះជម្ងឺនេះឡើយ។ ពីព្រោះជាបឋម ការរាតត្បាតនៅប្រទេសម៉ិចស៊ិក មានទំហំធំធេង បន្ទាប់មកទៀត អ្នករងគ្រោះកើតជម្ងឺផ្តាសាយសត្វជ្រូកសុទ្ធតែជាមនុស្សក្មេងពេញកម្លាំង និងពុំដែលមានការប៉ះពាល់ជាមួយសត្វ ឬសាច់ជ្រូកទេ ជាហេតុធ្វើឲ្យអ្នកឯកទេសគិតថា វីរុសនេះអាចឆ្លងពីមនុស្សទៅមនុស្ស។ និងជាចុងក្រោយ ការសិក្សាលើវីរុសបង្ហាញថាវីរុសគ្រុនផ្តាសាយជ្រូក ហាក់មានការលាយច្របល់គ្នាយ៉ាងខ្លាំងរវាងមេរោគគ្រុនផ្តាសាយជ្រូក គ្រុនផ្តាសាយបក្សី និង គ្រុនផ្តាសាយមនុស្ស៕