គ្រុនផ្តាសាយជ្រូក

អង្គការសុខភាពពិភពលោកទាញសញ្ញាអាសន្ន

ដោយ អៀង សុខម៉ិញ

អត្ថបទចុះផ្សាយកាលពីថ្ងៃទី 26/04/2009 កែប្រែលើកចុងក្រោយកាលពីថ្ងៃទី 26/04/2009 12:25 ម៉ោងសកល

រដ្ឋាភិបាលម៉ិចស៊ិក បានពង្រឹងវិធានការការពារសុវត្ថិភាពយ៉ាងហ្មត់ចត់ ដើម្បីប្រយុទ្ធប្រឆាំងនឹងមេរោគគ្រុនផ្តាសាយជ្រូក ដែលរហូតមកទល់នឹងថ្ងៃសៅរ៍ម្សិលមិញ បានសម្លាប់ជីវិតមនុស្សថែម២០នាក់ទៀតហើយ។ ជាសរុបមានស្លាប់ប្រមាណជាង៨០ នាក់ នៅប្រទេសម៉ិចស៊ិក។ នេះបើតាមការប្រកាសរបស់រដ្ឋមន្ត្រីក្រសួងសុខាភិបាលម៉ិចស៊ិក។ ពុំទាន់មានករណីស្លាប់នៅសហរដ្ឋអាមេរិកទេ ប៉ុន្តែមានអ្នកឆ្លងមេរោគគ្រុនផ្តាសាយជ្រូកថ្មីៗបន្ថែមទៀត។ អាជ្ញាធរអាមេរិកកំពុងតែរៀបចំឲ្យមានកន្លែងសង្គ្រោះបន្ទាន់សំរាប់ទទួលអ្នកជម្ងឺនេះ ហើយបានចេញអនុសាសន៍ឲ្យបណ្តាជនទូទៅមានការប្រុងប្រយ័ត្ន។ ចំពោះអង្គការសុខភាពពិភពលោក ពេលវេលាកាន់តែបន្ទាន់ហើយ ពីព្រោះមេរោគគ្រុនផ្តាសាយជ្រូកកំពុងធ្វើការរាតត្បាតយ៉ាងពេញទំហឹង។

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

អាកាសយានដ្ឋាន Mexico ថ្ងៃទី ២៥ មេសា ២០០៩
(រូបថត : Reuters)

ម៉ិចស៊ិកកំពុងតែអនុវត្តតាមការទូន្មានរបស់អង្គការសុខភាពពិភពលោក ដោយគ្មានលំអៀងបន្តិចទេ ក្នុងការចាត់វិធានការការពារប្រយុទ្ធប្រឆាំងនឹងមេរោគគ្រុនផ្តាសាយជ្រូក។

ក្រិត្យចំនួន១២ ត្រូវបានរដ្ឋាភិបាលដាក់ចេញជាបន្តបន្ទាប់ សំរាប់ក្រុងម៉ិចស៊ិកូ និងរដ្ឋនៅជុំវិញ មានជាអាទិ៍ ៖ ក្រុមភ្នាក់ងាររក្សាសុខភាព និងអនាម័យមានសិទ្ធចូលត្រួតពិនិត្យឆែកឆេរ តាមផ្ទះប្រជាជន។ យកអ្នកជម្ងឺទៅព្យាបាលដាក់ដោយឡែក។ អ្នកដំណើរនៅតាមអាកាសយានដ្ឋាន និងនៅតាមចំណតរថយន្ត ដែលមានអាការៈគ្រុនផ្តាសាយត្រូវបានក្រុមគ្រូពេទ្យចាប់ពិនិត្យព្យាបាលសុខភាពនៅផ្ទាល់កន្លែងភ្លាម។ ប៉ុន្តែពុំមានបិទអាកាសយានដ្ឋានទេ។ មណ្ឌលសុខភាពពេលយប់ចំនួនជាង៤៤៧កន្លែង ត្រូវបានបង្កើតឡើង។

សាលារៀន មហាវិទ្យាល័យ ត្រូវបិទទ្វាររហូតដល់ថ្ងៃទី៦ ឧសភា។ កម្មវិធីសិល្បៈ វប្បធម៌ និងការជួបជុំផ្សេង ចំនួន៥៥៣ កម្មវិធី ត្រូវលប់កម្មវិធីរបស់ខ្លួនចោលទាំងអស់ ដើម្បីចៀសវាងការប្រមូលផ្តុំមនុស្ស។ សូម្បីតែ វិហារកាតូលិកក៏បានប្រកាសបិទទ្វារ មិនធ្វើការសូត្រធម៌ថ្ងៃអាទិត្យនេះទេ ដើម្បីឆ្លើយតបនឹងការអំពាវនាវរបស់ក្រសួងសុខាភិបាល។ ប៉ុន្តែរដ្ឋមន្ត្រីក្រសួងការងារ បានជូនដំណឹងថាសកម្មភាពសេដ្ឋកិច្ចនៅមានដំណើរជាធម្មតា។

សាលារៀនឯកជនSaint Francisនៅទីក្រុង New Yorkបានបិទទ្វារព្រោះមានកូនសិស្ស៨នាក់ ទំនងជាកើតជម្ងឺគ្រុនផ្តាសាយជ្រូក
(រូបថត : Reuters)

ចំណែកនៅសហរដ្ឋអាមេរិក អ្នកទទួលខុសត្រូវផ្នែកសុខភាពបានអះអាងថាពុំមានអ្វីគួរឲ្យភ័យស្លន់ស្លោទេ ប៉ុន្តែករណីកើតជម្ងឺគ្រុនផ្តាសាយជ្រូកដំបូងត្រូវបានគេរកឃើញនៅក្នុងរដ្ឋ Texas និងរដ្ឋ Californie ជាប់ព្រំប្រទល់ជាមួយប្រទេសម៉ិចសិក និងមានករណីបន្តបន្ទាប់ទៀតនៅរដ្ឋផ្សេងទៀត។ នៅទីក្រុង New York សិស្ស៨ នាក់នៅក្នុងសាលាឯកជនមួយបានធ្លាក់ខ្លួនឈឺ។ ជម្ងឺដែលទំនងជាជម្ងឺគ្រុនផ្តាសាយជ្រូក។

អាជ្ញាធរមានសមត្ថកិច្ចម៉ិចស៊ិកូ បានជូនព័ត៌មានបញ្ជាក់ថា មេរោគគ្រុនផ្តាសាយជ្រូកពិតជាបានចម្លងពីមនុស្សម្នាក់ទៅមនុស្សម្នាក់ទៀតមែន ជាហេតុធ្វើឲ្យអង្គការសុខភាពពិភពលោកកាន់ព្រួយបារម្ភខ្លាំងឡើង និងទាញសញ្ញាអាសន្ន ព្រោះនេះជាវីរុសដំបូង ដែលអាចប្តូរបំផ្លែង ឆ្លងពីសត្វទៅសត្វ សត្វមកមនុស្ស បន្ទាប់មកពីមនុស្សទៅមនុស្ស ហើយអ្នកឆ្លងជម្ងឺនេះសុទ្ធសឹងជាយុវជនពេញកម្លាំងមានសុខភាពល្អពីមុនមក៕

ទាក់ទងនឹងប្រធានបទនេះ