កូរ៉េខាងត្បូង

លោក Roh Moo-hyunអតីតប្រធានាធិបតីទទួលមរណភាព

ដោយ អៀង សុខម៉ិញ

អត្ថបទចុះផ្សាយកាលពីថ្ងៃទី 23/05/2009 កែប្រែលើកចុងក្រោយកាលពីថ្ងៃទី 23/05/2009 08:34 ម៉ោងសកល

អាយុ ៦២ ឆ្នាំ លោក Roh Moo-hyun ប្រធានាធិបតីកូរ៉េខាងត្បូង ២០០៣ -២០០៨ បានទទួលមរណភាព ដោយហេតុតែធ្លាក់ពីលើភ្នំក្នុងពេលដើរកំសាន្ត។ ក្រុមប៉ូលីសបានបើកការអង្កេតមួយដើម្បីអាចបានយល់ពីមូលហេតុដែលនាំដល់មរណៈនេះ។ ក្រុមប៉ូលីសមិនបដិសេធសម្មតិកម្មដែលថាអាចជាការធ្វើអត្តឃាតទេ។

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

អតីតប្រធានាធិបតីកូរ៉េខាងត្បូងលោក Roh Moo-hyun
(រូបថត ៖ Reuters)

លោក Roh Moo-hyun បានបញ្ចប់អណត្តិជាប្រធានាធិបតីកាលពីខែ មីនា ២០០៨ ជាមួយនឹងការធ្លាក់ប្រជាប្រិយភាពសឹងដល់បាត តែលោកជាក៏ប្រធានាធិបតីដែលបាននាំឲ្យមានក្តីសង្ឃឹមនិងការខកចិត្តខ្លាំងដែរ។

ជាមេធាវី ប្រសូតចេញពីគ្រួសារក្រីក្រ លោកជាអ្នកការពារសិទ្ធមនុស្សយ៉ាងស្វាហាប់ និងជាអ្នកផ្តួចផ្តើមយ៉ាងសកម្មក្នុងការបញ្ចប់របបផ្តាច់ការនៅទស្សវត្យទី៨០។ ក្នុងពេលមានមហាបាតុកម្ម ដើម្បីលទ្ធិប្រជាធិបតេយ្យលោកធ្លាប់ទាំងបានជាប់ពន្ធនាគារមួយរយៈខ្លីថែមទៀតផង។ គណបក្សរបស់លោកបានទទួលជ័យជំនះ នៅឆ្នាំ២០០៣ ដោយសារតែមានការគាំទ្រយ៉ាងសម្បើមពីសំណាក់យុវជនជំនាន់ថ្មី និងក្រុមអ្នកជឿនលឿននិយម។

បណ្តាជនកូរ៉េកំពុងយំស្តាយស្រណោះលោក Roh Moo-hyun
(រូបថត ៖ Reuters)

ក្នុងអណត្តិជាប្រធានាធិបតី លោកបានបន្តនយោបាយផ្សះផ្សាជាតិជាមួយនឹងប្រទេសកូរ៉េខាងជើងជាបងប្អូន និងបានខិតខំសាកល្បងនៅឲ្យឆ្ងាយពីឥទ្ធិពលអាមេរិក។ ប៉ុន្តែមិនបានប៉ុន្មានផង លោកត្រូវបានគេវាយតម្លៃថាអសមត្ថិភាព ជាពិសេសក្នុងវិស័យសេដ្ឋកិច្ច និងទំនាក់ទំនងការបរទេស។ មួយឆ្នាំក្រោយពីបានជាប់ឆ្នោត សភាកូរ៉េខាងត្បូងបានបោះឆ្នោតប្រឆាំងលោក តែកម្លាំងមហាជននៅតែគាំទ្រលោក បាននាំគ្នាងើបធ្វើបាតុកម្ម ទីបំផុតសភាធម្មនុញ្ញបានសំរេចរក្សាតំណែងលោកជាប្រធានធិបតីរហូតចប់អណត្តិ។

ពាក្យចចាមអារាមថាជាការធ្វើការអត្តឃាត

ភ្នំOwl Rockដែលលោក Roh Moo-hyun ធ្លាក់បាត់បង់ជីវិត
(រូបថត ៖ Reuters)

អតីតនាយកខុទ្ទកាល័យរបស់លោក Roh Moo-hyun បានអះអាងថាលោក Roh ទំនងជាអាចធ្វើអត្តឃាត និងទំនងជាមានទុកពាក្យលាផងដែរ។ លោក Roh Moo-hyun ធ្លាប់បានអះអាងមិនឈប់ឈរថា ប្រយុទ្ធប្រឆាំងនឹងអំពើពុករលួយជាកម្មវត្ថុសំខាន់មួយក្នុងចំណោមកម្មវត្ថុសំខាន់ៗរបស់លោក។ ប៉ុន្តែអណត្តិរបស់លោកបានបញ្ចប់ទៅប្រកបដោយភាពប្រលាក់ប្រឡូសនឹងសំណុំរឿងជាច្រើន ហើយរហូតដល់មានពាក់ព័ន្ធនឹងក្រុមគ្រួសារផ្ទាល់របស់លោកទៀតផង។

ថ្មីៗនេះ ក្រសួងយុត្តិធម៌បានធ្វើអង្កេតមួយស្តីពីទឹកប្រាក់ប្រមាណជារាប់សិបលានដុល្លារ ដែលភរិយា និងកូនលោកទំនងជាបានទទួលយកជាសំណូក។ ក្រុមអ្នកអង្កេតមានសេចក្តីស្ទាក់ស្ទើក្នុងការចេញដីកាចាប់ខ្លួនលោក ទង្វើនេះបានធ្វើឲ្យលោកខកចិត្តយ៉ាងខ្លាំង។ ប៉ុន្តែទោះជាយ៉ាងណាក៏ដោយ ក៏ពេលនេះ គេមិនទាន់អាចធ្វើការអះអាងអ្វីបាននៅឡើយទេ គួរតែត្រូវប្រុងប្រយ័ត្នបន្តិចចំពោះប្រធានបទនេះ៕