ចរាចរណ៍

នាយករដ្ឋមន្ត្រីសម្ពោធស្ពានព្រះមុនីវង្សថ្មី និងបើកការដ្ឋានសាងសង់ស្ពានអាកាស

ដោយ លាង ដឺលុច

អត្ថបទចុះផ្សាយកាលពីថ្ងៃទី 26/05/2009 កែប្រែលើកចុងក្រោយកាលពីថ្ងៃទី 26/05/2009 11:58 ម៉ោងសកល

នៅព្រឹកថ្ងៃទី២៧ស្អែកនេះ លោកនាយករដ្ឋមន្ត្រីហ៊ុន សែន នឹងបើកសម្ពោធអោយប្រើប្រាស់ស្ពានព្រះមុនីវង្សថ្មីឆ្លងកាត់ទន្លេរបាសាក់ និងបើកការដ្ឋានសាងសង់ស្ពានអាកាសលើកទីមួយនៅកម្ពុជារំលងរង្វង់មូលក្បាលថ្នល់ ភ្ជាប់ពីផ្លូវជាតិលេខ២ចាក់អង្រែ មកមហាវិថីព្រះនរោត្តម។

សូមចុចខាងក្រោមនេះ ដើម្បីស្តាប់សេចក្តីរាយការណ៍របស់ លាង ដឺលុច ពីភ្នំពេញ៖

នាយករដ្ឋមន្ត្រីសម្ពោធស្ពានព្រះមុនីវង្សថ្មី និងបើកការដ្ឋានសាងសង់ស្ពានអាកាស

26/05/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ស្ពានព្រះមុនីវង្សថ្មីនឹងត្រូវដាក់សម្ពោធឲ្យប្រើ នៅថ្ងៃពុធ ទី២៨ ឧសភា ២០០៩
(រូបថត៖ ដឺលុច/RFI)

ស្ពានព្រះមុនីវង្សថ្មីតម្លៃជាង១០លានដុល្លារនឹងត្រូវដាក់សម្ពោធអោយប្រើប្រាស់ជាផ្លូវការ នៅថ្ងៃទី២៧ឧសភាស្អែកនេះ ដោយលោកនាយករដ្ឋមន្ត្រីហ៊ុន សែន។ ចរាចរឆ្លងកាត់តំបន់នេះនឹងត្រូវបិទសម្រាប់ពិធីសម្ពោធនេះចាប់ពីម៉ោង១២អាធ្រាតថ្ងៃទី២៦នេះទៅ ដល់ម៉ោង១២ថ្ងៃត្រង់ថ្ងៃទី២៧ឧសភា។ ទន្ទឹមគ្នានេះដែរ ប្រមុខរដ្ឋាភិបាលកម្ពុជានឹងបើកសម្ពោធការដ្ឋានសាងសង់ស្ពានអាកាសលើកដំបូងនៅកម្ពុជាផងដែរ។ ស្ពានអាកាសនេះភ្ជាប់រវាងផ្លូវជាតិលេខ២ នៅចាក់អង្រែ ទៅមហាវិថីព្រះនរោត្តមរំលងគល់ស្ពានព្រះមុនីវង្សទាំងពីរ។ ស្ពានអាកាសនេះមានតម្លៃជាង៦លានដុល្លារ។ ការសាងសង់ស្ពានព្រះមុនីវង្សថ្មី និងស្ពានអាកាសនេះ គឺជាយុទ្ធសាស្ត្របញ្ជៀសការកកស្ទះចរាចរនៅក្នុងតំបន់រង្វង់មូលក្បាលថ្នល់ដែលជាច្រកចេញចូលពីទីក្រុងភ្នំពេញទៅផ្លូវជាតិលេខមួយ និងទៅផ្លូវជាតិលេខ២។

ស្ពានព្រះមុនីវង្សថ្មីត្រូវបានផ្តើមសាងសង់ កាលពីខែមករាឆ្នាំ២០០៦ ក្នុងគម្លាត៣០ម៉ែត្រពីស្ពានព្រះមុនីវង្សចាស់។ ស្ពានព្រះមុនីវង្សថ្មីនេះមានប្រវែង២៧០ម៉ែត្រ ទទឹង១៤ម៉ែត្រ។ ចំនែកស្ពានអាកាសវិញ ស្ពាននេះមានប្រវែង៣០៨ម៉ែត្រ និងទទឹង១៤ម៉ែត្រ កំពស់៧,៥ម៉ែត្រ។ គម្រោងសាងសង់ស្ពានអាកាសនេះនឹងត្រូវបញ្ចប់ក្នុងរយៈពេល១២ខែ៕

ទាក់ទងនឹងប្រធានបទនេះ