ព្រំដែនខ្មែរ-ថៃ

នាយករដ្ឋមន្ត្រីខ្មែរបដិសេធមិននិយាយរឿងព្រះវិហារជាមួយឧបនាយករដ្ឋមន្ត្រីថៃ

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 25/06/2009 កែប្រែលើកចុងក្រោយកាលពីថ្ងៃទី 25/06/2009 12:53 ម៉ោងសកល

លោកនាយករដ្ឋមន្ត្រី ហ៊ុន សែន បានប្រកាសជាសាធារណៈ នៅថ្ងៃព្រហស្បតិ៍នេះថា ការចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក មិនមែនជារបៀបវារៈ នៅក្នុងជំនួបជាមួយឧបនាយករដ្ឋមន្ត្រីថៃ នៅថ្ងៃសៅរ៍ចុងអាទិត្យនេះឡើយ។ ឧបនាយករដ្ឋមន្ត្រីថៃ លោក Suthep Taugsuban រួមនឹងរដ្ឋមន្ត្រីការពារប្រទេសថៃ នឹងត្រូវធ្វើដំណើរមកកាន់កម្ពុជាក្រៅផ្លូវការ ដើម្បីជួបជាមួយលោកនាយករដ្ឋមន្ត្រីខ្មែរ ហ៊ុន សែន។

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

25/06/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោក ហ៊ុន សែន បដិសេធមិនព្រមនិយាយរឿងព្រះវិហារជាមួយឧបនាយករដ្ឋមន្រ្តីថៃ

ជាសារនយោបាយរបស់នាយករដ្ឋមន្ត្រី ផ្ញើទៅកាន់ពលរដ្ឋខ្មែរ ជាពិសេស ផ្ញើទៅកាន់រដ្ឋាភិបាលក្រុងបាងកក តែ២ថ្ងៃប៉ុណ្ណោះ នៅមុនដំណើរក្រៅផ្លូវការរបស់ឧបនាយករដ្ឋមន្ត្រីថៃ លោក Suthep Taugsuban ដែលនឹងត្រូវចូលជួបលោកនាយករដ្ឋមន្ត្រី ហ៊ុន សែន ដល់គេហដ្ឋាន ក្នុងខេត្តកណ្តាល នាថ្ងៃសៅរ៍ ទី២៧មិថុនា ខាងមុខ។

ជំនួបទល់មុខជាមួយឧបនាយករដ្ឋមន្ត្រី រួមនឹងរដ្ឋមន្ត្រីការពារជាតិថៃ ដែលលោកនាយករដ្ឋមន្ត្រី ហ៊ុន សែន ចាត់ទុកថា ជាជំនួបធម្មតា ដែលមានការពិភាក្សាមួយចំនួន តែក្នុងឋានៈជាមិត្តិភ័ក្តិ។

ក៏ប៉ុន្តែ ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា នៅទីក្រុងភ្នំពេញថ្ងៃព្រហស្បតិ៍ ទី២៥មិថុនានេះ លោកនាយករដ្ឋមន្ត្រី ហ៊ុន សែន បានសង្កត់ធ្ងន់ថា លោកមិនអាចទទួលស្តាប់នូវការពន្យល់របស់ឧបនាយករដ្ឋមន្ត្រីថៃ អំពីរឿងប្រាសាទព្រះវិហារទេ លើកលែងតែការពន្យល់នោះថា ថៃនឹងដកកងទ័ពចេញពីទឹកដីកម្ពុជា ដែលជាតំបន់ព្រំដែនមានជម្លោះ។

ថ្មីៗនេះ លោកនាយករដ្ឋមន្ត្រីថៃ Abhisit Vejjajiva បានអះអាងថា រដ្ឋាភិបាលរបស់លោកនឹងបញ្ជូនលោកឧបនាយករដ្ឋមន្ត្រីថៃ Suthep Taugsuban ដើម្បីមកជួបដោយផ្ទាល់ជាមួយលោកនាយករដ្ឋមន្ត្រី ហ៊ុន សែន នៅក្នុងដំណើរក្រៅផ្លូវការ មកកាន់កម្ពុជា នៅថ្ងៃសៅរ៍ខាងមុខ ដើម្បីពន្យល់ឲ្យច្បាស់ពីការជំទាស់របស់ថៃលើការចុះឈ្មោះប្រាសាទព្រះវិហារ និងការស្នើសុំរបស់ថៃ ទៅកាន់អង្គការយូណេស្កូ ឲ្យសើរើការចុះបញ្ជីនេះ ដោយថៃចង់ឲ្យមានការចុះឈ្មោះរួមជាមួយកម្ពុជា ដើម្បីធ្វើជាសហប្រធានលើប្រាសាទព្រះវិហារ ជាសម្បត្តិបេតិកភណ្ឌពិភពលោក។

ក៏ប៉ុន្តែ លោកនាយករដ្ឋមន្ត្រី ហ៊ុន សែន បានផ្ញើសារទៅថៃវិញថា ប្រាសាទព្រះវិហារគឺស្ថិតនៅក្នុងទឹកដីអធិបតេយ្យរបស់ខ្មែរ។ នេះបើផ្អែកតាមសាលក្រមរបស់តុលាការយុត្តិធម៌អន្តរជាតិ ឆ្នាំ១៩៦២។ ដូច្នេះ ថៃមិនអាចមកស្នើសុំធ្វើជាសហប្រធានលើកម្មសិទ្ធិរបស់កម្ពុជាបានទេ។

នៅថ្ងៃព្រហស្បតិ៍ ទី២៥មិថុនានេះ ពីទីក្រុងបាងកកឯណោះវិញ មេបញ្ជាការកងទ័ព ប្រចាំភូមិភាគ ២ របស់ថៃ លោកឧត្តមសេនីយ៍ Viboonsak Neepal បានថ្លែងក្នុងកាសែតបាងកកប៉ុស្តិ៍ ដោយក្រើនរំឭកដល់កងទ័ពថៃ ដែលឈរជើង នៅតាមបណ្តោយព្រំដែនប្រាសាទព្រះវិហារ ឲ្យប្រុងជើងការ ត្រៀមប្រយុទ្ធ ប្រសិនបើមានហេតុការណ៍ចាំបាច់។ មេបញ្ជាការកងទ័ពថៃអះអាងថា កងទ័ពកម្ពុជា រួមទាំងសព្វាវុធថ្មីៗ ត្រូវបានបញ្ជូនកាន់តែច្រើន ទៅកាន់តំបន់ព្រំដែនជម្លោះ ជិតប្រាសាទព្រះវិហារ។

យ៉ាងណាក៏ដោយ នៅក្នុងសារនយោបាយដោយផ្ទាល់មាត់ នៅថ្ងៃនេះ លោកនាយករដ្ឋមន្ត្រី ហ៊ុន សែន ក៏បានគូសបញ្ជាក់ថា កម្ពុជាចង់ដោះស្រាយទំនាស់ដោយសន្តិវិធី ដោយធ្វើយ៉ាងណាឲ្យស្ថានការណ៍ នៅព្រំដែនកម្ពុជា-ថៃ ជិតប្រាសាទព្រះវិហារ វិលទៅរកស្ថានភាព មុនថ្ងៃ១៥ កក្កដា ឆ្នាំ២០០៨។ នោះគឺតំបន់ព្រំដែន ដែលគ្មានជម្លោះ និងគ្មានកងទ័ពឈរជើង៕

ទាក់ទងនឹងប្រធានបទនេះ