គ្រោះមហន្តរាយ

អាជ្ញាធរសម្តែងការព្រួយបារម្ភចំពោះស្ថានភាពទឹកជំនន់

ដោយ អ៊ឹង ចំរើន

អត្ថបទចុះផ្សាយកាលពីថ្ងៃទី 08/09/2009 កែប្រែលើកចុងក្រោយកាលពីថ្ងៃទី 08/09/2009 12:36 ម៉ោងសកល

កាលពីថ្ងៃទី ០៧ កញ្ញា ខេត្តកំពត និងខេត្តព្រះសីហនុ ពិសេសកំណាត់ផ្លូវជាតិលេខ ៤ បានទទួលរងគ្រោះយ៉ាងធ្ងន់ធ្ងរដោយសារទឹកជំនន់ បន្ទាប់ពីមានភ្លៀងធ្លាក់បី-បួនថ្ងៃជាប់គ្នាមក។ តួលេខដំបូងបង្ហាញថា បុរសពីរនាក់បានស្លាប់ ហើយទ្រព្យសម្បត្តិមួយចំនួនរងការខូចខាត និងបាត់បង់។ មួយថ្ងៃក្រោយមក លោកនាយករដ្ឋមន្ត្រី ហ៊ុន សែន បានចុះពិនិត្យផ្ទាល់ដល់កន្លែងក្នុងភូមិសាស្ត្រខេត្តកំពត។ ក្រសួងធនធានទឹកបានណែនាំជាពិសេសដល់អាជ្ញាធរ និងប្រជាពលរដ្ឋនៅតាមដងទន្លេមេគង្គ ទន្លេសាប ទន្លេបាសាក់ និងតំបន់ទន្លេនៅភូមិភាគឦសាន្ត ឲ្យមានការប្រុងប្រយ័ត្នខ្ពស់ ដើម្បីជៀសវាងនូវរាល់គ្រោះថ្នាក់នានា។

សេចក្តីរាយការណ៍របស់ អ៊ឹង ចំរើន ពីទីក្រុងភ្នំពេញ

08/09/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ខេត្តកំពត និងខេត្តព្រះសីហនុកំពុងទទួលរងគ្រោះដោយទឹកជំនន់
(រូបថត៖ ខឹម សុវណ្ណារ៉ា)

បុរសពីរនាក់ត្រូវបានរាយការណ៍ថាស្លាប់ ហើយផ្ទះសម្បែង ទីផ្សារ អាគារសាធារណៈ រួមទាំងទ្រព្យសម្បត្តិមួយចំនួន ទទួលរងការលិចលង់ និងខូចខាតដោយសារទឹកជំនន់ដែលបង្កឡើងនៅក្នុងភូមិសាស្ត្រខេត្តកំពត និងខេត្តព្រះសីហនុកាលពីថ្ងៃទី ០៧ កញ្ញា។ ស្ថានភាពនេះបានជំរុញឲ្យលោកនាយករដ្ឋមន្រ្តី ហ៊ុន សែន ចុះពិនិត្យដល់កន្លែងផ្ទាល់ត្រង់ចំណុចស្ពានព្រះពន្លាខេត្តកំពត។ ដោយសារតែការលិចលង់ ដំណាំកសិកម្មរបស់ប្រជាពលរដ្ឋបានទទួលនូវការប៉ះពាល់យ៉ាងធ្ងន់ធ្ងរ ប៉ុន្តែមិនទាន់មានរបាយការណ៍ណាមួយបញ្ជាក់ឲ្យដឹងពីទំហំនៃការខូចខាតនេះឡើយ។

នៅឯខេត្តព្រះសីហនុ ផ្ទះប្រជាពលរដ្ឋរាប់រយខ្នងបានលិចលង់ ហើយចរាចរណ៍លើកំណាត់ផ្លូវជាតិលេខ៤ ពិសេសត្រង់ស្ពានសំរោង និងស្ពានកំពង់សិលាត្រូវបានកាត់ផ្តាច់។ ប៉ុន្តែនៅថ្ងៃ អង្គារ៍ទី ០៨ កញ្ញានេះ លោកអភិបាលខេត្ត ស្បោង សារ៉ាត់បានឲ្យវិទ្យុបារាំងអន្តរជាតិដឹងថា ស្ថានភាពមានការធូរស្រាលបន្តិចហើយ។ បើតាមប្រសាសន៍របស់លោក ទឹកមានការស្រកចុះច្រើន ដែលអនុញ្ញាត្តិឲ្យចរាចរណ៍នៅលើផ្លូវជាតិលេខ៤ វិលទៅរកភាពប្រក្រតី។

ទោះយ៉ាងណា លោកនៅតែសម្តែងការព្រួយបារម្ភចំពោះបាតុភូតធម្មជាតិមួយនេះ ដោយពង្រឹងកិច្ចសហប្រតិការជាមួយអាជ្ញាធរមូលដ្ឋាន រួមទាំងកងកម្លាំងប្រដាប់អាវុធដើម្បីត្រៀមសង្គ្រោះបន្ទាន់។ ក្រសួងធនធានទឹក និងឧតុនិយម បានប្រកាសឲ្យដឹងថា ឥទ្ធិពលសម្ពាធទាបមកលើអាងទន្លេមេគង្គបានធ្វើឲ្យមានភ្លៀងធ្លាក់ច្រើននៅភាគឦសាន្តនៃប្រទេស។ ក្រសួងបានធ្វើការអំពាវនាវជាទូទៅ ដល់ប្រជាពលរដ្ឋដែលរស់នៅតាមដងទន្លេមេគង្គ ទន្លេសាប ទន្លេបាសាក់ ស្រែពក សេកុង និងសេសានឲ្យមានការប្រុងប្រយ័ត្នខ្ពស់។

បើតាមលោក ម៉ៅ ហាក់ ប្រធាននាយកដ្ឋានធនធានទឹក កន្លែងមួយចំនួន ទឹកបានឡើងដល់កម្ពស់ជាង១២ម៉ែត្រ ប៉ុន្តែលោកវាយតម្លៃថា ស្ថានភាពមិនទាន់ដូចអ្វីដែលបានកើតឡើងនៅឆ្នាំមុនឡើយ។ យោងតាមសេចក្តីជូនដំណឹងមួយទៀតរបស់ក្រសួងធនធានទឹក សម្ពាធទាបមួយទៀតនឹងអាចកើតមានចំថ្ងៃទី ០៩ និងទី១០កញ្ញា ខាងមុខនេះ ដែលបង្កឲ្យមានភ្លៀងផ្គររន្ទះច្រើន ហើយខ្លាំងនៅភាគពាយ័ព្យ រួមទាំងតំបន់មាត់សមុទ្រ ហើយជំនន់ទឹកភ្លៀងនឹងអាចកើតឡើងនៅតំបន់ភ្នំ៕