ជម្លោះព្រំដែន

នាយករដ្ឋមន្ត្រីខ្មែរដំឡើងសាច់ដុំដាក់ថៃក្នុងជម្លោះព្រំដែនប្រាសាទព្រះវិហារ

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 28/09/2009 កែប្រែលើកចុងក្រោយកាលពីថ្ងៃទី 28/09/2009 13:10 ម៉ោងសកល

នៅថ្ងៃច័ន្ទ ទី ២៨កញ្ញានេះ ប្រមុខរដ្ឋាភិបាលកម្ពុជាបានប្រកាសមិនទទួលស្គាល់ដាច់ខាតនូវការអះអាងរបស់រដ្ឋាភិបាលថៃ អំពីដីជម្លោះទំហំ ៤,៦គីឡូម៉ែត្រការ៉េនៅព្រំដែនប្រាសាទព្រះវិហារ។ កម្ពុជាក៏ព្រមានថា នឹងហែកចោលនូវផែនទីឯកតោភាគីរបស់ថៃ ប្រសិនបើថៃយកមកកាន់តុចរចាបញ្ហាព្រំដែនជាថ្មី។

សេចក្តីរាយការណ៍របស់លី ម៉េងហួរពីទីក្រុងភ្នំពេញ

28/09/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោកហ៊ុន សែននាយករដ្ឋមន្រ្តីប្រទេសកម្ពុជា
(រូបថត៖ សុវណ្ណារ៉ា)

និយាយដល់បាតុករអាវលឿងថៃ ដែលបានប៉ុនប៉ងតវ៉ានៅប្រាសាទព្រះវិហារ កាលពីបុណ្យភ្ជុំបិណ្ឌកន្លងមក លោកនាយករដ្ឋមន្ត្រី ហ៊ុន សែនបានបញ្ជាក់ឡើងវិញពីបទបញ្ជាដល់កងទ័ពកម្ពុជានៅព្រំដែនគឺត្រូវប្រើប្រាស់គ្រាប់កាំភ្លើង (១២,៧ មីលីម៉ែត្រ) ដើម្បីទប់ទល់នឹងទាហាន និងបាតុករថៃដែលឈ្លានពានចូលដីកម្ពុជាដោយខុសច្បាប់។

ក្នុងពិធីសម្ពោធអាគារថ្មីរបស់ក្រសួងទេសចរណ៍នៅព្រឹកថ្ងៃច័ន្ទនេះ លោកនាយករដ្ឋមន្ត្រី ហ៊ុន សែនក៏បានប្រកាសបដិសេធដាច់អហង្ការមិនទទួលស្គាល់តំបន់ត្រួតស៊ីគ្នាទំហំ ៤,៦ គីឡូម៉ែត្រដែលភាគីថៃតែងតែលើកឡើងនៅតំបន់ព្រំដែនប្រាសាទព្រះវិហាររបស់កម្ពុជា។ ប្រមុខរដ្ឋាភិបាលកម្ពុជាក៏មិនយល់ស្របចំពោះការលើកឡើងរបស់ទីក្រុងបាងកកក្នុងការទាមទារប្រើប្រាស់ផ្លូវឡើងប្រាសាទព្រះវិហារ ដែលស្ថិតក្នុងដីខ្មែរថា ជាផ្លូវរួមនោះឡើយ។ អ្វីដែលថៃលើកឡើងទាំងនោះ គឺស្ថិតក្នុងទឹកដីកម្ពុជា។ នេះបើផ្អែកតាមផែនទីបារាំង-សៀមឆ្នាំ ១៩០៤ដែលទទួលស្គាល់ជាអន្តរជាតិ។

ជាសារនយោបាយ នៅថ្ងៃនេះ បុរសខ្លាំងរបស់កម្ពុជាក៏បានប្រើពាក្យសម្តីខ្លាំងៗ ផ្តាំទៅអ្នកនយោបាយ និងរដ្ឋាភិបាលក្រុងបាងកកដោយព្រមានមិនឲ្យរដ្ឋាភិបាលថៃ លើកយកផែនទីឯកតោភាគីដាក់លើតុចរចាទៀតឡើយ។ បើដូច្នោះ កម្ពុជា រួមទាំងរូបលោកផងនឹងហែកផែនទីឯកតោគីរបស់ថៃចោលដូចមេទ័ពខ្មែរដែលបានហែកផែនទីនោះ នៅចំពោះមុខភាគីថៃក្នុងកិច្ចចរចាព្រំដែនកន្លងមក។

ទោះជាយ៉ាងណា លោកនាយករដ្ឋមន្ត្រី បានបញ្ជាក់ពីជំហររបស់កម្ពុជា គឺចរចាតាមផ្លូវណាក៏បានជាមួយនឹងថៃក្នុងរឿងជម្លោះព្រំដែន។ តែអ្វីដែលកម្ពុជាសំណូមពរ គឺបញ្ចៀសការប៉ះទង្គិចដោយអាវុធ និងការប្រឈមមុខដោយយោធា ហើយត្រូវដោះស្រាយបញ្ហាព្រំដែនដោយសន្តិវិធី។

ជាមួយនឹងពាក្យសម្តីព្រមានខ្លាំងៗខាងលើ លោកនាយករដ្ឋមន្ត្រី ហ៊ុន សែន ក៏ប្រកាសតតាំងជាមួយមេដឹកនាំថៃ ពីរឿងព្រំដែននៅក្នុងវេទិកាប្រមុខមេដឹកនាំអាស៊ាន នៅហួរហ៊ីន។ វេទិកាក្នុងប្រទេសថៃនាពេលខាងមុខ លោកនាយករដ្ឋមន្ត្រី ក៏ត្រៀមខ្លួនស្វាគមន៍ការតវ៉ាប្រឆាំងនឹងវត្តមានរបស់លោកដែលនឹងធ្វើឡើងដោយបាតុករជ្រុលនិយមអាវលឿងថៃផងដែរ៕