សេដ្ឋកិច្ច - ទូរគមនាគមន៍

រាជរដ្ឋាភិបាលអំពាវនាវឲ្យក្រុមហ៊ុនទូរស័ព្ទប្រកួតប្រជែងដោយស្មោះត្រង់

ដោយ គី សុខលីម

អត្ថបទចុះផ្សាយកាលពីថ្ងៃទី 05/10/2009 កែប្រែលើកចុងក្រោយកាលពីថ្ងៃទី 05/10/2009 12:38 ម៉ោងសកល

រាជរដ្ឋាភិបាលអំពាវនាវឲ្យក្រុមហ៊ុនទូរស័ព្ទនៅក្នុងប្រទេសកម្ពុជាប្រកួតប្រជែងគ្នាដោយស្មោះត្រង់។ ការអំពាវនាវនេះបានធ្វើឡើងបន្ទាប់ពីក្រុមហ៊ុនមួយចំនួនបានប្តឹងផ្តល់គ្នា។

បទវិភាគរបស់ គី សុខលីម ពីទីក្រុងភ្នំពេញ

05/10/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

កម្ពុជាអំពាវនាវឲ្យក្រុមហ៊ុនទូរស័ព្ទប្រកួតប្រជែងដោយស្មោះត្រង់
(រូបថត៖ ខឹម សុវណ្ណារ៉ា)

ក្រសួងសេដ្ឋកិច្ច ហិរញ្ញវត្ថុនិងក្រសួងទូរគមនាគមន៍និងទូរគមនាគមន៍បានអំពាវនាវតាមរយៈលិខិតមួយជំរុញឲ្យក្រុមហ៊ុនទូរស័ព្ទទាំងអស់នៅក្នុងប្រទេសកម្ពុជាបញ្ឈប់ការប្រកួតប្រជែងមិនស្មោះត្រង់។ សារាចរអន្តរក្រសួងស្តីអំពីវិធានការទប់ស្កាត់ភាពមិនស្មោះត្រង់នៃការប្រកួតប្រជែងក្នុងវិស័យទូរគមនាគមន៍បានបញ្ជាក់ថា នាពេលកន្លងមកថ្មីៗនេះ ប្រតិបត្តិការទូរគមនាគមន៍មួយចំនួនបានខិតខំទាក់ទាញអតិថិជនដោយប្រើប្រាស់រូបភាពផ្សព្វផ្សាយផ្សេងៗគ្នាដូចជាការសន្ទនាក្នុងប្រព័ន្ធតែមួយមិនគិតថ្លៃតម្លៃហៅឆ្លងប្រព័ន្ធទាបជាងការកំណត់របស់រដ្ឋ ការបន្ថែមម៉ោងសន្ទនាដោយពុំគិតថ្លៃ។ល។

សម្រាប់ក្រសួងជំនាញការឃោសនាផ្សព្វផ្សាយ និងអនុវត្តបែបនេះគឺជារូបភាពនៃការប្រកួតប្រជែងមិនស្មោះត្រង់ក្នុងរបរអាជីវកម្ម។ ដើម្បីទប់ស្កាត់បច្ច័យអវិជ្ជមាននេះ ក្រសួងសេដ្ឋកិច្ច និងក្រសួងទូរគមនាគមន៍បានចេញបទបញ្ជាឲ្យប្រតិបត្តិការទូរគមនាគមន៍បញ្ឈប់ជាបន្ទាន់យុទ្ធសាស្រ្តប្រជែងដណ្តើមទីផ្សារគ្នា និងការរាំងខ្ទប់បណ្តាញគ្នាទៅវិញទៅមក។ សារាចរដដែលបានបញ្ជាក់ទៀតថាការប្រកួតប្រជែងមិនស្មោះត្រង់គឺមិនមែនខូចប្រយោជន៍តែអ្នកប្រើប្រាស់ប៉ុណ្ណោះទេ ប៉ុន្តែវាប៉ះពាល់យ៉ាងធ្ងន់ធ្ងរដល់ប្រាក់ចំណូលរបស់រដ្ឋទៀតផង។ ហើយនៅទីបញ្ចប់ការប្រកួតប្រជែងគ្នារបៀបនេះអាចដួលរលំទាំងអស់គ្នាពុំខានឡើយ។

សារាចរអន្តរក្រសួងបានបន្តបញ្ជាក់ទៀតថា គោលនយោបាយបើកចំហវិស័យទូរគមនាគមន៍គឺមានគោលបំណងបួនយ៉ាងធំៗ។ ទីមួយ៖ ការប្រកួតប្រជែងដោយស្មើភាព ទីពីរ៖ ផ្តល់សេវាល្អ និងគុណភាពខ្ពស់ ទីបី៖ ថ្លៃថោកសមរម្យ និងទីបួន៖ បង្កើនចំណូលថវិកាជាតិ។ រហូតមកដល់ពេលនេះ ប្រទេសកម្ពុជាមានក្រុមហ៊ុនទូរស័ព្ទចល័តចំនួន៩ និងមានអតិថិជនប្រើប្រាស់ប្រមាណជា៤លាននាក់។ សារាចររបស់រាជរដ្ឋាភិបាលបានធ្វើឡើង ចំពេលដែលវិស័យទូរគមនាគមន៍នៅក្នុងប្រទេសកម្ពុជាមានការរីកចម្រើនយ៉ាងលឿន និងពិបាកគ្រប់គ្រង។ ពេលខ្លះដោយសារភាពមិនចុះសម្រុងរវាងក្រុមហ៊ុន និងក្រុមហ៊ុនការហៅឆ្លងប្រព័ន្ធមិនអាចទំនាក់ទំនងគ្នាបានទេ។

សូមបញ្ជាក់ថាកាលពីពេលថ្មីៗនេះ មានការប៉ះទង្គិចគ្នាខាងផ្លូវច្បាប់រវាងក្រុមហ៊ុនទូរស័ព្ទចល័តបានកើតឡើង។ ការប្តឹងផ្តល់គ្នាបានធ្វើឡើងបន្ទាប់ពីក្រុមហ៊ុនទូរស័ព្ទចល័តBeeline Cambodia បានសម្រេចផ្តល់តម្លៃពិសេសជូនអតិថិជនរបស់ខ្លួនក្នុងអត្រាហៅចេញទៅកាន់ប្រព័ន្ធផ្សេងក្នុងតម្លៃ៥សេនក្នុងមួយនាទី។ ការទម្លាក់តម្លៃនេះត្រូវបានក្រុមហ៊ុនទូរស័ព្ទចល័តមួយចំនួនផ្សេងទៀតក្នុងនោះមានក្រុនហ៊ុនទូរស័ព្ទចល័ត០១២ផងដែរ បានចោទប្រកាន់ថានេះគឺជាការទម្លាក់តម្លៃក្រោមតម្លៃដើមទៅទៀត។ អ្នកជំនាញមួយចំនួននិយាយថា ការលក់ក្រោមតម្លៃដើមនេះគឺជាការលក់បង្ខូចតម្លៃ។

ត្រង់ចំនុចនេះ ក្រុមហ៊ុន Beeline Cambodia ធ្លាប់បានពន្យល់នៅក្នុងសេចក្តីថ្លែងការណ៍របស់ខ្លួនថា ការផ្តល់ជូនតម្លៃពិសេស៥សេនក្នុងមួយនាទីដែលបានធ្វើកន្លងមកគឺមិនមែនជាការរំលោភលើកិច្ចព្រមព្រៀងតម្លៃណាមួយឡើយ ហើយនេះក៏មិនមែនជាការទម្លាក់ឲ្យធ្លាក់ថ្លៃខ្លាំងណាស់ណានោះដែរ។ នៅក្នុងប្រព័ន្ធសេដ្ឋកិច្ចទីផ្សារសេរី កត្តាទីផ្សារគឺជាកម្លាំងចលករមួយដែលជំរុញឲ្យតម្លៃមានការធ្លាក់ចុះដល់កម្រិតទាបបំផុតដោយរក្សាបាននូវស្ថិរភាពផ្នែកហិរញ្ញវត្ថុ។

សេចក្តីថ្លែងការណ៍របស់ក្រុមហ៊ុនBeeline ដដែលបានបន្តទៀតថាក្រុមហ៊ុនបានរៀបចំរចនាសម្ព័ន្ធអាជីវកម្មមួយដែលអាចផ្តល់នូវអត្រាតម្លៃទាបត្រឹមតែ៥សេនប៉ុណ្ណោះប៉ុន្តែក្រុមហ៊ុននៅតែទទួលបានប្រាក់ចំណេញដដែល។ សូមបញ្ជាក់ថាដោយសារការលំបាកក្នុងការហៅឆ្លងប្រព័ន្ធ និងដោយសារតម្លៃហៅឆ្លងប្រព័ន្ធខ្ពស់ជាងការហៅក្នុងប្រព័ន្ធនោះ អ្នកប្រើប្រាស់ខ្មែរមួយចំនួននាំគ្នាប្រើប្រាស់ទូរស័ព្ទម្នាក់ពី២ទៅ៣គ្រឿង។ នេះគឺជាការរំខានផ្នែកអារម្មណ៍យ៉ាងខ្លាំងប៉ុន្តែពួកគេគ្មានជម្រើស។