ចិន-អាមេរិក

ថ្ងៃចុងក្រោយនៃទស្សនកិច្ចរបស់លោក បារ៉ាក់ អូបាម៉ា នៅចិន

ដោយ អៀង សុខម៉ិញ

អត្ថបទចុះផ្សាយកាលពីថ្ងៃទី 18/11/2009 កែប្រែលើកចុងក្រោយកាលពីថ្ងៃទី 18/11/2009 13:37 ម៉ោងសកល

លោកប្រធានាធិបតីអាមេរិក បារ៉ាក់ អូបាម៉ា ត្រូវជួបសន្ទនាជាមួយនឹងនាយករដ្ឋមន្ត្រីចិន លោក វេន ជាបាវ នៅថ្ងៃពុធនេះ មុននឹងអញ្ជើញទៅទស្សនាមហាកំពែងចិន។ ដំណើរទស្សនកិច្ចរបស់លោកអូបាម៉ា នៅប្រទេសចិន នឹងត្រូវបញ្ចប់ដោយគ្មានប្រកាសលទ្ធផលអ្វីជាផ្លូវការ និងគ្មានការចុះហត្ថលេខាលើកិច្ចសន្យាអ្វីមួយទេ។ ប៉ុន្តែកម្មវត្ថុនៃទស្សនកិច្ចនេះផ្តោតជាសំខាន់ទៅលើការពង្រឹងទំនាក់ទំនងរវាង ចិន និងអាមេរិក ព្រោះគេអាចនិយាយបានថា ទំនាក់ទំនងប្រទេសទាំងពីរបានជួបនឹងភាពល្អក់កករយ៉ាងខ្លាំងនារយៈប៉ុន្មានខែចុងក្រោយនេះ។
សូមចុចខាងក្រោមដើម្បីស្តាប់សេចក្តីរាយការណ៍របស់ Marc Lebeaupin ពីទីក្រុងប៉េកាំង ៖

សេចក្កីប្រែសម្រួលរបស់ អៀង សុខម៉ិញ

18/11/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោក បារ៉ាក់ អូបាម៉ា និងលោក វេន ជាបាវ ថ្ងៃទី១៨ វិច្ឆិកា ២០០៩
(រូបថត : Reuters)

ពុំមាននរណាម្នាក់ហ៊ានលេងភ្នាល់គ្នាថា ដំណើរទស្សនកិច្ចរបស់លោកបារ៉ាក់ អូបាម៉ា នៅប្រទេសចិននាពេលនេះអាចនឹងធ្វើឲ្យទំនាក់ទំនងចិនអាមេរិកល្អូកល្អើនឡើងវិញបានឡើយ។ លទ្ធផលនៃទស្សនកិច្ចនេះហុចផ្លែផ្កាតិចតួចណាស់។ សេចក្តីថ្លែងការណ៍រួមដែលបានធ្វើកាលពីថ្ងៃអង្គារម្សិលមិញ មានត្រឹមតែការសន្យាប៉ុណ្ណោះ។ ការសន្យានោះទៀតសោត គឺផ្តោតជាសំខាន់លើតែវិស័យសេដ្ឋកិច្ចទៀត។

ដើម្បីកុំឲ្យចិន រស់ពឹងផ្អែកអាស្រ័យលើតែការនាំចេញពេក ចិនត្រូវតែបង្កើនការចាយវាយក្នុងស្រុក និងបង្កើនប្រាក់ចំណូលរបស់បណ្តាជន។ ហើយក្នុងពេលជាមួយគ្នានោះ សហរដ្ឋអាមេរិក បានសន្យាថានឹងកាត់បន្ថយបំណុល និងឱនភាពថវិការបស់ខ្លួនដែរ។ សរុបសេចក្តីមក ប្រមុខដឹកនាំប្រទេសទាំងពីរ មានបំណងប្រាថ្នាតែមួយរួមគ្នា គឺសម្រេចអភិវឌ្ឍសេដ្ឋកិច្ចមួយដ៏ស្មើភាពគ្នា និងយូរអង្វែង។

ផ្ទុយទៅវិញ បញ្ហាប្រាក់យ័នចិន ថោកជ្រុលពេលដែលក្រុងវ៉ាស៊ិនតោនចង់ឲ្យចិនសិក្សាឡើងវិញនោះ មិនត្រូវបានលើកយកមកនិយាយសោះ ព្រោះក្រុងប៉េកាំងបដិសេធ។

ទាក់ទងនឹងជម្លោះរ៉ាំរ៉ៃផ្នែកពាណិជ្ជកម្មរវាងប្រទេសទាំងពីរវិញ គេគ្រាន់តែបានឮប្រមុខដឹកនាំទាំងពីរអំពាវនាវឲ្យមានការខិតខំពិគ្រោះគ្នា និងយល់ពីភាពចាំបាច់ក្នុងការប្រយុទ្ធប្រឆាំងនឹងនយោបាយឧបត្តម្ភនិយម។

ក្នុងវិស័យការទូតវិញ លទ្ធផលរឹតតែតិចតួចស្តួចស្តើងទៅទៀត។ នៅព្រឹកថ្ងៃពុធនេះ សារព័ត៌មានហុងកុងបានចំអកថា “មិនមែនជាពេលវេលាដែលត្រូវធ្វើសេចក្តីសម្រេចចិត្តឯណា ?! ទស្សនកិច្ចរបស់លោកអូបាម៉ានៅចិននេះ គឺដើម្បីស្វែងរកការចរចាជាយុទ្ធសាស្រ្តមួយក្នុងសំណុំរឿងធំៗ មានជាអាទិ៍ បញ្ហាអាកាសធាតុ និងការប្រយុទ្ធប្រឆាំងនឹងការរីកសាយភាយអាវុធនុយក្លេអ៊ែរ។

លោកអូបាម៉ាបានលើកយកបញ្ហាសិទ្ធិមនុស្ស និងបញ្ហាទីបេ មកនិយាយម្តង ឬពីរដងដែរ ប៉ុន្តែនេះប្រធានបទដែលអាចនាំឲ្យចិនមិនសប្បាយចិត្ត ដូច្នេះត្រូវបានគេបំបិទទៅវិញ ចំណែកសំណុំរឿងអាមេរិកលក់អាវុធឲ្យតៃវ៉ាន់ ក៏ត្រូវបានលោកអូបាម៉ាបដិសេធមិនឆ្លើយដែរ។ ព្រោះទាំងនេះ សុទ្ធសឹងជាប្រធានបទដ៏រសើបបំផុតដែលមិនគួរមានក្នុងរបៀបវីរៈនៃទស្សនកិច្ចបែបនេះឡើយ៕