សហភាពអឺរ៉ុប

អឺរ៉ុបនឹងមានប្រធានអចិន្ត្រៃយ៍នៅថ្ងៃព្រហស្បតិ៍នេះ

ដោយ អៀង សុខម៉ិញ

អត្ថបទចុះផ្សាយកាលពីថ្ងៃទី 19/11/2009 កែប្រែលើកចុងក្រោយកាលពីថ្ងៃទី 19/11/2009 09:51 ម៉ោងសកល

សន្ធិសញ្ញាក្រុង Lisbonne បានបង្កើតតួនាទីថ្មីពីរនៅសហភាពអឺរុប នោះគឺកៅអីជាប្រធានអចិន្ត្រៃយ៍ និងរដ្ឋមន្ត្រីការបរទេស។ នៅល្ងាចថ្ងៃព្រហស្បតិ៍ទី ១៨ វិច្ឆិកានេះ សមាជិក សហភាពអឺរ៉ុប ទាំង២៧ ត្រូវជួបប្រជុំគ្នា ដើម្បីធ្វើការជ្រើសរើសប្រធានទីមួយរបស់ខ្លួន។ ក៏ប៉ុន្តែជាការសម្រេចចិត្តមួយដ៏លំបាក ព្រោះសន្ធិសញ្ញាមិនបានចែង អំពីតួនាទីរបស់ប្រមុខដឹកនាំរបស់ខ្លួន ឲ្យច្បាស់លាស់សោះ។

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ក្រុមប្រឹក្សាអឺរ៉ុប

ក្នុងដំណាក់កាលចុងក្រោយ មុននឹងសន្ធិសញ្ញាក្រុងLisbonne ចូលជាធរមានចាប់ពីថ្ងៃទី១ ធ្នូ ២០០៩ នេះ តួនាទីថ្មីពីរនឹងត្រូវបង្កើតឡើង នៅថ្ងៃនេះ នោះគឺ ប្រធានអចិន្ត្រៃយ៍ របស់សហភាពអឺរ៉ុប និងតំណាងជាន់ខ្ពស់ទទួលបន្ទុកនយោបាយការបរទេស ដែលយើងអាចហៅបានថារដ្ឋមន្ត្រីការបរទេសសហភាពអឺរុប។ ហេតុដូច្នេះហើយបានជាមេដឹកនាំប្រទេសជាសមាជិកទាំង២៧ ត្រូវមកជួបប្រជុំគ្នា នៅទីក្រុងប្រ៊ុចសែល ប្រទេសបែលហ្សិក ដើម្បីសម្រេចអារកាត់នៅល្ងាចនេះ តែងតាំងប្រធានម្នាក់ តាមរយៈការបោះឆ្នោតរកសំឡេងភាគច្រើនគាំទ្រ។ ការតែងតាំងនឹងត្រូវជួបការលំបាកច្រើនព្រោះក្នុងនាមជាអ្នកតំណាងឲ្យសហភាពអឺរ៉ុបលើឆាកអន្តរជាតិ បេក្ខភាពប្រធានអចិន្ត្រៃយ៍ ត្រូវឆ្លើយតបទៅនឹងលក្ខខណ្ឌជាច្រើន ដូចជា ចេះឈរលើចរន្តនយោបាយ អភិរក្សនិយម និង សង្គម-ប្រជាធិបតេយ្យដែលជាចរន្តពីរខ្វែងគ្នា ប៉ុន្តែក៏ត្រូវចេះបែងចែកទម្ងន់នយោបាយរវាងប្រទេសតូច និងប្រទេសធំ សមភាពរវាងស្ត្រីនិងបុរស ។ល។ និង។ល។ និងត្រូវស្វែងរកសំឡេងគាំទ្រឲ្យបានយ៉ាងណោចណាស់ ២៥៥សំឡេង លើ៣៤៥សំឡេង។

បើតាមសន្ធិសញ្ញាក្រុង Lisbonne អាណត្តិរបស់ប្រធានអចិន្ត្រៃយ៍នេះ មានរយៈពេលពីរឆ្នាំកន្លះ ហើយប្រធានម្នាក់អាចកាន់តំណែងបានត្រឹមតែពីរអាណត្តិប៉ុណ្ណោះយ៉ាងយូរ។

ចំណែកអនាគតរដ្ឋមន្ត្រីការបរទេស ដែលជាតំណាងជាន់ខ្ពស់ទទួលបន្ទុកកិច្ចការនយោបាយការទូតផង និងទំនាក់ទំនងការបរទេសផង នឹងមានថានៈស្មើនឹងអនុប្រធានគណៈកម្មការអឺរ៉ុប ហើយមានភារៈធំទូលាយជាងតំណាងការទូតសហភាពអឺរ៉ុបចាស់៕

ទាក់ទងនឹងប្រធានបទនេះ