កម្ពុជា-ថៃ

រដ្ឋាភិបាលថៃ ៖ ក្រុមអាវក្រហម នាំអាវុធពីកម្ពុជា ដើម្បីបះបោរ

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 19/11/2009 កែប្រែលើកចុងក្រោយកាលពីថ្ងៃទី 19/11/2009 12:05 ម៉ោងសកល

កាសែតថៃ នៅថ្ងៃព្រហស្បតិ៍នេះ បានស្រង់សំដីខុទ្ធកាល័យនាយករដ្ឋមន្ត្រីថៃ ដែលលើកឡើងថា ក្រុមអាវក្រហមថៃ របស់លោក ថាក់ស៊ីន លួចបញ្ជូនអាវុធ ពីកម្ពុជា សម្រាប់ធ្វើការបះបោរ នៅទីក្រុងបាងកក ក្នុងមហាបាតុកម្ម នាចុងខែវិច្ឆិកានេះ។ ក៏ប៉ុន្តែ រដ្ឋាភិបាលកម្ពុជា តាមរយៈអ្នកនាំពាក្យក្រសួងមហាផ្ទៃ បានបដិសេធភ្លាមៗ ហើយថា កម្ពុជាមិនមានអាវុធ និងមិនមែនជាទីតាំង ឬ ក៏បញ្ជូនអាវុធ ដើម្បីគាំទ្រក្រុមណាមួយ ដើម្បីផ្តួលរំលំរដ្ឋាភិបាលប្រទេសណាទេ។
សូមចុចខាងក្រោមដើម្បីស្តាប់ ៖

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

19/11/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ក្រុមអាវក្រហម នាំអាវុធពីកម្ពុជា ដើម្បីបះបោរ ?!
(រូបថត : Reuters)

កាសែតថៃ បានស្រង់សំដីរបស់រដ្ឋមន្ត្រីប្រចាំខុទ្ទកាល័យនាយករដ្ឋមន្ត្រីថៃ ផ្សាយនៅថ្ងៃ១៩វិច្ឆិកានេះថា ក្រុមអាវក្រហមថៃ ដែលគាំទ្រអតីតនាយករដ្ឋមន្ត្រី ថាក់ស៊ីន លួចដឹកជញ្ជូនអាវុធ ឆ្លងកាត់ព្រំដែនភាគឦសាន ចេញពីប្រទេសកម្ពុជា សម្រាប់ការបះបោរក្នុងអំឡុងបាតុកម្មរបស់ក្រុមអាវក្រហមថៃ ដែលនឹងចាប់ពីថ្ងៃ២៩វិច្ឆិកា ដល់ថ្ងៃ៣ ធ្នូ ខាងមុខ។

ខុទ្ទកាល័យនាយករដ្ឋមន្ត្រីថៃ បានផ្សាយដំណឹងបែបនេះ ដោយសំអាងលើមេក្រុមអាវក្រហមថៃ ឈ្មោះ ចក្រភព ភែនឃែរ ដែលកំពុងរត់គេចខ្លួន។ មេក្រុមអាវក្រហម បានប្រាប់កាសែតថៃថា ក្រុមអាវក្រហម បានដឹកជញ្ជូនអាវុធ ដោយលួចលាក់ចេញពីកម្ពុជា ឲ្យក្រុមគាំទ្រថាក់ស៊ីន នៅតំបន់ឦសាន ដែលជាមូលដ្ឋានរឹងមាំរបស់អតីតនាយករដ្ឋមន្ត្រីថៃ ថាក់ស៊ីន។ ក្រុមអាវក្រហមថៃ ក៏ត្រូវបានកាសែតអះអាងថា មានបំណងធ្វើការតស៊ូប្រដាប់អាវុធ ដើម្បីសម្រេចគោលដៅ ផ្តួលរំលំរដ្ឋាភិបាល អាប់ភីស៊ីត និង ស្ថារអំណាចរបស់ ថាក់ស៊ីន ឡើងវិញ។

ចំពោះការលើកឡើងនេះ លោកឧត្តមសេនីយ៍ ខៀវ សុភ័ក្រ មន្ត្រីនាំពាក្យក្រសួងមហាផ្ទៃរបស់រដ្ឋាភិបាលកម្ពុជា បានបដិសេធ និងថា កម្ពុជាគ្មានអាវុធសម្រាប់ជួយក្រុមប្រទេសណាទេ តែកម្ពុជា ក៏មិនខ្វះអាវុធ ដើម្បីការពារបូរណភាពទឹកដីដែរ។

លោកឧត្តមសេនីយ៍ ខៀវ សុភ័ក្រ ក៏បានបញ្ជាក់ថា រដ្ឋធម្មនុញ្ញព្រះរាជាណាចក្រកម្ពុជា បានកំណត់ច្បាស់ហើយថា កម្ពុជា មិនផ្តល់ទឹកដី ឬ ក៏បញ្ជូនអាវុធ ដើម្បីគាំទ្រក្រុមណាមួយ ក្នុងការផ្តួលរំលំរដ្ឋាភិបាលប្រទេសណាទេ។

ទោះជាយ៉ាងណា ក្រុមឧត្តមសេនីយ៍មេទ័ពថៃ ជឿថា លោកនាយករដ្ឋមន្ត្រី ហ៊ុន សែន កំពុងតែរួមដៃជាមួយនឹងអតីតនាយករដ្ឋមន្ត្រីថៃ ថាក់ស៊ីន ដើម្បីផ្តួលរំលំរដ្ឋាភិបាលថៃបច្ចុប្បន្ន។ នោះគឺសេរីយ៉ូថ្មីមួយ ត្រូវបានរៀបចំឡើង ដោយពួកអាវក្រហមថៃ អាចបង្កភាពវឹកវរ តាមរយៈបាតុកម្មមហាជន នៅថ្ងៃ២៩វិច្ឆិកាខាងមុខ រួមជាមួយនឹងការបំផ្ទុះគ្រាប់បែកនៅក្រុងបាងកក និងលើស្ថាប័នរដ្ឋ នៅភាគឦសានជាប់ព្រំដែនប្រទេសកម្ពុជា៕