កម្ពុជា-ថៃ

បុគ្គលិកជនជាតិថៃនៅCATS ត្រូវបានបញ្ឈប់បណ្តោះអាសន្ន

ដោយ លាង ដឺលុច

អត្ថបទចុះផ្សាយកាលពីថ្ងៃទី 19/11/2009 កែប្រែលើកចុងក្រោយកាលពីថ្ងៃទី 19/11/2009 11:41 ម៉ោងសកល

ប្រធានក្រុមហ៊ុនសេវាកម្មចរាចរណ៍ដែនអាកាសកម្ពុជាហៅកាត់ថា CATS បានថ្លែងប្រាប់កាសែតថៃថា រដ្ឋាភិបាលកម្ពុជាបានបណ្តេញបុគ្គលិកជនជាតិថៃដែលធ្វើការនៅក្រុមហ៊ុនCATSនេះ កាលពីថ្ងៃពុធម្សិលមិញ។ ការចេញចំណាត់ការថ្មីនេះកើតមានឡើងបន្ទាប់ពីវិស្វករជនជាតិថៃម្នាក់ដែលធ្វើការអោយក្រុមហ៊ុនCATSនេះត្រូវបានចាប់ខ្លួនក្រោមបទសង្ស័យក្នុងអំពើចារកម្ម។ តុលាការកម្ពុជាបានរកឃើញសាក្សីបន្ថែម ដែលអះអាងអំពីការងារចារកម្មរបស់វិស្វករជនជាតិថៃនេះ។
សូមចុចខាងក្រោមដើម្បីស្តាប់ ៖

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

19/11/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

មានការបណ្តេញបុគ្គលិកថៃនៅក្រុមហ៊ុនCATS
(រូបថត ៖ សុវណ្ណារ៉ា)

ប្រធានក្រុមហ៊ុនសាជីវកម្ម សាម៉ាត លោក វ៉ាតឆៃ វីឡៃឡាក់ Watchai Wilailuck បានអះអាងប្រាប់កាសែតថៃបាងកកប៉ុស្តថា រដ្ឋាភិបាលកម្ពុជាបានបញ្ជាអោយបុគ្គលិកជនជាតិថៃដែលធ្វើការអោយក្រុមហ៊ុនសេវាកម្មចរាចរដែនអាកាសកម្ពុជាហៅកាត់ថា CATS ពីក្រុមហ៊ុនកាលពីថ្ងៃពុធម្សិលមិញ។ នាយកក្រុមហ៊ុនសាម៉ាតដែលជាអ្នកទទួលខុសត្រូវលើក្រុមហ៊ុនCATSដែរនោះ បានបន្តថា បុគ្គលិកជនជាតិថៃជិត១០នាក់ត្រូវបានហាមឃាត់មិនអោយចូលកន្លែងធ្វើការវិញទេរហូតដល់សំណុំរឿងក្តីក្តាំរបស់ជនជាតិថៃឈ្មោះស៊ីវ៉ារ៉ាក់ដែលត្រូវបានចាប់ខ្លួននោះ ចប់សព្វគ្រប់។

មិនអាចទាក់ទងមន្រ្តីរដ្ឋាភិបាលកម្ពុជា ដើម្បីអះអាងបញ្ជាក់អំពីការបណ្តេញបុគ្គលិកជនជាតិថៃពីក្រុមហ៊ុនCATSនេះបានទេនៅថ្ងៃនេះ។

ក្រុមហ៊ុនសេវាកម្មចរាចរណ៍ដែនអាកាសកម្ពុជាហៅកាត់ថា CATS គឺជាក្រុមហ៊ុនដែលធ្វើការលើការត្រួតពិនិត្យចរាចរណ៍ដែនអាកាសរបស់កម្ពុជា ដែលវិនិយោគដោយក្រុមហ៊ុនសាម៉ាតរបស់ថៃ។

កាលពីថ្ងៃទី១២វិច្ឆិកាសប្តាហ៍កន្លងទៅ ក្នុងអំឡុងបេសកកម្មរបស់អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត ក្នុងនាមជាទីប្រឹក្សារដ្ឋាភិបាលកម្ពុជា នៅប្រទេសកម្ពុជា អាជ្ញាធរកម្ពុជាបានចាប់ខ្លួនវិស្វករជនជាតិថៃម្នាក់ឈ្មោះ ស៊ីវ៉ារ៉ាក់ ជោធិពង្ស ដែលធ្វើការនៅក្នុងក្រុមហ៊ុនCATSនេះ ក្នុងបទសង្ស័យថាបានលួចផ្តល់ព័ត៌មានស្តីពីជើងហោះហើររបស់លោក ថាក់ស៊ីន និងរបស់លោកនាយករដ្ឋមន្ត្រី ហ៊ុន សែន ផ្ញើទៅអោយក្រុងបាងកក។ ក្រុងបាងកកដែលបានកំពុងតាមប្រមាញ់ចាប់ខ្លួនលោកថាក់ស៊ីន។

កាលពីព្រឹកថ្ងៃពុធម្សិលមិញ បុរសពីរនាក់ ដែលម្នាក់ជាជនជាតិថៃ និងម្នាក់ទៀតជាជនជាតិខ្មែរធ្វើការនៅក្នុងក្រុមហ៊ុនCATSនេះដែរ បានចូលឆ្លើយផ្តល់ព័ត៌មានបន្ថែមក្នុងនាមជាសាក្សីទៅអោយសាលាដំបូងរាជធានីភ្នំពេញ ដោយពួកគេបានសារភាពថា ពួកគេបានទទួលបញ្ជាពីវិស្វករជនជាតិថៃឈ្មោះស៊ីវ៉ារ៉ាក់នេះ អោយតាមដានជើងហោះហើររបស់លោកថាក់ស៊ីន។

កាសែតបាងកកប៉ុស្តបានផ្សាយអោយដឹងថា រដ្ឋាភិបាលកម្ពុជាបានបញ្ជាអោយក្រុមហ៊ុនCATSដាក់បុគ្គលិកកម្ពុជាអោយធ្វើការជំនួសកន្លែងជនជាតិថៃជាបណ្តោះអាសន្ន។

ពាក់ព័ន្ធនឹងករណីវិស្វករជនជាតិថៃលោក ស៊ីវ៉ារ៉ាក់ លោក កៅ ស៊ូផា ដែលជាមេធាវីរបស់លោក ស៊ីវ៉ារ៉ាក់ បានអះអាងអោយដឹងថា ម្តាយរបស់កូនក្តីរបស់លោកមានគំរោងជួបកូនប្រុសគាត់នៅរសៀលថ្ងៃទី២៧វិច្ឆិកាខាងមុខនេះ ដោយមានមន្ត្រីក្រសួងការបរទេសថៃមកជាមួយផង។ បើតាមលោក កុយ គួង ដែលជាអ្នកនាំពាក្យក្រសួងការបរទេសកម្ពុជា ការសំរេចអោយមានការសួរសុខទុក្ខជាថ្មីលើលោកវិស្វករជនជាតិថៃនោះ វាអាស្រ័យលើការពិចារណារបស់តុលាការ៕