រុស្ស៊ី

ជំហានឆ្អោះទៅកាន់ការលុបបំបាត់ទោសប្រហារជីវិត

ដោយ កែវ ឆាយា

អត្ថបទចុះផ្សាយកាលពីថ្ងៃទី 20/11/2009 កែប្រែលើកចុងក្រោយកាលពីថ្ងៃទី 20/11/2009 11:47 ម៉ោងសកល

នៅរុស្ស៊ី តុលាការធម្មនុញ្ញ ទើបនឹងហាមជាថ្មី មិនឲ្យអនុវត្តទេ ទោសប្រហារជីវិត។ ការនេះបានត្រូវអបអរសាទរភ្លាមភ្លែត ដោយអន្តរជាតិ បឋមមុនគេ ដោយក្រសួងការបរទេសបារាំង។ ហើយតាមការគូសបញ្ជាក់នៃក្រសួងការបរទេសរុស្ស៊ី សេចក្តីសំរេចចិត្តរបស់តុលាការធម្មនុញ្ញរុស្ស៊ី គឺសឲ្យឃើញថា ក្រុងម៉ូស្គូបន្តបំពេញតាមកាតព្វកិច្ចខ្លួនខាងគោរពសិទ្ធិមនុស្ស ពេលចូលជាសមាជិកនៃក្រុមប្រឹក្សាអឺរ៉ុប តាំងពីឆ្នាំ ១៩៩៦ មក។

សូមចុចខាងក្រោមដើម្បីស្តាប់ ៖

សេចក្តីរាយការណ៍របស់ កែវ ឆាយា ពីទីក្រុងម៉ូស្គូ

20/11/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

តុលាការធម្មនុញ្ញរុស្ស៊ី នៅទីក្រុងSaint-Petersbourg ថ្ងៃទី ១៩ វិច្ឆិកា ២០០៩
(រូបថត : Reuters)

សេចក្តីសំរេចចិត្តអនុម័តម្សិលមិញជាឯកច្ឆ័ន្ទ ដោយគ្រប់តែចៅក្រម ១៩ នាក់ នៃតុលាការធម្មនុញ្ញ ដែលពន្យារតទៅទៀត ការហាមមិនឲ្យប្រតិបត្តិឡើយ ទោសប្រហារជីវិតនៅរុស្ស៊ីគឺជា ចម្លើយតបនឹងសំនួរពីខាងតុលាការកំពូលរុស្ស៊ីដែលសុំឲ្យបំភ្លឺ ៖ តើបន្ទាប់ពីថ្ងៃ ១ មករា ឆ្នាំក្រោយទៅអាចលើកយកមកអនុវត្តឬទេ ការប្រហារជីវិតជនណាដែលបានត្រូវកាត់ទោសបែបនេះ ? ដ្បិតស្របនឹងការសំរេចចិត្តចេញ កាលពីឆ្នាំ ១៩៩៩ តុលាការធម្មនុញ្ញបានហាមមិនឲ្យប្រតិបត្តិទេទោសបែបនេះ ដរាបណាដែលមិនទាន់មានសាលាឧក្រិដ្ឋ ដំណើរការនៅគ្រប់តែ ៨៣ ដែនដីចំណុះនៃសហព័ន្ធរុស្ស៊ី។ ប៉ុន្តែ ចាប់ពីថ្ងៃ ១ មករា ឆ្នាំក្រោយទៅ សាលាឧក្រិដ្ឋក៏នឹងដំណើរការ ទាំងនៅលើដែនដីចំណុះតែមួយគត់ដែលនៅសល់ គឺសាធារណរដ្ឋ Tchetchenie។

ប្រធានតុលាការធម្មនុញ្ញរុស្ស៊ី លោក Valery Zorkin បានថ្លែងទៅពួកអ្នកកាសែតថា គឺពិតជា ដោយចងជាកាតព្វកិច្ចលើខ្លួន ថាលុបចោលទោសប្រហារជីវិត ដែលប្រទេសរុស្ស៊ី ក្នុងឆ្នាំ ១៩៩៦ បានត្រូវទទួលឲ្យចូលជាសមាជិកក្រុមប្រឹក្សាអឺរ៉ុប។ បន្ទាប់មក ក្នុងឆ្នាំ ១៩៩៧ រុស្ស៊ីថែមទាំងបានចុះហត្ថលេខាលើពិធីសារលេខ ៦ នៃអនុសញ្ញាអឺរ៉ុបស្តីអំពីការការពារសិទ្ធិមនុស្ស ដែលចែងថា ក្នុងសម័យសុខសាន្តត្រាណគ្មានសង្គ្រាម គ្មាននរណាម្នាក់អាចត្រូវកាត់ទោសប្រហារជីវិតឬ ប្រហារជីវិតឡើយ។ ដោយមកពីការសំរេចចិត្តនៃតុលាការធម្មនុញ្ញបច្ចុប្បន្ននៅជាប់តាមពន្ធនាគារនែប្រទេសរុស្ស៊ី គឺមានអ្នកទោស ១៥០៩ នាក់ ដែលរង់ចាំការប្រហារជីវិត។

លើពិភពលោក ពីក្នុងចំណោម ១៩២ ប្រទេសសមាជិកអង្គការសហប្រជាជាតិ មាន តែ ៥៩ ប្រទេស ដែលនៅអនុវត្តការប្រហារជីវិតអ្នកទោស។ ក្នុងឆ្នាំមុន មានប្រហារជីវិតអ្នកទោសសរុបទៅអស់ ២.៣៩០ នាក់។ ច្រើនជាងគេ គឺនៅប្រទេសចិនដល់ទៅ ១.៧១៨ នាក់។ នៅអៀរ៉ង់ ៣៦៤ នាក់។ ហើយជាប់លេខបី គឺសហរដ្ឋអាមេរិក មានប្រហារជីវិតអ្នកទោសអស់ ៣៧ នាក់៕