ជប៉ុន-សេដ្ឋកិច្ច

បន្ទាប់ពីសេដ្ឋកិច្ចចាប់មានកំណើន ជប៉ុនចាប់ផ្តើមជួបនឹងបញ្ហាបរិត្តផរណា

ដោយ សេង ឌីណា

អត្ថបទចុះផ្សាយកាលពីថ្ងៃទី 20/11/2009 កែប្រែលើកចុងក្រោយកាលពីថ្ងៃទី 20/11/2009 12:19 ម៉ោងសកល

នៅថ្ងៃសុក្រនេះ រដ្ឋាភិបាលជប៉ុនបានប្រកាសឲ្យដឹងថា បញ្ហាបរិត្តផរណាបានចាប់កើតមានឡើងវិញហើយនៅជប៉ុន ហើយថាបញ្ហានេះអាចនឹងរារាំងកំណើនសេដ្ឋកិច្ចជប៉ុន ដែលទើបនឹងងើបផុតពីវិបត្តិសេដ្ឋកិច្ចពិភពលោក។ តើអ្វីទៅជាបរិត្តផរណា? តើវាអាចប៉ះពាល់ដូចម្តេចខ្លះដល់សេដ្ឋកិច្ចជាតិ?

សូមចុចខាងក្រោម ដើម្បីស្តាប់៖

ការពន្យល់របស់ សេង ឌីណា

20/11/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ទំនិញនៅលើទីផ្សារជប៉ុនធ្លាក់ថ្លៃជាទូទៅ គួរឲ្យបារម្ភ
(រូបថត៖ Reuters)

វិបត្តិសេដ្ឋកិច្ចពិភពលោកបានធ្វើសេដ្ឋកិច្ចជប៉ុនធ្លាក់ចុះដុនដាប ដល់កម្រិតមួយទាបបំផុត មិនធ្លាប់មាន ចាប់តាំងពីសង្រ្គាមលោកលើកទី២មក។ ក៏ប៉ុន្តែ ចាប់ពីពាក់កណ្តាលឆ្នាំ២០០៩នេះមក សេដ្ឋកិច្ចជប៉ុនបានចាប់មានកំណើនឡើងវិញ ក្នុងរយៈពេលពីរត្រីមាសជាប់ៗគ្នា។

នៅចន្លោះពីខែកក្កដា ដល់ខែកញ្ញា សេដ្ឋកិច្ចជប៉ុនមានកំណើនដល់ទៅជិត៥% ច្រើនជាងការព្យាករទុករបស់សេដ្ឋវិទូ។ ធនាគារកណ្តាលរបស់ជប៉ុនបានសម្រេចរក្សាអត្រាការប្រាក់ឲ្យនៅទាបដដែល គឺត្រឹមតែ ០,១% ប៉ុណ្ណោះ ក្នុងមួយឆ្នាំ ដើម្បីបន្តជំរុញឲ្យសេដ្ឋកិច្ចជប៉ុនមានកំណើនតទៅទៀត។

ក៏ប៉ុន្តែ ទន្ទឹមនឹងដំណឹងល្អនេះ ស្រាប់តែនៅថ្ងៃសុក្រនេះ ក្រសួងសេដ្ឋកិច្ចជប៉ុនបានប្រកាសឲ្យដឹងថា ជប៉ុនអាចនឹងត្រូវប្រឈមមុខនឹងបញ្ហាបរិត្តផរណា ដែលជាឧបសគ្គដ៏ធំនៃកំណើនសេដ្ឋកិច្ច។

តើអ្វីទៅជាបរិត្តផរណា? បរិត្តផរណា គឺផ្ទុយពីអតិផរណា។ អតិផរណា គឺតម្លៃទំនិញជាទូទៅកើនឡើង។ ចំណែក បរិត្តផរណាវិញ តម្លៃទំនិញជាទូទៅធ្លាក់ចុះ។ មិនមែនធ្លាក់ចុះតែតម្លៃទំនិញមួយមុខ ឬក៏ពីរមុខនោះទេ។ គឺតម្លៃទំនិញទូទៅ ស្ទើរតែគ្រប់មុខ ដែលធ្លាក់ចុះ ហើយបន្តធ្លាក់ចុះជាលំដាប់ ក្នុងរយៈពេលមួយវែង។

បើស្តាប់មើលទៅ តម្លៃទំនិញធ្លាក់ចុះគួរតែជាដំណឹងល្អ ជាពិសេស សម្រាប់អ្នកទិញ។ ក៏ប៉ុន្តែ ការពិត បញ្ហាបរិត្តផរណាជះឥទ្ធិពលអាក្រក់ដល់សេដ្ឋកិច្ចជាតិទាំងមូល រួមទាំងអ្នកទិញទំនិញផងដែរ។

នៅពេលដែលតម្លៃទំនិញជាទូទៅធ្លាក់ចុះ ហើយបន្តធ្លាក់ចុះជាលំដាប់ អ្នកទិញចាប់ផ្តើមផ្អាកទិញទំនិញ ដោយនាំគ្នាគិតថា ចាំទំនិញធ្លាក់ចុះបន្តិចទៀត ចាំទិញ ទើបចំណេញ។ នៅពេលដែលគ្រប់គ្នាគិតដូច្នេះ ទំនិញនៅលើទីផ្សារត្រូវសល់លក់មិនដាច់ ហើយអ្នកលក់ត្រូវបង្ខំចិត្តបញ្ចុះតម្លៃបន្ថែមទៀត។ បញ្ហាបរិត្តផរណាក៏កាន់តែធ្ងន់ធ្ងរថែមទៀត។ ប៉ុន្តែ មកដល់ត្រឹមណេះ បរិត្តផរណា នៅតែជាដំណឹងល្អសម្រាប់អ្នកទិញ ព្រោះទំនិញមានតម្លៃថោក។ ក៏ប៉ុន្តែ វាជារឿងល្អ តែនៅពេលដែលអ្នកទិញនៅមានការងារធ្វើ និងនៅមានប្រាក់ចំណូលតែប៉ុណ្ណោះ។ ចុះបើអស់ការងារធ្វើ ហើយគ្មានប្រាក់ចំណូលវិញ? បើទោះជា ទំនិញមានតម្លៃថោកប៉ុណ្ណាក៏ដោយ បើគ្មានលុយទិញទេនោះ ក៏វាគ្មានប្រយោជន៍អ្វីនោះដែរ!

ដំណឹងដែលអាក្រក់ គឺថា បញ្ហាបរិត្តផរណា នឹងនាំទៅរកវិបត្តិអត់ការងារធ្វើ! នៅពេលដែលតម្លៃទំនិញធ្លាក់ចុះ អ្នកលក់ត្រូវបាត់បង់ចំណូល រោងចក្រផលិតទំនិញ ក៏បាត់បង់ចំណូល ហើយត្រូវបង្ខំចិត្តកាត់បន្ថយបុគ្គលិក ឬក៏អាចឈានទៅដល់បិទរោងចក្រតែម្តងក៏មាន។ នៅពេលនោះ វិបត្តិអ្នកអត់ការងារធ្វើនឹងកើតមានឡើង។ នៅពេលនោះហើយ ដែលបញ្ហាបរិត្តផរណានឹងជះឥទ្ធិពលអាក្រក់ ចំពោះសេដ្ឋកិច្ចជាតិជាទូទៅ។ អ្នកទិញទំនិញ ដែលពីដំបូង គិតថា ខ្លួនគួរតែជាអ្នកទទួលផលចំណេញពីការធ្លាក់ថ្លៃទំនិញនោះ ក៏នឹងត្រូវក្លាយជាជនរងគ្រោះវិញដែរ ដោយត្រូវប្រឈមមុខនឹងបញ្ហាអត់ការងារធ្វើ។

កន្លងមក គេធ្លាប់ឃើញបញ្ហានេះកើតឡើងជាច្រើនលើកណាស់មកហើយ។ នៅក្រោយវិបត្តិសេដ្ឋកិច្ចពិភពក្នុងទសវត្សរ៍ទី៣០ និងនៅប្រទេសជប៉ុន កាលពីទសវត្សរ៍ទី៩០។

លោក Hirohisa Fujii រដ្ឋមន្រ្តីក្រសួងហិរញ្ញវត្ថុជប៉ុន បានថ្លែងថា ថ្មីៗនេះទំនិញនៅលើទីផ្សារជប៉ុនបានចាប់ធ្លាក់ថ្លៃខ្លាំងមិនធម្មតា គួរឲ្យបារម្ភ គឺជាការធ្លាក់ថ្លៃទំនិញ ដែលជប៉ុនមិនធ្លាប់ជួបប្រទះ ចាប់តាំងពីឆ្នាំ២០០៦មក។ ថ្វីដ្បិតតែការធ្លាក់ថ្លៃទំនិញនៅពេលនេះ មិនទាន់ដល់កម្រិតមួយធ្ងន់ធ្ងរ ប៉ុន្តែ វាអាចជាចំណុចចាប់ផ្តើមនៃបញ្ហាបរិត្តផរណា។

យោងតាមអ្នកជំនាញសេដ្ឋកិច្ច គេសង្កេតឃើញថា បញ្ហាបរិត្តផរណាច្រើនតែកើតមានឡើង នៅក្រោយពីមានវិបត្តិសេដ្ឋកិច្ច។ ហេតុដូច្នេះហើយបានជាការធ្លាក់ថ្លៃទំនិញ នៅជប៉ុន នាពេលនេះ គឺជារឿងដែលរដ្ឋាភិបាលជប៉ុនត្រូវបារម្ភ ពីព្រោះថា ជប៉ុនទើបតែងើបចេញពីវិបត្តិសេដ្ឋកិច្ចបានបន្តិចប៉ុណ្ណោះ។ ជំហានបន្ទាប់មកទៀត ជប៉ុនអាចនឹងត្រូវប្រឈមមុខនឹងបញ្ហាបរិត្តផរណា។

រដ្ឋមន្រ្តីក្រសួងហិរញ្ញវត្ថុរបស់ជប៉ុនបានថ្លែងថា ការទប់ទល់នឹងបញ្ហាបរិត្តផរណា គឺជានយោបាយចម្បងរបស់រដ្ឋាភិបាលជប៉ុន នៅពេលនេះ។ ក៏ប៉ុន្ត លោកមិនបានបញ្ជាក់ថា តើរដ្ឋាភិបាលរបស់លោកនឹងចាត់វិធានការអ្វីខ្លះនោះទេ។ ទោះជាយ៉ាងណា ជប៉ុនគឺជាប្រទេសដែលធ្លាប់ឆ្លងកាត់បញ្ហាបរិត្តផរណាច្រើនជាងគេ។ ដូច្នេះ រដ្ឋាភិបាលជប៉ុនប្រហែលជាអាចដកបទពិសោធន៍ពីបញ្ហាមុនៗ មកដើម្បីទប់ទល់នឹងបញ្ហាបរិត្តផរណា នៅពេលនេះទៀត។

ក៏ប៉ុន្តែ មេរៀនដែលគេធ្លាប់រៀនពីវិបត្តិមុនៗ បង្ហាញថា គេគួរទប់ស្កាត់ជាមុន កុំឲ្យធ្លាក់ចូលទៅក្នុងវិបត្តិបរិត្តផរណា ពីព្រោះថា បើសិនជាធ្លាក់ចូលទៅក្នុងបញ្ហានេះហើយ គឺពិបាកនឹងចេញមកវិញខ្លាំងណាស់៕

ទាក់ទងនឹងប្រធានបទនេះ