តុលាការខ្មែរក្រហម

ក្រុមអ្នកឃ្លាំមើល ចង់ឲ្យបញ្ជាក់ពីសំណងដល់ជនរងគ្រោះ

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 20/11/2009 កែប្រែលើកចុងក្រោយកាលពីថ្ងៃទី 20/11/2009 12:56 ម៉ោងសកល

ក្រុមអ្នកតាមដានដំណើរការកាត់ទោសអតីតមេដឹកនាំខ្មែរក្រហម បានប្រកាសនៅថ្ងៃសុក្រនេះ ដោយចង់ឲ្យសាលាក្តីខ្មែរក្រហម ធ្វើការបញ្ជាក់ អំពីពាក្យថា សំណងសម្រាប់ជនរងគ្រោះ។ តើសំណងជាសមូហភាព និង សំណងផ្លូវចិត្តនោះ នឹងបានថវិកាពីប្រភពណាខ្លះ ហើយផ្តល់ឲ្យជនរងគ្រោះ ជាដើមបណ្តឹងរដ្ឋប្បវេណី តាមរបៀបណា?។
សូមចុចខាងក្រោមដើម្បីស្តាប់ ៖

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

20/11/2009

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

តើខ្មែរចង់បានយុត្តិធម៌មួយសមរម្យល្មម ឬក៏ការរលាយសាបសូន្យនៃតុលាការខ្មែរក្រហម ?(រូបថត ៖ RFI)

ក្នុងសំណើរបស់ជនរងគ្រោះ ដែលបានប្រកាសក្នុងសន្និសីទកាសែត កាលពីរសៀលថ្ងៃ២០វិច្ឆិកា ឆ្នាំ២០០៩ ក្រុមអង្គការសិទ្ធិមនុស្សដែលតាមដានលើដំណើរការកាត់ទោសមេខ្មែរក្រហម ចង់ឲ្យមានការបញ្ជាក់ច្បាស់លាស់ ចេញពីតុលាការកាត់ទោសមេដឹកនាំខ្មែរក្រហម ចំពោះសំណងសម្រាប់ជនរងគ្រោះ។ ថាតើសំណងនោះ បានមកពីណា? ហើយត្រូវបែងចែកបែបណាដល់ជនរងគ្រោះ ដែលជាដើមបណ្តឹងរដ្ឋប្បវេណី?។

ក្រុមអង្គការឃ្លាំមើលដំណើរកាត់ទោសមេខ្មែរក្រហម ក៏បានបញ្ជាក់ថា ក្រុមជនរងគ្រោះក្នុងរបបខ្មែរក្រហម ក៏ចង់ឲ្យមានសំណងជាថវិកា ក្រៅតែពីសំណងសមូហភាព។ ដូច្នេះ តុលាការត្រូវគិតគូរ ស្វែងរកថវិកាសំណង តាមមធ្យោបាយ បង្កើតខ្ទង់ចំណាយមួយ ឬក៏រ៉ៃអង្គាសថវិកា ពីពលរដ្ឋតាមសហគមន៍ មន្ត្រីរាជការ និង អ្នកជំនួញឯកជនដទៃទៀត។

ការលើកឡើងដូច្នេះ ព្រោះថាជនជាប់ចោទ ឌុច ក៏ដូចជាមេខ្មែរក្រហម ៤ រូបទៀត ដែលកំពុងជាប់ឃុំឃាំង មិនមានលទ្ធភាពដើម្បីផ្តល់សំណង សងដល់ជនរងគ្រោះទេ។

ទោះជាយ៉ាងណា លោក រាជ សម្បត្តិ ប្រធានអង្គភាពកិច្ចការសាធារណៈ និងជាមន្ត្រីនាំពាក្យរបស់តុលាការខ្មែរក្រហម បានលើកឡើងថា ក្នុងកាលៈទេសៈពេលនេះ តុលាការកំពុងមមាញឹកនឹងការជំនុំជម្រះក្តីអតីតមេគុកទួលស្លែង កាំង ហ្កេកអ៊ាវ ហៅ ឌុច ដែលឈានដល់ទីបញ្ចប់នៅអាទិត្យក្រោយ។

លោក រាជ សម្បត្តិ បានបញ្ជាក់ថា សំណងសម្រាប់ជនរងគ្រោះ ជាដើមបណ្តឹងរដ្ឋប្បវេណី ប្រសិនបើមាន គឺជាសំណងសមូហភាព និង សំណងផ្លូវចិត្ត។ ជាសំណង ដែលមកទល់ពេលនេះ តុលាការមិនទាន់ជជែកដល់ឡើយ។

ការនិយាយពីរឿងសំណង សម្រាប់ជនរងគ្រោះរបបខ្មែរក្រហម គឺធ្វើឡើងតែ ២ ថ្ងៃប៉ុណ្ណោះ មុនពេលសវនាការកាត់ទោស ឌុច ត្រូវបិទបញ្ចប់ ដែលភាគីនិមួយៗ ត្រូវធ្វើសេចក្តីសន្និដ្ឋានចុងក្រោយជាបន្តបន្ទាប់ មុនការប្រកាសសាលក្រមលើករណី ឌុច ដែលនឹងត្រូវធ្វើឡើង នៅដើមឆ្នាំ២០១០។

ក្រុមអង្គការឃ្លាំមើលដំណើរកាត់ទោសមេខ្មែរក្រហម ក៏បានចេញរបាយការណ៍លើសវនាការកាត់ទោស ឌុច ចាប់តាំងពីថ្ងៃ ៣០ មិនា។ នោះគឺការជំនុំជម្រះក្តី ឌុច ទោះជាមានខ្វះចន្លោះបន្តិចបន្តួច ប៉ុន្តែបានដំណើរការស្របតាមបទដ្ឋាននីតិវិធី ដែលអាចទទួលយកបានជាទូទៅ នៅក្នុងព្រហ្មទណ្ឌអន្តរជាតិ៕

ទាក់ទងនឹងប្រធានបទនេះ