សេដ្ឋកិច្ច

ចិនវិនិយោគច្រើនជាងគេនៅកម្ពុជា

ដោយ គី សុខលីម

អត្ថបទចុះផ្សាយកាលពីថ្ងៃទី 18/01/2010 កែប្រែលើកចុងក្រោយកាលពីថ្ងៃទី 18/01/2010 09:51 ម៉ោងសកល

នៅក្នុងរយៈពេល ១៥ឆ្នាំចុងក្រោយនេះ ប្រទេសចិនវិនិយោគច្រើនជាងគេនៅកម្ពុជា រីឯប្រទេសជប៉ុនវិញបានបោះទុនតិចជាងគេក្នុងចំណោមប្រទេសចំនួន ១០។ តើប្រទេសចិនចាប់អារម្មណ៍លើវិស័យអ្វីខ្លះ?

សូមចុចខាងក្រោមដើម្បីស្តាប់ ៖

បទអត្ថាធិប្បាយរបស់ គី សុខលីម ពីទីក្រុងភ្នំពេញ

18/01/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

កម្ពុជានិងចិនចុះហត្ថលេខាលើកិច្ចសហប្រតិបត្តិការទ្វេភាគី
(រូបថត ៖ វណ្ណារ៉ា)

ប្រទេសចិន កំពុងមានតួនាទីយ៉ាងសំខាន់នៅក្នុងប្រទេសកម្ពុជាទាំងទំនាក់ទំនងនយោបាយការទូតនិងទំនាក់ទំនងសេដ្ឋកិច្ច សង្គមកិច្ច។

ដោយពិនិត្យតែទៅលើទិដ្ឋភាពសេដ្ឋកិច្ច សង្គមកិច្ច តួលេខមួយចំនួនបានបង្ហាញយ៉ាងច្បាស់ថា ប្រទេសចិនបានបោះទុនវិនិយោគនៅក្នុងប្រទេសកម្ពុជាច្រើនជាងគេបំផុត។

ឯកសាររបស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា ក្នុងរយៈពេល ១៥ឆ្នាំពោលគឺពីឆ្នាំ ១៩៩៤មកដល់ចុងខែកញ្ញាឆ្នាំ ២០០៩កន្លងមកនេះ ប្រទេសចិនប្រជាមានិតបានបោះទុនវិនិយោគនៅក្នុងប្រទេសកម្ពុជាជាមួយនឹងទឹកប្រាក់ ៦៥០០លានដុល្លារអាមេរិក។ បន្ទាប់ពីប្រទេសចិនគឺប្រទេសកូរ៉េខាងត្បូងឈរនៅលំដាប់លេខរៀងទីពីរ ជាមួយនឹងទឹកប្រាក់វិនិយោគ ២៨០០លានដុល្លារអាមេរិក។

ប្រទេសម៉ាឡេស៊ី ស្ថិតនៅក្នុងលំដាប់លេខរៀងទីបីជាមួយនឹងទុនវិនិយោគ ២១០០លានដុល្លារអាមេរិក។

ប្រទេសនៃសហភាពអឺរ៉ុប ស្ថិតនៅក្នុងលំដាប់លេខរៀងទី ៤ជាមួយនឹងទឹកប្រាក់វិនិយោគ ១៣០០លានដុល្លារអាមេរិក។ សហរដ្ឋអាមេរិកស្ថិតនៅលំដាប់លេខរៀងទី ៥ ជាមួយនឹងទឹកប្រាក់វិនិយោគ ១២០០លានដុល្លារអាមេរិក។

បើគិតក្នុងចំណោម ១០ប្រទេស ប្រទេសជប៉ុនស្ថិតនៅក្នុងលំដាប់លេខរៀងក្រោយគេ ជាមួយនឹងទុនវិនិយោគ ១៤៨លានដុល្លារ។

របាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា ក្នុងរយៈពេល ១៥ឆ្នាំចុងក្រោយនេះ ការវិនិយោគផ្ទាល់ពីបរទេស បានផ្តោតការយកចិត្តទុកដាក់ខ្លាំងទៅលើវិស័យទេសចរណ៍។

វិស័យនេះ តំណាងអោយ ៤៨ភាគរយនៃទុនវិនិយោគបរទេសទាំងអស់។ បន្ទាប់មកគឺ វិស័យឧស្សាហកម្មនិងសេវាកម្មដែលវិស័យនីមួយៗតំណាងអោយ ២៣ភាគរយនៃទុនវិយោគបរទេសសរុប។

ចំពោះវិស័យកសិកម្មវិញ អ្នកវិនិយោគបរទេសហាក់បីដូចជាមិនសូវចាប់អារម្មណ៍ប៉ុន្មាននោះទេ ពីព្រោះក្នុងចំណោមទុនវិនិយោគបរទេសទំាងអស់ វិស័យកសិកម្មតំណាងអោយតែ ៦ភាគរយប៉ុណ្ណោះ។

ប្រទេសកម្ពុជា មានសក្តានុពលខ្លាំងលើវិស័យកសិកម្មប៉ុន្តែជាអកុសល វិស័យនេះមិនទាន់ត្រូវបានគេចាប់អារម្មណ៍ច្រើននោះទេ។ មូលហេតុគឺដោយសារវិស័យកសិកម្មខ្មែរនៅពឹងផ្អែកលើអាកាសធាតុច្រើនពេក។

និយាយបែបផ្សេង វិស័យនេះអាចប្រឈមនឹងហានិភ័យខ្ពស់ ហើយការទាញយកប្រាក់ចំណេញមកវិញមានរយៈពេលយូរ។បើផ្អែកលើតួលេខខាងលើ ប្រទេសចិនស្ថិតនៅលំដាប់លេខរៀងទី ១ រីឯប្រទេសកូរ៉េខាងត្បូងស្ថិតនៅលំដាប់លេខរៀងទីពីរ។

តើប្រទេសទាំងពីរនេះបានបោះទុនវិនិយោគច្រើនលើវិស័យអ្វីខ្លះ?

ប្រទេសចិនប្រជាមានិតក្រៅអំពីការផ្តល់ជំនួយដ៏ច្រើនសន្ធឹកសន្ធាប់មកអោយប្រទេសកម្ពុជានោះ ប្រទេសចិនបានបោះទុនវិនិយោគយ៉ាងច្រើនទៅលើវិស័យវារីអគ្គិសនីនិងវិស័យកាត់ដេរនៅក្នុងប្រទេសកម្ពុជា។

បើពិនិត្យលើនិន្នាការរួម ប្រទេសចិនមិនមែនសម្លឹងមើលតែប្រទេសកម្ពុជានោះទេតាមពិត ប្រទេសមហាយក្សមួយនេះ បាននឹងកំពុងសម្លឹងមើលទីផ្សារនៃប្រទេសអាស៊ានទាំងមូលតែម្តង។

ថ្មីៗនេះប្រទេសចិននិងប្រទេសអាស៊ានចាស់ចំនួន ៦ បានសម្រេចលុបចោលពន្ធគយរវាងសមាជិកអាស៊ាននិងប្រទេសចិន។ ការសម្រេចបង្កើតតំបន់ពាណិជ្ជកម្មសេរីរវាងចិននិងអាស៊ាននេះ ត្រូវបានគេវិភាគថា ប្រទេសចិននឹងអាចទាញបានផលចំណេញច្រើនជាងប្រទេសនៃសមាជិកអាស៊ាន។

សម្រាប់ប្រទេសកូរ៉េខាងត្បូងវិញ ក្នុងរយៈពេលប៉ុន្មានឆ្នាំចុងក្រោយនេះ ប្រទេសកូរ៉េបានបោះទុនវិនិយោគដ៏ច្រើនមហាសាលទៅលើវិស័យអចលនទ្រព្យនៅក្នុងប្រទេសកម្ពុជា។

អាគារធំៗដែលកំពុងដុះឡើងទៅទល់នឹងមេឃនោះ គឺភាគច្រើនជាសំណង់ដែលវិនិយោគដោយក្រុមហ៊ុនកូរ៉េខាងត្បូង។

អ្វីដែលជាការកត់សម្គាល់នៅក្នុងរបាយការណ៍ គឺនៅត្រង់ថាប្រទេសជប៉ុនដែលជាប្រទេសផ្តល់ជំនួយដ៏ធំមួយសម្រាប់កម្ពុជាដែរនោះ បែរជាបោះទុនតិចជាងគេក្នុងចំណោមប្រទេសចំនួន ១០។ ប្រទេសជប៉ុនក្នុងរយៈពេល ១៥ឆ្នាំចុងក្រោយនេះ បានបោះទុនវិនិយោគនៅកម្ពុជាតែ ១៤៨លានដុល្លារប៉ុណ្ណោះ។

តួលេខនេះ វាហាក់បីដូចជាចម្លែកបន្តិចមែនប៉ុន្តែសម្រាប់អ្នកស្គាល់ជនជាតិជប៉ុន ច្បាស់ជាពួកគេមិនសម្តែងអារម្មណ៍ចម្លែកប៉ុន្មាននោះទេពីព្រោះអ្នកវិនិយោគជប៉ុនត្រូវបានគេចាត់ទុកថាគឺជាជំពូកមនុស្សដែលធ្វើការប្រយ័ត្នប្រយែងបំផុតមុននឹងធ្វើការបោះទុនវិនិយោគលើអ្វីមួយ៕