សេដ្ឋកិច្ច

ការនាំចេញនិងនាំចូលរបស់កម្ពុជាថយចុះនៅឆ្នាំ២០០៩

ដោយ គី សុខលីម

អត្ថបទចុះផ្សាយកាលពីថ្ងៃទី 25/01/2010 កែប្រែលើកចុងក្រោយកាលពីថ្ងៃទី 25/01/2010 12:58 ម៉ោងសកល

របាយការណ៍ផ្លូវការរបស់ធនាគារជាតិ នៃកម្ពុជា បានបង្ហាញថា ការនាំចេញបានធ្លាក់ចុះ ១៨ភាគរយ រីឯការនាំចូល មានការធ្លាក់ចុះ១៧ភាគរយ នៅឆ្នាំ២០០៩ បើបៀបធៀបទៅនឹងឆ្នាំ២០០៨កន្លងមក។ តើការធ្លាក់ចុះនេះបណ្តាលមកពីកត្តាអ្វីខ្លះ?

សូមចុចខាងក្រោម ដើម្បីស្តាប់៖

ការពន្យល់របស់ គី សុខលីម ពីភ្នំពេញ

25/01/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

វិបត្តិសេដ្ឋកិច្ចធ្វើឲ្យទាំងការនាំចេញ និងការនាំចូលរបស់កម្ពុជាធ្លាក់ចុះ នៅឆ្នាំ២០០៩
(រូបថត៖ វណ្ណារ៉ា)

តម្លៃនៃការនាំចេញ និងនាំចូលរបស់ប្រទេសកម្ពុជា កាលពីឆ្នាំ២០០៩ កន្លងមក មានការថយចុះគួរអោយកត់សម្គាល់ បើប្រៀបធៀបទៅនឹងឆ្នាំ២០០៨កន្លងមក។

របាយការណ៍របស់ធនាគាជាតិ នៃកម្ពុជា បានអោយដឹងថា តម្លៃនៃការនាំចេញផលិតផលក្នុងស្រុក នៅឆ្នាំ២០០៩ កន្លងមក មានចំនួន ប្រមាណជា៣៦០០លានដុល្លារអាមេរិក ពោលគឺមានការថយចុះ ប្រមាណជា៨០០លានដុល្លារអាមេរិក បើប្រៀបធៀបទៅនឹងឆ្នាំ២០០៨កន្លងមក។ បើគិតជាភាគរយវិញ ការនាំចេញផលិតផលក្នុងស្រុក ឆ្នាំ២០០៩ មានការថយចុះ ១៨ភាគរយ បើប្រៀបធៀបទៅនឹងឆ្នាំ២០០៨។

របាយការណ៍បានលម្អិតថា ការថយចុះនៃការនាំចេញសម្លៀកបំពាក់ និងផលិតផលវាយនភ័ណ្ឌកន្លងមក បានធ្វើអោយប្រទេសកម្ពុជាបាត់បង់ទឹកប្រាក់ ប្រមាណជា៧០០លានដុល្លារអាមេរិក ហើយការធ្លាក់ចុះនៃការនាំចេញផលិតផលក្នុងស្រុកមួយចំនួនផ្សេងទៀត ធ្វើអោយបាត់បង់ទឹកប្រាក់ ៩០លានដុល្លារអាមេរិក។

ក្នុងឆ្នាំ២០០៩កន្លងមកនេះ សហរដ្ឋអាមេរិក សហភាពអឺរ៉ុប និងប្រទេសកាណាដា ដែលជាប្រទេសទិញសម្លៀកបំពាក់ពីកម្ពុជាច្រើននោះ បានប្រឈមមុខទៅនឹងវិបត្តិសេដ្ឋកិច្ច។ ដូច្នេះ ការនាំចេញវិស័យកាត់ដេរ នៅឆ្នាំ២០០៩ ទៅកាន់ទីផ្សារទាំងនោះ បានថយចុះ ២៤ភាគរយ បើប្រៀបធៀបទៅនឹងឆ្នាំ២០០៨កន្លងទៅ។

ក្រៅពីទំនិញសម្លៀកបំពាក់ របាយការណ៍បានបញ្ជាក់ទៀតថា ការនាំចេញផលិតផលកសិកម្មបានថយចុះ៦ភាគរយ។ លើសពីនេះទៅទៀត របាយការណ៍បានចង្អុលបង្ហាញថា ការធ្លាក់ចុះតម្លៃកៅស៊ូ តម្លៃត្រី និងផលិតផលកសិកម្មផ្សេងទៀត ក៏ជាមូលហេតុ នៃការថយចុះតម្លៃនៃការនាំចេញ នៅឆ្នាំ២០០៩ផងដែរ។

ការនាំចេញសម្លៀកបំពាក់មានការធ្លាក់ចុះ ប្រមាណជា ២៤% នៅឆ្នាំ២០០៩
(រូបថត៖ AFP)

ឯាកមកមើលតួលេខនាំចូលវិញ ទិន្នាការមិនសូវខុសគ្នាពីតួលេខនាំចេញប៉ុន្មាននោះទេ។ តម្លៃនៃការនាំចូល នៅឆ្នាំ២០០៩ កន្លងមក មានចំនួនទឹកប្រាក់ ប្រមាណជា៥២០០លានដុល្លារអាមេរិក ពោលគឺមានការថយចុះ ១០៥០លានដុល្លារអាមេរិក ឬ

ស្មើនឹង១៧ភាគរយ បើប្រៀបធៀបទៅនឹងឆ្នាំ២០០៨កន្លងមក។ ការថយចុះតម្លៃនៃការនាំចូល ត្រូវបានរបាយការណ៍ពន្យល់ថា គឺដោយសារការថយចុះនៃការនាំចូលវត្ថុធាតុដើម សម្រាប់បម្រើក្នុងឧស្សាហកម្មកាត់ដេរ ការថយចុះនៃការនាំចូលប្រេងឥន្ធនៈ និងការថយចុះនៃការនាំចូលទំនិញប្រើប្រាស់មួយចំនួនផ្សេងទៀត។

បើផ្អែកលើតួលេខខាងលើនេះ ការនាំចេញ និងនាំចូល មានការធ្លាក់ចុះដូចគ្នា ប៉ុន្តែ អ្វីដែលជាការកត់សម្គាល់ គឺនៅត្រង់ថា តម្លៃនៃការនាំចូលនៅតែខ្ពស់ជាងតម្លៃនៃការនាំចេញរបស់កម្ពុជា។សញ្ញានេះបង្ហាញថា កម្លាំងផលិតរបស់ប្រទេសកម្ពុជានៅតែខ្សោយជាងកម្លាំងផលិតរបស់ប្រទេសដទៃៗទៀត។

ការថយចុះទាំងការនាំចេញ និងនាំចូល នៅឆ្នាំ២០០៩កន្លងមក គឺបណ្តាលមកពីវិបត្តិសេដ្ឋកិច្ចពិភពលោក។ វិបត្តិសេដ្ឋកិច្ចពិភពលោកបានញាំញីមូលដ្ឋានគ្រឹះ នៃសេដ្ឋកិច្ចរបស់ប្រទេសកម្ពុជាយ៉ាងខ្លាំងក្លា។

វិស័យដែលរងគ្រោះខ្លាំងដោយសារវិបត្តិសេដ្ឋកិច្ចពិភពលោក រួមមាន៖ វិស័យកាត់ដេរ វិស័យសំណង់ និងវិស័យទេសចរណ៍។ រីឯទុនវិនិយោគផ្ទាល់ពីបរទេសវិញ ក៏មានការថយចុះខ្លាំងដែរ។

របាយការណ៍របស់ធនាគារជាតិនៃកម្ពុជាបានបញ្ជាក់ថា អត្រាកំណើនសេដ្ឋកិច្ចរបស់កម្ពុជា កាលពីឆ្នាំ២០០៩ គឺមានចំនួន២,១ភាគរយ។ ការទស្សន៍ទាយរបស់រដ្ឋាភិបាលមានលក្ខណៈផ្ទុយគ្នាស្រឡះ ពីការទស្សន៍ទាយរបស់ស្ថាប័នហិរញ្ញវត្ថុធំៗ នៅក្នុងពិភពលោក។

មូលនិធិរូបិយវត្ថុអន្តរជាតិ ធនាគារពិភពលោក និងធនាគារអភិវឌ្ឍន៍អាស៊ី បានទស្សន៍ទាយថា សេដ្ឋកិច្ចនៃប្រទេសកម្ពុជាពុំមានកំណើនទេ ពោលគឺកំណើនក្នុងអត្រាអវិជ្ជមាន កាលពីឆ្នាំ២០០៩កន្លងមក។ ប៉ុន្តែ សម្រាប់ឆ្នាំ២០១០នេះ សេដ្ឋកិច្ចកម្ពុជាអាចងើបឡើងវិញ។

រដ្ឋាភិបាលកម្ពុជាបានប៉ាន់ស្មានទុកជាមុនថា នៅឆ្នាំ២០១០នេះ សេដ្ឋកិច្ចនៃប្រទេសកម្ពុជាអាចទទួលបានកំណើន ក្នុងអត្រា៣ភាគរយ ក្នុងខណៈពេល ដែលមូលនិធិរូបិយវត្ថុអន្តរជាតិទស្សន៍ទាយថា អាចមានអត្រាកំណើនជាង៤ភាគរយ៕

ទាក់ទងនឹងប្រធានបទនេះ