កិច្ចការបរទេស

កម្ពុជាតវ៉ាចំពោះផែនទីរបស់ Google

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 05/02/2010 កែប្រែលើកចុងក្រោយកាលពីថ្ងៃទី 05/02/2010 14:52 ម៉ោងសកល

រដ្ឋាភិបាលកម្ពុជា នៅថ្ងៃសុក្រនេះ បានធ្វើការតវ៉ាទៅកាន់ក្រុមហ៊ុន វេបសាយ Google ចំពោះការបង្ហាញផែនទី តាមប្រព័ន្ធអ៊ីនថឺណេត ( Google Earth )។ ជាផែនទី ដែល បានដាក់ប្រាសាទព្រះវិហារខ្មែរ ជិតពាក់កណ្តាល ឲ្យស្ថិតនៅក្នុងប្រទេសថៃ។ កម្ពុជា ក៏បានទាមទារឲ្យ Google ដកផែនទី ដែលខុស ដ៏ធ្ងន់ធ្ងរនោះ ចេញពីវេបសាយរបស់ខ្លួន។

សូមចុចខាងក្រោមដើម្បីស្តាប់ ៖

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

05/02/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ផែនទីរបស់ Google ដែលរដ្ឋាភិបាលកម្ពុជាតវ៉ាថាគូសខុស កាត់ដីខ្មែរទៅឲ្យថៃ

ជាការតវ៉ា ដែលធ្វើឡើងដោយរដ្ឋាភិបាលកម្ពុជា តាមរយៈអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី។ នៅថ្ងៃ ៥កុម្ភៈនេះ លិខិតភ្ជាប់ដោយផែនទីឧបសម្ព័ន្ធ ១ សម័យបារាំង-សៀម ឬហៅថា ផែនទី ដងរែក ត្រូវបានផ្ញើទៅកាន់ ក្រុម ហ៊ុនវេបសាយ Google នៅអាមេរិក និងនៅប្រទេសសឹង្ហបូរី។

ទីប្រឹក្សារាជរដ្ឋាភិបាល និងជាអ្នកនាំពាក្យអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី លោក ទិត សុធា បានគូសបញ្ជាក់ថា ផែនទីរបស់ Google ដែលបានផ្សព្វផ្សាយរួចហើយ តាមទំព័រអ៊ីនថឺណេត បង្ហាញថា ខ្សែព្រំដែន រវាងកម្ពុជា និងថៃ នៅត្រង់តំបន់ប្រាសាទព្រះវិហារ គឺត្រូវបានកំណត់ ខុសនឹងការពិតជាក់ស្តែងទាំងស្រុង។

រដ្ឋាភិបាល បានលើកឡើងថា Google បានបញ្ចូល និងផ្សព្វផ្សាយនូវគំនូសពណ៌លឿង ដែលជាព្រំដែនអន្តរជាតិ រវាងកម្ពុជា និងថៃ នៅត្រង់តំបន់ប្រាសាទព្រះវិហារ គឺ បានដាក់ប្រាសាទព្រះវិហារខ្មែរ ជិតពាក់កណ្តាលឲ្យស្ថិតនៅក្នុងប្រទេសថៃ។ ការកំណត់របស់ Google ធ្វើឲ្យមានការយល់ខុស និងនាំឲ្យមានការភ័នច្រឡំយ៉ាងធ្ងន់ធ្ងរ។ ដូច្នេះហើយ បានជារដ្ឋាភិបាលកម្ពុជា ទាមទារឲ្យ Google ដកផែនទីនោះចេញ ហើយ ដាក់ជំនួសមកវិញ ដោយផែនទីឧបសម្ព័ន្ធ ១ ដែលជាផែនទី ទទួលស្គាល់ជាអន្តរជាតិ។

រដ្ឋាភិបាលកម្ពុជា ក៏បានបញ្ជាក់ប្រាប់ទៅកាន់ Google លើបញ្ហាប្រាសាទព្រះវិហារថា តុលាការយុត្តិធម៌អន្តរជាតិ នៅទីក្រុង ឡាអេ កាលពីថ្ងៃទី ១៥ ខែមិថុនា ឆ្នាំ ១៩៦២ បានប្រើប្រាស់ផែនទីឧបសម្ព័ន្ធ ១ ( ផែនទីដងរែក ) ដើម្បីឈានទៅរកសេចក្តីសម្រេច ដោយដាក់ប្រាសាទព្រះវិហារស្ថិតក្នុងទឹកដីកម្ពុជា។ ផែនទីឧបសម្ព័ន្ធ ១នេះ ក៏ត្រូវបានព្រមទទួលយកដោយថៃ នៅក្នុងឆ្នាំ ១៩០៨ យោងតាមអនុសញ្ញា បារាំង-សៀម នៅឆ្នាំ ១៩០៤៕