វិស័យកាត់ដេរ

រោងចក្រ ១០៦បិទទ្វារនៅឆ្នាំ២០០៩

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 17/02/2010 កែប្រែលើកចុងក្រោយកាលពីថ្ងៃទី 17/02/2010 12:27 ម៉ោងសកល

ក្រសួងការងារបានបង្ហាញតួលេខចុងក្រោយថា រោងចក្រកាត់ដេរសម្លៀកបំពាក់ និងផលិតស្បែកជើង យ៉ាងហោចណាស់ ១០៦បានបិទទ្វារ កាលពីឆ្នាំ ២០០៩ ដែលនាំឲ្យកម្មករប្រមាណ ៤៥.៥០០នាក់ ត្រូវបាត់បង់ការងារ។ ការបិទរោងចក្រ នៅឆ្នាំកន្លងមក ភាគច្រើនដោយសារតែការថយចុះក្នុងការនាំចេញ។

សូមចុចខាងក្រោមនេះដើម្បីស្តាប់៖

សេចក្តីរាយការណ៍របស់លី ម៉េងហួរពីទីក្រុងភ្នំពេញ

17/02/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

កម្មករកាត់ដេរកម្ពុជាកំពុងប្រឈមមុខនឹងភាពអត់ការងារធ្វើនៅពេលរោងចក្របិទទ្វារ
(រូបថត៖សុវណ្ណារ៉ា)

រោងចក្របិទទ្វារ និងការបាត់បង់ការងារក្នុងវិស័យវាយនភណ្ឌកាត់ដេរ នៅឆ្នាំ២០០៩ កន្លងមក ត្រូវបានគេបន្ទោសលើវិបត្តិសេដ្ឋកិច្ច។ វិបត្តិសេដ្ឋកិច្ចបាននាំដល់ការធ្លាក់ចុះ នៃការនាំចេញសម្លៀកបំពាក់កាត់ដេរកម្ពុជា។

រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោកអ៊ុំ មាន បានលើកឡើងថា ទន្ទឹមនឹងមានការបិទទ្វាររោងចក្រចំនួន ១០៦ នៅឆ្នាំកន្លងទៅ ក៏មានរោងចក្រចំនួន ៦៦បានផ្អាកប្រតិបត្តិការដែលធ្វើឲ្យកម្មករកាត់ដេរ ៣៨.១២៤នាក់ត្រូវបានព្យួរការងារ ជាបណ្តោះអាសន្ន។ ក៏ប៉ុន្តែ ក្នុងពេលដំណាលគ្នានោះ ក៏មានរោងចក្រចំនួន ៤៨បានបើកថ្មី និងស្រូបយកកម្មករប្រមាណ ១៦.៨៨៦នាក់ឲ្យចូលធ្វើការឡើងវិញ។

កម្មការនីកាត់ដេរកំពុងប្រឈមមុខនឹងភាពអត់ការងារធ្វើនៅពេលរោងចក្របិទទ្វារ
(រូបថត៖reuters)

វិស័យកាត់ដេរបាននាំនូវចំណូលដ៏សំខាន់ ក្នុងការទ្រទ្រង់សេដ្ឋកិច្ចជាតិ បន្ទាប់ពីវិស័យទេសចរណ៍ វិនិយោគ និងសំណង់។ ក៏ប៉ុន្តែ នៅឆ្នាំ២០០៩កន្លងមក ការនាំចេញសម្លៀកបំពាក់បំពាក់កាត់ដេរ និងផលិតស្បែកជើងរបស់កម្ពុជាមានតម្លៃត្រឹមតែ ២.៣ពាន់លានដុល្លារប៉ុណ្ណោះ គឺទាបជាងឆ្នាំ ២០០៨ដែលមានតម្លៃ ២.៩លានដុល្លារអាមេរិក។ ផលិតផលវាយនភណ្ឌកាត់ដេរ និងស្បែកជើងរបស់កម្ពុជាស្ទើរតែទាំងអស់ត្រូវបាននាំទៅកាន់សហរដ្ឋអាមេរិក និងសហភាពអឺរ៉ុប។

គិតដល់ដាច់ឆ្នាំ ២០០៩ មានរោងចក្រកាត់ដេរចំនួន ៤៦៨ នៅដំណើរការ ជាមួយនឹងកម្មករកាត់ដេរប្រមាណ ៣៣០.០០០ នាក់។

ក្នុងពេលធ្លាក់ចុះនៃវិស័យកាត់ដេរដែលនាំដល់កម្មករអត់ការងារធ្វើនេះ ក្រសួងការងារក៏បានរៀបចំវគ្គបណ្តុះបណ្តាលជំនាញកសិកម្មដល់កម្មកររោងចក្រកាត់ដេរជាង ៤ម៉ឺននាក់ កាលពីឆ្នាំ ២០០៩។ ការបណ្តុះបណ្តាលជំនាញដល់កម្មករបាត់បង់ការងារនេះ ដើម្បីកុំឲ្យកម្មករកាត់ដេរដែលភាគច្រើនជាស្ត្រី ងាកទៅរកការងារក្នុងឧស្សាហកម្មកំសាន្ត នៅតាមភោជនីយដ្ឋាន ក្លឹបរាត្រី និងខ៉ារ៉ាអូខេដែលអាចឈានដល់ការបម្រើផ្លូវភេទ៕

ទាក់ទងនឹងប្រធានបទនេះ