វិស័យកាត់ដេរ

ឆ្នាំ២០១០ ៖ វិស័យកាត់ដេរកម្ពុជាស្ថិតក្នុងស្ថានភាពមិនទាន់ច្បាស់លាស់

ដោយ គី សុខលីម

អត្ថបទចុះផ្សាយកាលពីថ្ងៃទី 22/02/2010 កែប្រែលើកចុងក្រោយកាលពីថ្ងៃទី 22/02/2010 11:13 ម៉ោងសកល

បន្ទាប់ពីទទួលរងផលប៉ះពាល់ខ្លាំង នៅឆ្នាំ២០០៨ និងឆ្នាំ២០០៩រួចមក វិស័យកាត់ដេររបស់កម្ពុជា នៅឆ្នាំ ២០១០នេះ ស្ថិតនៅក្នុងស្ថានភាពមិនទាន់ច្បាស់លាស់នៅឡើយទេ។ លោកវ៉ាន់ ស៊ូអៀង ប្រធានសមាគមថៅកែរោងចក្រកាត់ដេរកម្ពុជាមិនទាន់ហ៊ានអះអាងថា តើវិស័យកាត់ដេរនឹងងើបឡើងវិញ នៅពេលណានោះទេ។

សូមចុចខាងក្រោមនេះដើម្បីស្តាប់៖

បទអត្ថាធិប្បាយរបស់គី សុខលីម

22/02/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ឆ្នាំ២០១០៖វិស័យកាត់ដេរកម្ពុជាស្ថិតក្នុងស្ថានភាពមិនទាន់ច្បាស់លាស់

ចាប់តាំងពីចុងឆ្នាំ ២០០៨មក វិស័យកាត់ដេរកម្ពុជាបានឆ្លងកាត់ពេលវេលាលំបាកលំបិនដែលមិនធ្លាប់មានពីមុនមក។ ការលំបាកក្នុងវិស័យកាត់ដេរកម្ពុជានេះ គឺបានបណ្តាលមកពីវិបត្តិហិរញ្ញវត្ថុពិភពលោក។

លោកវ៉ាន់ ស៊ូអៀង ប្រធានសមាគមថៅកែរោងចក្រកាត់ដេរកម្ពុជាបាននិយាយប្រាប់វិទ្យុបារាំងអន្តរជាតិថា កាលពីឆ្នាំ ២០០៩កន្លងមកនេះ ការនាំចេញវិស័យកាត់ដេរបានធ្លាក់ចុះក្នុងរង្វង់ប្រមាណជា ២០ភាគរយ បើប្រៀបធៀបទៅនឹងឆ្នាំ ២០០៨កន្លងមក។ ទីផ្សារផលិតផលកាត់ដេរធំរបស់កម្ពុជា គឺសហរដ្ឋអាមេរិក និងទីផ្សារសហភាពអឺរ៉ុប។ កន្លងមក ការបញ្ជាទិញបានធ្លាក់ចុះដោយសារសេដ្ឋកិច្ចនៃប្រទេសទាំងនេះ បានទទួលរងនូវផលប៉ះពាល់ពីវិបត្តិសេដ្ឋកិច្ចពិភពលោក។

លទ្ធផលជាក់ស្តែងបានបង្ហាញថា រោងចក្រមួយចំនួន នៅក្នុងប្រទេសកម្ពុជាបានប្រកាសបិទទ្វារ ហើយកម្មករកាត់ដេរមួយចំនួនធំបានបាត់បង់ការងារ។ តួលេខពីប្រភពខុសគ្នាបានប៉ាន់ស្មានថា កម្មករប្រមាណជា ៥ទៅ ៦ម៉ឺននាក់បានបាត់បង់ការងារ នៅក្នុងវិស័យកាត់ដេរដោយសារតែវិបត្តិសេដ្ឋកិច្ច។

កម្មការិនីមួយចំនួនបានវិលត្រលប់ទៅស្រុកកំណើតវិញ។ ប៉ុន្តែកម្មការិនីខ្លះទៀតបានចាប់យកមុខរបរថ្មីគឺ មុខរបរ នៅក្នុងហាងកំសាន្តសប្បាយនានា នៅទីក្រុងភ្នំពេញ។ នៅទីនេះ កម្មការិនីមួយចំនួនអាចប្រឈមមុខនឹងមុខរបរជួញដូរផ្លូវភេទ។

ឆ្លើយតបទៅនឹងសំនួរដែលថា តើវិស័យកាត់ដេរអាចនឹងងើបឡើងវិញ នៅពេលណានោះ? លោកវ៉ាន់ ស៊ូអៀង ប្រធានសមាគមថៅកែរោងចក្រកាត់ដេរកម្ពុជាបានបញ្ជាក់ជាមួយអារម្មណ៍ទុទ្ទិដ្ឋិនិយមថា លោកមិនដឹងថា តើវិស័យនេះនឹងងើបឡើងវិញពិតប្រាកដ នៅពេលណានោះទេ ពីព្រោះ នៅឆ្នាំ២០១០នេះ លោកមិនទាន់ឃើញមានសញ្ញាល្អពិតប្រាកដនៃការបញ្ជាទិញនៅឡើយទេ។ លោកបានបន្ថែមទៀតថា ឆ្នាំ២០១០នេះ គឺជាឆ្នាំដែលអ្នកទាំងអស់គ្នាគួរជួយជ្រោមជ្រែងអោយវិស័យកាត់ដេរអាចមានចលនាឡើងវិញ។ ដូច្នេះរាល់ការទាមទារដំឡើងប្រាក់ខែណាមួយនោះគឺមិនទាន់ដល់ពេលនៅឡើយទេ។

កាលពីពីរសប្តាហ៍មុននេះ គណៈកម្មការក្រុមប្រឹក្សាការងារបានជួបប្រជុំគ្នាដើម្បីពិភាក្សាគ្នាអំពីលទ្ធភាពនៃការដំឡើងប្រាក់បៀវត្សរ៍ដល់កម្មករកាត់ដេរចំនួន ៩៣ដុល្លារដែលស្នើដោយក្រុមសហជីពកម្មករ។ ប៉ុន្តែកិច្ចប្រជុំសុំតំឡើងប្រាក់ខែត្រូវទទួលបរាជ័យ។

លោកវ៉ាន់ ស៊ូអៀង ប្រធានសមាគមតំណាងថៅកែរោងចក្រកាត់ដេរបាននិយាយថា ពេលវេលានេះ គឺមិនមែនជាពេលវេលាដែលត្រូវសុំដំឡើងប្រាក់ខែនោះទេ ហើយនេះ គឺជាព័ត៌មានអវិជ្ជមានបំផុត។ លោកបានបន្តទៀតថា ពេលវេលានេះ គេគួរទុកអោយវិស័យកាត់ដេរដកដង្ហើមបន្តិចសិន។

លោកវ៉ាន់ ស៊ូអៀងបានបញ្ជាក់ថា លោកយល់ដឹងពីទុក្ខលំបាករបស់កម្មករ ប៉ុន្តែ គេគួរតែយល់ពីការលំបាករបស់រោងចក្រផងដែរ។ លោកបានបញ្ជាក់ទៀតថា ការចរចារឿងដំឡើងប្រាក់ខែអាចធ្វើទៅបាន នៅពេលដែលស្ថានភាពសេដ្ឋកិច្ចនឹងប្រសើរឡើងវិញ។

លោកជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជាដែលធ្លាប់តែទាមទារដំឡើងប្រាក់ខែ ជាបន្តបន្ទាប់ដែរនោះបានទទួលស្គាល់ថា ពេលនេះ គឺមិនមែនជាពេលវេលានៃការសុំដំឡើងប្រាក់ខែនោះទេ។ ប្រាក់ខែកម្មករបច្ចុប្បន្ន គឺមានចំនួន ៥០ដុល្លារ ប៉ុន្តែសហជីពមួយចំនួនសុំអោយថៅកែដំឡើងប្រាក់ខែ រហូតដល់ ៩៣ដុល្លារក្នុងមួយខែ។

សូមបញ្ជាក់ថា ដោយសារវិស័យកាត់ដេរកម្ពុជាជួបឧបសគ្គច្រើន ក្នុងកាលៈទេសៈវិបត្តិសេដ្ឋកិច្ចនោះ សមាគមថៅកែរោងចក្រកាត់ដេរកម្ពុជាសកម្មជនសហជីព និងរាជរដ្ឋាភិបាលបានខិតខំបញ្ចុះបញ្ចូលអោយសហរដ្ឋអាមេរិកលុបបំបាត់ពន្ធគយនាំចូលទៅកាន់ទីផ្សារអាមេរិក។ ប៉ុន្តែ រហូតមកដល់ពេលនេះ សហរដ្ឋអាមេរិកនៅមិនទាន់ផ្តល់ចម្លើយនៅឡើយទេ។ ពន្ធនេះមានអត្រាក្នុងរង្វង់ពី ១២ ទៅ៣៤ភាគរយ។

លោកវ៉ាន់ ស៊ូអៀង ប្រធានសមាគមថៅកែរោងចក្រកាត់ដេរកម្ពុជាបានបញ្ជាក់ថា ប្រសិនបើ សហរដ្ឋអាមេរិកសម្រេចលុបចោលពន្ធនេះ វិស័យកាត់ដេរកម្ពុជាអាចប្រកួតប្រជែងជាមួយប្រទេសចិន និងប្រទេសវៀតណាមបាន ប៉ុន្តែប្រសិនប្រទេសក្រីក្រកម្ពុជានៅជាប់ពន្ធនេះ វិស័យកាត់ដេរកម្ពុជានឹងប្រឈមមុខនឹងការលំបាកជាក់ជាមិនខាន៕