នយោបាយ

នាយករដ្ឋមន្ត្រី ហ៊ុន សែន ច្រានចោលការលើកឡើងរបស់អគ្គលេខាធិការអាស៊ាន

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 08/03/2010 កែប្រែលើកចុងក្រោយកាលពីថ្ងៃទី 09/03/2010 06:33 ម៉ោងសកល

នៅព្រឹកថ្ងៃច័ន្ទនេះ លោកប្រមុខដឹកនាំរដ្ឋាភិបាលកម្ពុជា បានប្រតិកម្មដោយសម្តីខ្លាំងៗថា លោក សូរិន ពិតសូវ៉ាន់ មិនស័ក្តសម ធ្វើជាអគ្គលេខាធិការអាស៊ានទេ។ លោកនាយករដ្ឋមន្ត្រី ហ៊ុន សែន ព្រមានថា លោកនឹងធ្វើការទិតៀនអតីតរដ្ឋមន្ត្រីការបរទេសថៃរូបនេះ ចំពោះតួនាទីមិនឯករាជ្យ និងជ្រៀតជ្រែកចូលកិច្ចការផ្ទៃក្នុងរបស់កម្ពុជា នៅក្នុងកិច្ចប្រជុំកំពូលអាស៊ាន នៅប្រទេសវៀតណាម នាពេលខាងមុខ។

សូមចុចខាងក្រោមដើម្បីស្តាប់ ៖

បទអន្តរាគមន៍របស់ លី ម៉េងហួរ ពីទីក្រុងភ្នំពេញ

08/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

សមយុទ្ធយោធា ថ្ងៃទី ៣ មីនា ២០១០ នៅកំពង់ឆ្នាំ
(រូបថត ៖ សុវណ្ណារ៉ា)

ប្រតិកម្មរបស់លោកប្រមុខដឹកនាំកម្ពុជា នៅថ្ងៃនេះ ដោយសារតែលោកអគ្គលេខាធិការអាស៊ាន ដែលជាជនជាតិថៃ លោក សូរិន ពិតសូវ៉ាន់ បានអត្ថាធិប្បាយថា សមយុទ្ធយោធាកម្ពុជា តាមរយៈការបាញ់សាកល្បងកាំភ្លើង BM 21 កាលពីថ្ងៃទី៤ ខែមីនា នៅខេត្តកំពង់ឆ្នាំង អាចជាសញ្ញាបង្ហាញពីអស្ថិរភាព នៅក្នុងតំបន់អាស៊ាន។

ក្នុងនាមជាប្រមុខរដ្ឋាភិបាលនៃប្រទេស ជាសមាជិកអាស៊ានម្នាក់ លោកនាយករដ្ឋមន្ត្រី ហ៊ុន សែន គិតថា អគ្គលេខាធិការអាស៊ានបច្ចុប្បន្ន លោក សូរិន ពិតសូវ៉ាន់ ដែលជាជនជាតិថៃមិនសក្តិសម កាន់តួនាទីជាអគ្គលេខាធិការអាស៊ានទេ។

ក្នុងពិធីជួបជាមួយយោធិនពិការ នៅតំបន់តាកែន កោះស្លា ក្នុងខេត្តកំពត នៅព្រឹកទី៨ ខែមីនានេះ លោកនាយករដ្ឋមន្ត្រី ហ៊ុន សែន បានពន្យល់ថា អគ្គលេខាធិការសមាគមអាស៊ាន ត្រូវអព្យាក្រឹត្យ។ ក៏ប៉ុន្តែលោក ស៊ូរិន ពិតសុវ៉ាន់ បានធ្វើអត្ថាធិប្បាយលើសមយុទ្ធយោធាកម្ពុជា ដោយបង្ហាញការបារម្ភ នឹងការបាញ់សាកល្បងកាំភ្លើង កាំជ្រួចហ្វូងរបស់កងទ័ពកម្ពុជាថា អាចជាការបង្ហាញសញ្ញាពីអស្ថិរភាពក្នុងតំបន់អាស៊ាន។ ចំណែក ប្រទេសខ្លះ ក្នុងតំបន់ ពិសេសប្រទេសថៃ ដែលមានការច្របូកច្របល់ និងការផ្ទុះគ្រាប់បែកស្ទើររាល់ថ្ងៃ ជាពិសេស ធ្វើសមយុទ្ធយោធារបស់ប្រទេសថៃ នៅជិតព្រំដែនប្រទេសកម្ពុជា រហូតដល់មានគ្រាប់ផ្លោង ចូលក្នុងទឹកដីកម្ពុជាផងនោះ ហេតុអ្វីបានជាអគ្គលេខាធិការអាស៊ាន លោក សូរិន ពិតសូវ៉ាន់ មិនលើកឡើងផង?។

ម្យ៉ាងទៀត លោកនាយករដ្ឋមន្ត្រី បានកត់សម្គាល់ថា ការលើកឡើងរបស់លោក សូរិន ពិតសូវ៉ាន់ នោះ មិនតំណាងឲ្យប្រទេសសមាជិកអាស៊ានទេ ព្រោះថាប្រទេសវៀតណាម ឡាវ និងប្រទេសថៃខ្លួនឯង គឺនាយករដ្ឋមន្ត្រី ឧបនាយករដ្ឋមន្ត្រី និងអ្នកនាំពាក្យរដ្ឋាភិបាលថៃ បានចាត់ទុកថា ការបាញ់សាកល្បងកាំភ្លើងធំ កាលពីអាទិត្យមុន ជាកិច្ចការផ្ទៃក្នុងរបស់កម្ពុជាប៉ុណ្ណោះ។

លោកនាយករដ្ឋមន្ត្រី ហ៊ុន សែន បានទាមទារឲ្យអតីតរដ្ឋមន្ត្រីការបរទេសថៃ លោក សូរិន ពិតសូវ៉ាន់ ធ្វើការកែតម្រូវនូវអត្ថាធិប្បាយរបស់ខ្លួន ក្នុងរឿងសមយុទ្ធយោធាកម្ពុជា។ បើមិនដូច្នោះទេ លោកនាយករដ្ឋមន្ត្រី បានព្រមានថា លោកនឹងលើកបញ្ហានេះ នៅថ្ងៃប្រជុំអាស៊ាន អំឡុងខែមេសា នៅប្រទេសវៀតណាម ដើម្បីទិតៀនចំៗលើអគ្គលេខាធិការអាស៊ាន។

កម្ពុជា តាមរយៈអ្នកនាំពាក្យក្រសួងការបរទេស បានបញ្ចេញប្រតិកម្មតាមពាក្យសម្តីភ្លាមៗ ចំពោះអត្ថាធិប្បាយរបស់ លោក សូរិន ពិតសូវ៉ាន់ អគ្គលេខាធិការអាស៊ាន នៅតាមទីភ្នាក់ងារកាសែត Bermana កាលពីថ្ងៃទី៥ ខែមីនា ឆ្នាំ២០១០។ គឺមួយថ្ងៃក្រោយពីការធ្វើសមយុទ្ធយោធាកម្ពុជា។ ចំណែកនៅថ្ងៃ៧មីនា លោក ហោ ណាំហុង រដ្ឋមន្ត្រីការបរទេសកម្ពុជា បានសរសេរលិខិតជាផ្លូវការ ប្រតិកម្មទៅកាន់អគ្គលេខាធិការអាស៊ាន ក្នុងរឿងសមយុទ្ធយោធាកម្ពុជា។

លោកប្រមុខការទូតកម្ពុជា បានលើកឡើងថា ក្នុងឋានៈជាអគ្គលេខាធិការអាស៊ាន លោក សូរិន ពិតសូវ៉ាន់ មិនគួរធ្វើសេចក្តីថ្លែងការណ៍ខុសឆ្គង ដែលនាំឲ្យខូចដល់មុខមាត់ប្រទេសអាស៊ានណាមួយ ក៏ដូចជាអាស៊ានទាំងមូលឡើយ។

កម្ពុជា បានបញ្ជាក់ជំហរច្បាស់លាស់ហើយក្នុងពេលកន្លងមក គឺការធ្វើសមយុទ្ធយោធារបស់កម្ពុជា តាមរយៈការបាញ់សាកល្បងកាំភ្លើងធំ BM-21 មិនមែនជាការគម្រាមកំហែងដល់សន្តិសុខប្រទេសណាទេ និងមិនអាចនឹងផ្តល់សញ្ញាខុសថា មានអស្ថិរភាពក្នុងតំបន់ទេ។ ម្យ៉ាងវិញទៀត កងយោធពលខេមរភូមិន្ទ នឹងពុំធ្វើសកម្មភាពប្រឆាំងប្រទេសណាមួយឡើយ។ ភារកិច្ចតែមួយគត់របស់កងទ័ពកម្ពុជា គឺការពារនូវអធិបតេយ្យភាព និងបូរណភាពដែនដីកម្ពុជាប៉ុណ្ណោះ៕

ទាក់ទងនឹងប្រធានបទនេះ