សង្គម

ករណីរំលោភកើនឡើង

ដោយ លាង ដឺលុច

អត្ថបទចុះផ្សាយកាលពីថ្ងៃទី 08/03/2010 កែប្រែលើកចុងក្រោយកាលពីថ្ងៃទី 09/03/2010 06:34 ម៉ោងសកល

អង្គការលើកលែងទោសអន្តរជាតិ Amnesty Internationalបានចេញសេចក្តីថ្លែងការណ៍មួយក្នុងថ្ងៃទិវាសិទ្ធិនារីអន្តរជាតិ ប្រកាសថា ករណីរំលោភផ្លូវភេទមានការកើនឡើងនៅកម្ពុជា ហើយថាជនរងគ្រោះមិនត្រូវបានយកចិត្តទុកដាក់ពីអាជ្ញាធរនោះឡើយ។ របាយការណ៍ក៏បានស្តីបន្ទោសទៅលើអំពើពុករលួយ និងការរើសអើងពីសំណាក់អាជ្ញាធរ និងតុលាការផងដែរ។

សេចក្តីរាយការណ៍របស់ លាង ដឹលុច ពីទីក្រុងភ្នំពេញ

08/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

រូបគំនូរស្តីពីអំពើហិង្សាក្នុងគ្រួសារ
(រូបថត ៖ សុវណ្ណារ៉ា)

យោងតាមរបាយការណ៍ដែលទទួលបានពីក្រុមប៉ូលិស និងអង្គការសង្គមស៊ីវិល អង្គការលើកលែងទោសអន្តរជាតិបានថ្លែងថា ករណីរំលោភផ្លូវភេទមានការកើនឡើងនៅកម្ពុជា ហើយអ្វីដែលជាបញ្ហាធ្ងន់ធ្ងរជាងនេះទៅទៀតនោះ គឺក្រុមជនរងគ្រោះ ដោយសារការចាប់រំលោភ មិនមានលទ្ធភាពគ្រប់គ្រាន់ក្នុងការទទួលបានយុត្តិធម៌ សេវាផ្នែកពេទ្យ និងសេវាពិគ្រោះយោបល់នោះឡើយ។ អង្គការលើកលែងទោសអន្តរជាតិបានបញ្ចេញរបាយការណ៍នៅចំថ្ងៃ៨មីនានេះ ក្នុងឱកាសដែលពិភពលោកកំពុងប្រារព្ធទិវាសិទ្ធិនារីអន្តរជាតិ។

នៅក្នុងរបាយការណ៍កម្រាស់៦០ទំព័រ ជនរងគ្រោះ៣០នាក់ អាយុ១០ឆ្នាំ ដល់៤០ឆ្នាំ បាននិយាយអំពីអំពើពុករលួយ និងការរើសអើងរបស់ប៉ូលិស និងតុលាការដែលធ្វើអោយពួកគេ មិនអាចទទួលបានសេវាទាំងនេះ ហើយផ្ទុយទៅវិញ ជនប្រព្រឹត្តល្មើសភាគច្រើនមិនត្រូវបានចាប់កាត់ទោសនោះឡើយ។

លោក ដូណា ហ្កេស Donna Guest អនុប្រធានការិយាល័យអង្គការលើកលែងទោសអន្តរជាតិប្រចាំអាស៊ីប៉ាស៊ីហ្វិកបានថ្លែងថា ដោយមានការខ្វះខាតការគាំទ្រសម្រាប់ជនរងគ្រោះ រដ្ឋាភិបាលត្រូវចាត់វិធានការ ថ្កោលទោសអំពើហឹង្សាផ្លូវភេទនេះ ជាសាធារណៈ ដើម្បីបង្ហាញថា គ្មានការយល់យោគលើបទឧក្រិដ្ឋបែបនេះឡើយ ហើយក៏ដើម្បីទទួលស្គាល់ពីការឈឺចាប់របស់ជនរងគ្រោះដែរ។ អង្គការAmnesty Internationalក៏បានជម្រុញអោយរដ្ឋាភិបាលបំពាក់បំប៉ន ចំណេះដឹង និងសម្ភារៈដល់មន្ត្រីប៉ូលិស ប្រើប្រាស់ប៉ូលិសជាស្ត្រី និងបង្កើតអោយមានខ្ទង់ថវិកាចាំបាច់ ដើម្បីអោយពួកគេអាចបើកស៊ើបអង្កេតលើការចោទប្រកាន់ណាមួយអោយទាន់ពេលវេលា និងប្រកបដោយវិជ្ជាជីវៈ។

លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីមិនទាន់អាចធ្វើអត្ថាធិប្បាយអ្វីតបតនឹងរបាយការណ៍របស់Amnesty Internationalនេះនៅឡើយទេ ដោយលោកស្រីបញ្ជាក់ថា លោកស្រីនៅមិនទាន់បានឃើញរបាយការណ៍នោះនៅឡើយ។ ប៉ុន្តែលោកស្រីរដ្ឋមន្ត្រីបានបញ្ជាក់ថា រដ្ឋាភិបាលបានកំពុងយកចិត្តទុកដាក់ ទៅលើការទប់ស្កាត់អំពើហឹង្សាលើស្ត្រីនេះហើយ។ ទាក់ទងនឹងជំនួយផ្នែកច្បាប់សម្រាប់ជួយជនរងគ្រោះដោយការរំលោភផ្លូវភេទ លោកស្រី អ៊ឹង កន្ថាផាវី បានថ្លែងអោយដឹងថា រដ្ឋាភិបាលបានផ្តល់ថវិកា១០០លានរៀលក្នុងឆ្នាំ២០១០នេះ ដើម្បីផ្តល់សេវាផ្នែកច្បាប់ដល់ជនរងគ្រោះ។ លោកស្រីរដ្ឋមន្ត្រីបានថ្លែងទទួលស្គាល់ថា ឃើញមានតួលេខនៃករណីរំលោភបានកើនឡើងមែន។ ប៉ុន្តែតួលេខទាំងនេះអាចថាមិនឆ្លុះបញ្ចាំងពីករណីជាក់ស្តែងកើតឡើងនោះទេ។ តែអាចថា ប៉ូលីសបានធ្វើការងារមានប្រសិទ្ធិភាពជាងមុន ដូច្នេះការកើនឡើងតួលេខនៃករណីចាប់រំលោភ បានកើតចេញពីការបង្ក្រាបរបស់ប៉ូលិស៕

ទាក់ទងនឹងប្រធានបទនេះ