A(H1N1)
(រួបថត៖​សុវណ្ណារ៉ា)

លោកវេជ្ជបណ្ឌិត លី សុវណ្ណ អនុប្រធាន នាយកដ្ឋានប្រយុទ្ធ ប្រឆាំង នឹងជម្ងឺឆ្លង របស់​ក្រសួង​សុខាភិបាល បាន ប្រាប់ វិទ្យុ បារាំងអន្តរជាតិ នៅថ្ងៃនេះថា ក្រសួងសុខាភិបាល​របស់ប្រទេស កម្ពុជា បានទទួលនូវវ៉ាក់សាំង ការពារជម្ងឺផ្តាសាយថ្មី A ( H1N1 ) ពីអង្គ​ការ​សុខភាពពិភពលោក WHO ក្នុងជំហានដំបូង ចំនួន ៣ សែនដូស។ WHO ក៏បាន​សន្យាថា នឹងផ្តល់នូវ វ៉ាក់សាំង ប្រភេទ​ថ្មី​នេះ ដល់កម្ពុជាជាបន្តបន្ទាប់ ក្នុងអំឡុងឆ្នាំ​២០១០ ដល់ឆ្នាំ២០១១ សរុបទាំងអស់ចំនួន ១, ៥ លានដូស ស្មើប្រមាណ ១០% នៃ​ប្រជាជន​កម្ពុជាសរុប។

សម្រាប់ដំណាក់កាលដំបូងនេះ លោកវេជ្ជបណ្ឌិត បាន​ឲ្យ​ដឹង​ថា ថ្នាំវ៉ាក់សាំងនេះ នឹង​ត្រូវ​ចាក់ជូនដល់ក្រុមអ្នកងាយរងគ្រោះ​ ដែលរួមមាន៖ ស្ត្រីមានផ្ទៃពោះ, កុមារអាយុពី៦ ដល់ ២ ឆ្នាំ និងមន្ត្រីសុខាភិបាល ដែលធ្វើការជិតដិតជាមួយអ្នកជម្ងឺ។ ការចាក់ថ្នាំបង្ការ​ការ​ឆ្លងជម្ងឺផ្តាសាយថ្មីនេះ ត្រូវធ្វើជាដំណាក់ៗ នៅតាមតំបន់ដែលរកឃើញមាន​ជម្ងឺ​ផ្តាសាយ​ថ្មី ហើយ​ក្រោយ​មក នឹង​ត្រូវធ្វើនៅទូទាំងប្រទេស។       

​មន្ត្រីជាន់ខ្ពស់​ក្រសួង​សុខាភិបាល បាន​ឲ្យដឹងថា យុទ្ធនាការ​ចាក់​ថ្នាំ​វ៉ាក់សាំង​លើក​ដំបូង នឹងត្រូវធ្វើនៅ​ថ្ងៃ​ទី​២៤ ខែ​មីនា ខាងមុខនេះ ​នៅរាជធានី​ភ្នំពេញ​, ខេត្ត​កណ្តាល​, ខេត្ត​​កំពង់ស្ពឺ និង​ខេត្ត​កំពង់ឆ្នាំង​។ តំបន់​ទាំង​៤ នេះ មានការ​ផ្ទុះឡើង​នូវ​ជម្ងឺ​ផ្តាសាយ​ថ្មី A ( H1N1 ) ច្រើនជាងគេ​។ ​

អំពីស្ថានភាពជម្ងឺផ្តាសាយថ្មីនេះ ត្រូវបានលោកវេជ្ជបណ្ឌិត លី សុវណ្ណ គូសបញ្ជាក់ថា សព្វថ្ងៃ មានសភាពធូរស្បើយ ដោយ​មួយសប្តាហ៍ គេរកឃើញតែមួយករណី ឬពីរ​ករណី​ប៉ុណ្ណោះ។ ប៉ុន្តែក្រុមវេជ្ជបណ្ឌិតជំនាញ នៅតែបារម្ភខ្លាចមានរលកទី២ នៃ​ការ​​​ឆ្លង​រាលដាលជម្ងឺផ្តាសាយថ្មីនេះ ផ្ទុះឡើងនៅកម្ពុជា។ ដូច្នេះហើយបានជា​ក្រសួង​សុខា​ភិបាល រៀបចំវិធានការបង្ការ និងឆ្លើយតប ដោយមានទាំងការ​ចាក់​វ៉ាក់​សាំងការ​ពារ​ជម្ងឺ​ដ៏កាចសាហាវនេះ។ បើសិនជាបងប្អូនចង់ដឹងព័ត៌មានបន្ថែម​ជុំវិញ​ការ​​​ចាក់​វ៉ាក់​សាំង និងអាការៈជម្ងឺផ្តាសាយថ្មីនេះ សូម​ទាក់ទងទៅកាន់លេខទូរស័ព្ទ ១១៥។

សូមបញ្ជាក់​ថា គិត​មក​ដល់ថ្ងៃទី៩ ខែ​មីនា​នេះ ជំងឺ​ផ្តាសាយ​ប្រភេទ​ថ្មី A ( H1N1 ) នៅកម្ពុជា បាន​កើន​ដល់ ៥៦២ ករណី​។ ក្នុងនោះ មាន​អ្នកស្លាប់​ចំនួន ៦ នាក់​។ ជម្ងឺ​ប្រភេទ​ថ្មី​នេះ បាន​ផ្ទុះឡើង​នៅ​កម្ពុជា អំឡុង​ខែ​មិថុនា ឆ្នាំ​២០០៩ និង​បាន​រាលដាល​នៅ​ ១៤ ខេត្ត រួមមានទាំង រាជធានី​ភ្នំពេញ៕