នយោបាយ

បក្សប្រឆាំងនិងNGOsសុំអោយរដ្ឋសភាពន្យាការពិភាក្សាច្បាប់ប្រឆាំងអំពើពុករលួយរដ្ឋសភាបដិសេធ

ដោយ លាង ដឺលុច

អត្ថបទចុះផ្សាយកាលពីថ្ងៃទី 09/03/2010 កែប្រែលើកចុងក្រោយកាលពីថ្ងៃទី 09/03/2010 14:05 ម៉ោងសកល

នៅថ្ងៃទី១០មីនាស្អែក តាមគម្រោង រដ្ឋសភាកម្ពុជានឹងផ្តើមពិភាក្សាលើសេចក្តីព្រាងច្បាប់ស្តីពីការប្រឆាំងអំពើពុករលួយ។ ក៏ប៉ុន្តែនៅថ្ងៃនេះ ស្រាប់តែគណបក្សសម រង្ស៊ី និងសង្គមស៊ីវិលបានធ្វើសេចក្តីថ្លែងការណ៍រៀងៗខ្លួន ស្នើសុំអោយរដ្ឋសភាពន្យារការចាប់ផ្តើមពិភាក្សាលើច្បាប់ទៅខែក្រោយ។

សេចក្តីរាយការណ៍របស់ លាង ដឹលុច ពីទីក្រុងភ្នំពេញ

09/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

NGOsសុំអោយរដ្ឋសភាពន្យារការពិភាក្សាច្បាប់ប្រឆាំងអំពើពុករលួយរដ្ឋសភាបដិសេធ

បើយោងតាមការពន្យល់របស់ក្រុមអ្នកតំណាងរាស្ត្រគណបក្សសម រង្ស៊ីនៅក្នុងលិខិតដែលពួកគេបានសរសេរដាក់ជូនលោកហេង សំរិនប្រធានរដ្ឋសភានៅថ្ងៃនេះ គឺក្រុមអ្នកតំណាងរាស្ត្រចង់បានអោយមានពេលវេលាច្រើនជាងនេះទៀតសម្រាប់អ្នកតំណាងរាស្ត្រក្នុងការពិនិត្យសេចក្តីព្រាងច្បាប់នេះក៏ជាការជជែកប្រមូលគំនិត យោបល់ ឬអនុសាសន៍ពីប្រជាពលរដ្ឋ និងអង្គការសង្គមស៊ីវិលនានាដើម្បីធ្វើយ៉ាងណាអោយសេចក្តីព្រាងច្បាប់នេះកាន់តែល្អឡើងមុននឹងដាក់ចូលទៅក្នុងកិច្ចប្រជុំពេញអង្គរបស់រដ្ឋសភា។

សូមបញ្ជាក់ថា សេចក្តីព្រាងច្បាប់នេះ បានចូលដល់រដ្ឋសភានៅកាលពីថ្ងៃទី២៤កុម្ភៈ ហើយប្រធានក្រុមតំណាងរាស្ត្រគណបក្សសម រង្ស៊ីលោកសុន ឆ័យបានថ្លែងប្រាប់អ្នកកាសែតថា លោកទើបបានទទួលសេចក្តីព្រាងច្បាប់នេះកាលពីថ្ងៃទី៤មីនាសប្តាហ៍មុននេះ។ ហើយស្រាប់តែថ្ងៃទី១០មិនាស្អែកនេះ រដ្ឋសភាចាប់ផ្តើមពិភាក្សាតែម្តង។

ក្រុមសង្គមស៊ីវិលចំនួន៦អង្គការបានធ្វើសេចក្តីថ្លែងការណ៍រួមនៅថ្ងៃនេះ ដោយបានផ្តល់ហេតុផលដូចគណបក្សប្រឆាំងដូចគ្នា។ គឺបញ្ហាពេលវេលានៃការពិនិត្យច្បាប់នេះឯង។ ពួកគេនិយាយថា ពួកគេបានទទួលសំណៅដើមនៃសេចក្តីព្រាងច្បាប់ក្នុងរយៈពេលខ្លីពេល ដែលធ្វើអោយពួកគេមិនអាចមានពេលគ្រប់គ្រាន់ក្នុងការវិភាគ និងផ្តល់អនុសាសន៍ជូនទៅរដ្ឋសភា។

នៅរសៀលថ្ងៃទី៩មីនាក្រុមតំណាងសង្គមស៊ីវិលបាននាំយកសេចក្តីថ្លែងការណ៍រួមរបស់ពួកគេទៅជូនរដ្ឋសភា ដែលសេចក្តីថ្លែងការណ៍នោះមានសំណូមពរ៥ចំនុច។ ហើយចំនុចទី១មុនគេ គឺការស្នើសុំអោយរដ្ឋសភាពន្យារពេលពិភាក្សានិងអនុម័តសេចក្តីព្រាងច្បាប់នេះដល់មួយខែទៀត ហើយស្នើអោយរដ្ឋសភាបើកអោយមានការផ្តល់មតិជាសាធារណៈអោយទូលំទូលាយ។ ទី២ គឺត្រូវធ្វើអោយក្រុមប្រឹក្សាជាតិប្រឆាំងអំពើពុករលួយត្រូវតែជាស្ថាប័នឯករាជ្យពិតប្រាកដ តាមរយៈការប្រើប្រាស់បុគ្គលឯករាជ្យ ការប្រើប្រាស់ថវិកាដោយឡែកក្នុងកញ្ចប់ថវិកាជាតិ។ សំណូមពរទី៣គឺ មិនអោយប្រធានអង្គភាពប្រឆាំងអំពើពុករលួយដែលចំណុះអោយរដ្ឋាភិបាលធ្វើជាសមាជិកក្រុមប្រឹក្សាជាតិប្រឆាំងអំពើពុករលួយនោះទេ។ ទី៤ សូមអោយការប្រកាសទ្រព្យសម្បត្តិ គួរធ្វើជាសាធារណៈ និងទី៥ គឺគួរចែងលំអិតអំពីការការពារសាក្សី និងអ្នកប្តឹង។

លោកងួន ញិលបានថ្លែងអោយដឹងថា រដ្ឋសភាបានទទួលលិខិតសំណូមពរទាំងអស់នោះហើយ ប៉ុន្តែរដ្ឋសភានឹងមិនអាចធ្វើតាមសំណូមពររបស់គណបក្សសម រង្ស៊ី និងសង្គមស៊ីវិល ដោយលើកការប្រជុំពេញអង្គនៅថ្ងៃស្អែកនោះឡើយ។ អនុប្រធានទីមួយរដ្ឋសភាបានពន្យល់ថា ព្រោះតែច្បាប់ប្រឆាំងអំពើពុករលួយនេះ ស៊ីពេលយូរឆ្នាំហើយ ហើយលោកនាយករដ្ឋមន្ត្រីហ៊ុន សែនបានធ្វើសំណើមករដ្ឋសភា ក្នុងបរិបទនៃការប្រញាប់ទៀត ហេតុដូច្នេះហើយបានជាគណៈកម្មាធិការអចិន្ត្រៃយ៍សម្រេចបើកកិច្ចប្រជុំពេញអង្គវិសាមញ្ញនៅថ្ងៃទី១០មីនាស្អែកនេះតែម្តង។