យោធា អាមេរិក កម្ពុជា

មន្ត្រីក្រសួងការពារជាតិអាមេរិកទស្សនកិច្ច ៥ថ្ងៃ នៅកម្ពុជា

ដោយ លាង ដឺលុច

អត្ថបទចុះផ្សាយកាលពីថ្ងៃទី 10/03/2010 កែប្រែលើកចុងក្រោយកាលពីថ្ងៃទី 10/03/2010 12:50 ម៉ោងសកល

នាយកការិយាល័យកិច្ចការអាស៊ីខាងត្បូងនៃតំបន់អាស៊ីអាគ្នេយ៍របស់ក្រសួងការពារជាតិអាមេរិកលោកវីល្លាម ក្រូ William Crowបានផ្តើមទស្សនកិច្ចរយៈពេល ៥ថ្ងៃ នៅកម្ពុជា នៅថ្ងៃនេះ។ ទស្សនកិច្ចនេះមានគោលបំណងពិនិត្យមើលការរៀបចំសមយុទ្ធយោធាពហុសាសន៍ដែលគ្រោងធ្វើ នៅខែកក្កដាខាងមុខ និងពិភាក្សាជាមួយថ្នាក់ដឹកនាំផ្នែកការពារកម្ពុជាដើម្បីពង្រឹងសហប្រតិបត្តិការយោធារវាងប្រទេសទាំងពីរ។

សូមចុចខាងក្រោមនេះដើម្បីស្តាប់៖

សេចក្តីរាយការណ៍របស់លាង ដឺលុចពីទីក្រុងភ្នំពេញ

10/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ទាហានអាមេរិកធ្លាប់បានបណ្តុះបណ្តាលទាហានកម្ពុជា
(រូបថត៖សុវណ្ណារ៉ា)

លោកឧត្តមសេនីយត្រី វីល្លាម ក្រូ William Crow នាយកការិយាល័យកិច្ចការអាស៊ីខាងត្បូងនៃអាស៊ីអាគ្នេយ៍កំពុងធ្វើទស្សនកិច្ច ៥ថ្ងៃ នៅកម្ពុជា។ លោកវីល្លាម ក្រូ ដែលជាមន្ត្រីរបស់ឧបការីរងនៃក្រសួងការពារជាតិអាមេរិក នឹងទស្សនៈកិច្ចមើលការប្រុងប្រៀបរៀបចំសមយុទ្ធយោធាពហុសាសន៍ដែលកម្ពុជានឹងធ្វើជាម្ចាស់ផ្ទះ នៅខែកក្កដាខាងមុខនេះ ព្រមទាំងគ្រោងពិភាក្សាជាមួយមន្ត្រីជាន់ខ្ពស់របស់ក្រសួងការពារជាតិកម្ពុជា លើទំនាក់ទំនងសហប្រតិបត្តិការយោធារវាងប្រទេសទាំងពីរផងដែរ។

លោកឧត្តមសេនីយឯកឈុំ សុជាតិ អ្នកនាំពាក្យក្រសួងការពារកម្ពុជាបានថ្លែងអោយដឹងថា កម្ពុជានឹងរៀបចំធ្វើសមយុទ្ធយោធាទ្រង់ទ្រាយធំដែលនឹងមានការចូលរួមពីយោធាចំនួនប្រហែល១០០០នាក់មកពីបណ្តាប្រទេសជាង២០ រួមមានមកពីអាស៊ាន ប្រទេសក្នុងតំបន់ និងសហរដ្ឋអាមេរិកផង នៅខែកក្កដាខាងមុខនេះ។

បើតាមការអះអាងរបស់អ្នកនាំពាក្យក្រសួងការពារជាតិខ្មែរ ក្រៅពីពិនិត្យមើលទីតាំងនៃការរៀបចំសមយុទ្ធពហុសាសន៍ តំណាងក្រសួងការពារជាតិសហរដ្ឋអាមេរិកក៏នឹងជួបពិភាក្សាការងារជាមួយថ្នាក់ដឹកនាំក្រសួងការពារជាតិកម្ពុជាដើម្បីនិយាយអំពីសហប្រតិបត្តិការនៃកងរក្សាសន្តិសុខពិភពលោក និងការពង្រឹងទំនាក់ទំនងវិស័យយោធារវាងទីក្រុងវ៉ាស៊ីតោន និងក្រុងភ្នំពេញ ដែលក្នុងប្រធានបទនេះ ការប្រយុទ្ធប្រឆាំងអំពើភេរវកម្ម និងបញ្ហាសន្តិសុខលំហសមុទ្រអាចនឹងត្រូវភាគីទាំង២លើកយកមកជជែកផងដែរ។

លោកឈុំ សុជាតិបានអត្ថាធិប្បាយថា ក្នុងរយៈពេល៥ឆ្នាំចុងក្រោយនេះ ទំនាក់ទំនងអាមេរិកកម្ពុជាបានកើនឡើងយ៉ាងល្អប្រសើរ ជាពិសេសក្នុងវិស័យយោធានេះ ដែលស្តែងចេញតាមរយៈការធ្វើទស្សនកិច្ចរបស់រដ្ឋមន្ត្រីការពារជាតិខ្មែរ លោកទៀ បាញ់ នៅក្រសួងការពារជាតិប៉ង់តាហ្កូនPantagoneរបស់សហរដ្ឋអាមេរិក និងការចូលចតនៃនាវាសង្គ្រាមរបស់អាមេរិកជាហូរហែ នៅកម្ពុជាជាដើម។

គួរបញ្ជាក់ថា ក្រុងវ៉ាស៊ីតោនកំពុងពង្រឹងទំនាក់ទំនងវិស័យយោធាខ្លាំងជាមួយកម្ពុជា ដើម្បីការរក្សាសន្តិសុខក្នុងតំបន់ រីឯ មហាអំណាចក្រុងប៉េកាំងវិញកំពុងតែនាំមុខគេ នៅកម្ពុជាក្នុងការផ្តល់ជំនួយសង្គមសេដ្ឋកិច្ច៕

ទាក់ទងនឹងប្រធានបទនេះ