នយោបាយ

ប្រតិភូសភាអឺរ៉ុបប្រកាសពីដំណើរទស្សនកិច្ចនៅកម្ពុជា

ដោយ ប៉ែន បូណា

អត្ថបទចុះផ្សាយកាលពីថ្ងៃទី 13/03/2010 កែប្រែលើកចុងក្រោយកាលពីថ្ងៃទី 13/03/2010 11:30 ម៉ោងសកល

គណៈប្រតិភូមួយក្រុមរបស់សភាអឺរ៉ុបទទួលបន្ទុកផ្នែកទំនាក់ទំនងជាមួយបណ្តាប្រទេសអាស៊ាន គ្រោងនឹងទៅបំពេញទស្សនកិច្ចនៅកម្ពុជានាសប្តាហ៍ក្រោយនេះ។ ដំណើរទស្សនកិច្ចរយៈពេល៣ថ្ងៃដែលនឹងចាប់ផ្តើមនៅថ្ងៃទី១៨ មីនា នឹងផ្តោតលើបញ្ហាសំខាន់ៗមួយចំនួនជាពិសេស បញ្ហានយោបាយ និងសិទ្ធិមនុស្សនៅកម្ពុជា។ គណៈប្រតិភូនេះគ្រោងនឹងជួបពិភាក្សាជាមួយមន្ត្រីរដ្ឋាភិបាលជាច្រើន រួមទាំងបក្សប្រឆាំង និងសង្គមស៊ីវិលផងដែរ។ បក្សប្រឆាំងត្រៀមជាស្រេចក្នុងការលើកឡើងពីករណីលោកសមរង្ស៊ី

សូមចុចខាងក្រោមនេះ ដើម្បីស្តាប់

សេចក្តីរាយការណ៍របស់ ប៉ែន បូណា ពីទីក្រុងភ្នំពេញ

13/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ប្រតិភូសភាអឺរ៉ុបប្រកាសពីដំណើរទស្សនកិច្ចនៅកម្ពុជា
(រូបថត៖ Reuters)

គណៈប្រតិភូសភាអឺរ៉ុបមួយក្រុមដែលមានគ្នា៩នាក់ គ្រោងនឹងទៅដល់កម្ពុជានៅថ្ងៃ១៨មីនាសប្តាហ៍ក្រោយនេះ ក្នុងដំណើរទស្សនកិច្ចដែលមានរយៈពេល៣ថ្ងៃ។ ទស្សនកិច្ចនេះមានគោលដៅស្វែងយល់អំពីការវិវត្តន៍ថ្មីៗរបស់ប្រទេសកម្ពុជា ទាក់ទងនឹងវិស័យនយោបាយ និងសេដ្ឋកិច្ច។ សេចក្តីប្រកាសព័ត៌មានមួយដែលចេញផ្សាយកាលពីថ្ងៃសុក្រម្សិលមិញដោយការិយាល័យសហភាពអឺរ៉ុបប្រចាំប្រទេសកម្ពុជាបានឲ្យដឹងថា មានប្រធានបទជាក់លាក់មួយចំនួនដែលគេគ្រោងនឹងលើកយកទៅពិភាក្សានៅក្នុងដំណើរទស្សនកិច្ចនេះ។ ប្រធានបទទាំងនោះមានដូចជាផលប៉ះពាល់នៃវិបត្តិសេដ្ឋកិច្ចពិភពលោក បញ្ហាថ្មីៗដែលទាក់ទងនឹងនយោបាយ និងសិទ្ធិមនុស្ស ព្រមទាំងទំនាក់ទំនងទ្វេភាគីរវាងកម្ពុជា និងសហភាពអឺរ៉ុបផងដែរ។

គណៈប្រតិភូសភាអឺរ៉ុបទទួលបន្ទុកផ្នែកទំនាក់ទំនងជាមួយបណ្តាប្រទេសអាស៊ានដែលមានគ្នា៩នាក់នេះ នឹងដឹកនាំដោយលោក Werner Langen ហើយពួកគេគ្រោងនឹងចូលជួបពិភាក្សាការងារជាមួយមន្ត្រីដឹកនាំកំពូលៗជាច្រើន ទាំងក្នុងស្ថាប័ននីតិបញ្ញត្តិ និងនីតិប្រតិបត្តិ។ ក្រៅពីនោះ គណៈប្រតិភូក៏គ្រោងនឹងជួបជាមួយគណបក្សប្រឆាំង និងអង្គការសង្គមស៊ីវិលផងដែរ។ គេនៅមិនទាន់ដឹងថា គណៈប្រតិភូសភាអឺរ៉ុបនឹងលើកឡើងអំពីបញ្ហាអ្វីពិតប្រាកដជាមួយរដ្ឋាភិបាលកម្ពុជានៅឡើយទេ ប៉ុន្តែអ្វីដែលគួរឲ្យកត់សម្គាល់នោះ គឺដំណើរទស្សនកិច្ចរបស់ប្រតិភូសភាអឺរ៉ុបពេលនេះបានធ្វើឡើង ខណៈពេលដែលលោកសមរង្ស៊ី មេដឹកនាំបក្សប្រឆាំងនៅកម្ពុជាកំពុងទទួលរងការកាត់ទោសពីតុលាការក្នុងបទចោទប្រកាន់ជាច្រើនទាក់ទងនឹងបញ្ហាព្រំដែន។

លោកយឹមសុវណ្ណ អ្នកនាំពាក្យគណបក្សសមរង្ស៊ីបានឲ្យដឹងនៅថ្ងៃនេះថា លោកនឹងលើកបញ្ហារំលោភសិទ្ធិមនុស្សជាច្រើនប្រាប់ទៅសភាអឺរ៉ុប ក្នុងនោះការរំលោភសិទ្ធិរបស់អ្នកតំណាងរាស្រ្ត ក៏ជាបញ្ហាចម្បងមួយដែរ។ លោកយឹមសុវណ្ណបានលើកឧទាហរណ៍ពីករណីលោកសមរង្ស៊ី ដែលគ្រាន់តែបានបំពេញភារកិច្ចជាអ្នកតំណាងរាស្រ្តតែប៉ុណ្ណោះ ប៉ុន្តែត្រូវបានតុលាការផ្តន្ទាទោស។

មន្ត្រីរដ្ឋាភិបាលមិនអាចទាក់ទងសុំការអត្ថាធិប្បាយបានទេនៅថ្ងៃនេះ ប៉ុន្តែមន្ត្រីគណបក្សប្រឆាំងវិញសង្ឃឹមថា ដំណើរទស្សនកិច្ចរបស់ប្រតិភូសភាអឺរ៉ុបនឹងមានឥទ្ធិពលធ្វើឲ្យរដ្ឋាភិបាលកម្ពុជាពិចារណាឡើងវិញពីទង្វើមួយចំនួនរបស់ខ្លួន៕