ព្រះមហាក្សត្រខ្មែរ-បារាំង

ព្រះមហាក្សត្រខ្មែរត្រូវតែងតាំងជាសមាជិកបណ្ឌិតសភាបារាំង

ដោយ ឈាង បុប្ផា

អត្ថបទចុះផ្សាយកាលពីថ្ងៃទី 13/03/2010 កែប្រែលើកចុងក្រោយកាលពីថ្ងៃទី 13/03/2010 13:00 ម៉ោងសកល

ព្រះមហាក្សត្រខ្មែរ ព្រះបាទនរោត្តមសីហមុនី ទើបត្រូវបានចូលកាន់តំណែងជាសមាជិកសហការីបរទេសរបស់បណ្ឌិតសភាបារាំង កាលពីរសៀលថ្ងៃម្សិលមិញ។ នៅក្នុងពិធីដ៏ឧឡារិក ដែលរៀបចំឡើងនៅក្នុងបណ្ឌិតសភាអក្សរចារិក និងអក្សរសាស្រ្តAcademie des Inscriptions et Belles Lettres ព្រះមហាក្សត្រខ្មែរត្រូវបានទទួលស្គាល់ជាផ្លូវការ និងមានព្រះរាជវត្តមានក្នុងចំណោមសមាជិកបណ្ឌិតសភាបារាំង។ ប្រជាជនខ្មែរដែលបានចូលរួមធ្វើជាសាក្សីក្នុងពិធីបុណ្យនេះ បានបង្ហាញនូវមោទនភាពដ៏ប្រសើរដែលមានព្រះរាជតំណាងរបស់កម្ពុជាក្នុងស្ថាប័នជាន់ខ្ពស់របស់បារាំង។ បណ្ឌិតសភាអក្សរចារិក និងអក្សរសាស្រ្ត គឺជាកន្លែងដែលប្រមូលផ្តុំទៅដោយអ្នកប្រាជ្ញ និងអ្នកស្រាវជ្រាវជាន់ខ្ពស់ដែលមានសាសន៍ជាបារាំង និងបរទេស។

សូមចុចខាងក្រោមនេះដើម្បីស្តាប់៖

បទយកការណ៍របស់ឈាង បុប្ផាពីទីក្រុងប៉ារីស

13/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ព្រះមហាក្សត្រខ្មែរ ព្រះបាទសម្តេចព្រះបរមនាថ នរោត្តមសីហមុនីត្រូវបានតែងតាំងជាសមាជិកបណ្ឌិតសភាអក្សរចារិក និងអក្សរសាស្រ្ត
(រូបថត៖ ឈាង បុប្ផា)

ស្តេចយាងចូលក្នុងបណ្ឌិតសភាបារាំងជាមួយនឹងព្រះភក្រ្តម៉ឺងម៉ាត់ និងស្ងប់ស្ងាត់។ ក្នុងចំណោមសមាជិកបណ្ឌិតសភានៃអក្សរចារិក និងអក្សរសាស្រ្ត ២៥ រូបដែលមានវត្តមានក្នុងពិធីប្រកាសតែងតាំងកាលពីថ្ងៃម្សិលមិញ ព្រះមហាក្សត្រកម្ពុជា ព្រះបាទ សម្តេចព្រះបរមនាថ នរោត្តម សីហមុនី គឺជាបុគ្គលមួយរូបដែលបង្ហាញនូវគុណសម្បត្តិដ៏ពិសេសមួយ។ នោះគឺក្នុងរយៈពេលជាងមួយម៉ោងនៃពិធីតែងតាំងដែលអមដោយសុន្ទរកថា និងការឡើងបង្ហាញរបស់វាគ្មិន ព្រះករុណាព្រះបាទនរោត្តមសីហមុនីនៅតែមានឥរិយាបថ ដ៏សុភាព និងរក្សាទឹកមុខញញឹមជាប់ជានិច្ច។

ព្រះមហាក្សត្រខ្មែរ ព្រះបាទសម្តេចព្រះបរមនាថ នរោត្តមសីហមុនី និងរដ្ឋមន្រ្តីក្រសួង វប្បធម៌បារាំង Frederic Mitterrand (ខាងឆ្វេង)
(រូបថត៖ ឈាង បុប្ផា)

ដោយពិតទៅ ព្រះបាទនរោត្តមសីហមុនី ត្រូវបានបោះឆ្នោតឲ្យក្លាយសមាជិកសហការីបរទេស តាំងពីឆ្នាំ ២០០៨មកម្ល៉េះ ប៉ុន្តែនៅពេលនោះ មិនទាន់មានអាសនៈនៅទំនេរសម្រាប់ព្រះអង្គ។ នៅពេលនេះ ព្រះមហាក្សត្រខ្មែរនឹងចូលកាន់អាសនៈរបស់សមាជិកម្នាក់ដែលបានទទួលអនិច្ចកម្ម។ សូមបញ្ជាក់ថា បណ្ឌិតសភានៃអក្សរចារិក និងអក្សរសាស្រ្ត មានសមាជិកបណ្ឌិតសភា ចំនួន ៥៥នាក់ សមាជិកសហការីបរទេស៤០នាក់ និងសមាជិកអ្នកឆ្លើយឆ្លងបារាំងនិងបរទេស១០០នាក់ទៀត។ គេត្រូវដឹងថា សមាជិកបណ្ឌិតសភានីមួយៗកាន់តំណែងនេះមួយជីវិត។

បណ្ឌិតសភានៃអក្សរចារិក និងអក្សរសាស្រ្ត គឺជាស្ថាប័នមួយដែលធ្វើការស្រាវជ្រាវ និងបោះពុម្ពស្នាដៃស្រាវជ្រាវដែលទាក់ទងនឹងវិទ្យាសាស្រ្តមនុស្សជាតិ។ ស្ថាប័នមួយនេះដែលជាផ្នែកមួយនៃវិទ្យាស្ថានបារាំងធ្វើការជិតស្និទ្ធជាមួយនឹងសាលាចុងបូព៌ាបទេស EFEO។ បណ្ឌិតសភាមួយនេះមិនជ្រើសរើសសមាជិកតាមរយៈការឈរឈ្មោះរបស់បេក្ខជនទេ។ ប៉ុន្តែ គឺសមាជិករបស់បណ្ឌិតសភាដែលជាអ្នកណែនាំ និងបន្ទាប់មកទើបមានការបោះឆ្នោតរួមពីសំណាក់សមាជិកទាំងអស់របស់បណ្ឌិតសភា។ នៅក្នុងន័យនេះ ព្រះបាទនរោត្តមសីហមុនីត្រូវបានណែនាំ ដោយប្រធានសាលាចុងបូព៌ាបទេស អ្នកតំណាងរបស់អង្គការUnesco ក្នុងប្រទេសបារាំង និងប្រធានរបស់បណ្ឌិតសភា គឺលោក Pierre Sylvain Filliozat។

ព្រះមហាក្សត្រខ្មែរ ព្រះបាទសម្តេចព្រះបរមនាថ នរោត្តមសីហមុនី
(រូបថត៖ ឈាង បុប្ផា)

ជាប្រធានរដ្ឋ ជាអតីតឯកអគ្គរាជទូតកម្ពុជានៅ Unesco អ្នករបាំ និងជាអ្នកជួយស្រោចស្រង់សិល្បៈ ចំរៀង និងរបាំបុរាណក្នុងប្រទេសកម្ពុជា ព្រះមហាក្សត្រកម្ពុជា បានដើរតួនាទីដ៏សំខាន់សម្រាប់សហគមន៍អន្តរជាតិ។ ក្នុងព្រះរាជកិច្ចរបស់ទ្រង់ ព្រះករុណា នរោត្តមសីហមុនីបានចូលរួមជួយក្នុងការស្រាវជ្រាវ ប្រវត្តិសាស្រ្ត បុរាណវិទ្យា និងការពារបេតិកភណ្ឌខ្មែរ។

តាមរយៈព្រះរាជវត្តមានរបស់ព្រះអង្គក្នុងបណ្ឌិតសភាអក្សរចារិក និងអក្សរសាស្រ្ត ព្រះមហាក្សត្រខ្មែរបានអំពាវនាវឲ្យមានការខិតខំប្រឹងប្រែងរបស់សហគមន៍អន្តរជាតិក្នុងការជួយស្រោចស្រង់ប្រាសាទព្រះវិហារ។

ប្រធានរបស់បណ្ឌិតសភា គឺលោក Pierre Sylvain Filliozatពិធីតែងតាំងព្រះមហាក្សត្រខ្មែរជាសមាជិករបស់បណ្ឌិតសភាអក្សរចារិក និងអក្សរសាស្រ្ត ធ្វើឡើងនៅក្រោមទឹកចិត្តដ៏មានមោទនភាពរបស់អ្នកចូលរួមជនជាតិខ្មែរដែលមានតាំងពីគ្រួសារព្រះរាជវង្សខ្មែរ។ ព្រះអង្គម្ចាស់ក្សត្រី នរោត្តមវិជ្ជរ៉ា ដែលមានវត្តមានក្នុងពិធីនោះបានមានបន្ទូលកោតសរសើរចំពោះព្រះកិត្តិយសរបស់ព្រះមហាក្សត្រដែលបណ្ឌិតសភាបារាំងប្រគល់ឲ្យ។

ដូចនឹងអ្នកចូលរួមដទៃទៀត ឯកឧត្តម អុជ គឹមអន ឯកអគ្គរាជទូតខ្មែរប្រចាំប្រទេសបារាំងបានបង្ហាញពី មោទនភាពពីព្រឹត្តិការណ៍ជាប្រវត្តិសាស្រ្តនេះ។ ព្រឹត្តិការណ៍ជាប្រវត្តិសាស្រ្តព្រោះ ព្រះអង្គជាព្រះមហាក្សត្រទីមួយក្នុងពិភពលោកដែលបានក្លាយជាសមាជិករបស់បណ្ឌិតសភាបារាំង។ សម្រាប់លោក ព្រះវត្តមានរបស់ព្រះមហាក្សត្រកម្ពុជា នឹងជួយផ្តល់ឱកាសដល់ការងារស្រាវជ្រាវ និងអភិរក្សប្រាសាទបុរាណខ្មែរតាមរយៈការចូលរួមបន្ថែមរបស់សាលាបារាំងចុងបូព៌ាបទេស។

ក្នុងពិធីកាលពីថ្ងៃម្សិលមិញ ព្រះមហាក្សត្រខ្មែរមិនបានទ្រង់ឯកសណ្ឋានពិសេសដូចដែលសមាជិកបណ្ឌិតសភាដទៃទៀតពាក់នោះទេ។ ព្រះអង្គទ្រង់សំលៀកបំពាក់ដែលព្រះមហាក្សត្រខ្មែរទូទៅទ្រង់សម្រាប់កម្មវិធីធំៗ។ ត្រង់ចំណុចនេះ ព្រះអង្គម្ចាស់វិជ្ជរ៉ាបានពន្យល់ថា ព្រះមហាក្សត្រជាបុគ្គលមានមានឋានៈខ្ពង់ខ្ពស់ដែលកំពុងសោយរាជ្យ ដូច្នេះ ព្រះអង្គនឹងមិនទ្រង់ឯកសណ្ឋានរបស់បណ្ឌិតសភា ដែលស្ថិតនៅក្រោមការគ្រប់គ្រងរបស់របបសាធារណរដ្ឋនោះទេ។

តាមរយៈការតែងតាំងសមាជិកម្នាក់របស់គ្រួសារព្រះរាជវង្ស ជាសមាជិករបស់បណ្ឌិតសភា ភាគីបារាំងសង្ឃឹមថា ទំនាក់ទំនងកម្ពុជា និងបារាំងកាន់តែជិតស្និទ្ធ។ ជាមួយគ្នានោះ បារាំងសង្ឃឹមថា ព្រះរាជាខ្មែរកាន់តែចូលរួមយ៉ាងសកម្មក្នុងការជួយស្រាវជ្រាវ និងអភិរក្សបេតិកភណ្ឌខ្មែរដ៏សំបូរបែប។

ប្រជាជនខ្មែរ មានមោទនភាពនឹងការផ្តល់ឋានៈដ៏មានកិត្តិយសដល់ព្រះមហាក្សត្ររបស់ពួកគេ។ ប៉ុន្តែនេះ គ្រាន់តែជាដំណាក់កាលដំបូងនៃព្រះរាជកិច្ចរបស់ព្រះករុណាក្នុងបណ្ឌិតសភា។ ព្រះរាជាខ្មែរនៅមានព្រះរាជកិច្ចជាច្រើនទៀតដែលត្រូវធ្វើ ជាពិសេសនៅក្នុងកាលៈទេសៈដែលវប្បធម៌ខ្មែរ នៅជួបប្រទះការលំបាកនៅឡើយ៕