នយោបាយ-សិទ្ធិមនុស្ស

រដ្ឋាភិបាលមិនពេញចិត្តនឹងរបាយការណ៍សិទិ្ធមនុស្សរបស់អាមេរិក

ដោយ ប៉ែន បូណា

អត្ថបទចុះផ្សាយកាលពីថ្ងៃទី 14/03/2010 កែប្រែលើកចុងក្រោយកាលពីថ្ងៃទី 14/03/2010 12:39 ម៉ោងសកល

មន្ត្រីរដ្ឋាភិបាលកម្ពុជាបានបញ្ចេញប្រតិកម្មមិនសប្បាយចិត្តតបទៅនឹងរបាយការណ៍ស្តីពីសិទិ្ធមនុស្សរបស់សហរដ្ឋអាមេរិកដែលបានបង្ហាញពីចំណុចអវិជ្ជមានមួយចំនួនទាក់ទងនឹងការរំលោភសិទ្ធិមនុស្សនៅកម្ពុជា។ របាយការណ៍ប្រចាំឆ្នាំ២០០៩ ដែលចេញផ្សាយដោយរដ្ឋាភិបាលទីក្រុងវ៉ាស៊ីនតោន នៅចុងសប្តាហ៍នេះ បានកត់សម្គាល់អំពីការរឹតត្បិតសេរីភាពបញ្ចេញមតិ ការបណ្តេញពលរដ្ឋចេញពីផ្ទះសម្បែង និងការចាប់បញ្ជូនជនជាតិភាគតិចអ៊ុយហ្គួរត្រឡប់ទៅស្រុកចិនវិញជាដើម។

សូមចុចខាងក្រោមដើម្បីស្តាប់ ៖

បទអន្តរាគមន៍របស់ ប៉ែន បូណា ពីទីក្រុងភ្នំពេញ

14/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោកស្រី Hillary Clinton រដ្ឋមន្ត្រីការបរទេសអាមេរិក ឡើងអានរបាយការណ៍ស្តីពីសិទ្ធិមនុស្សនៅលើពិភពលោកប្រចាំឆ្នាំ ២០០៩
(រូបថត : AFP)

មន្ត្រីរដ្ឋាភិបាលជាច្រើននាក់បានបញ្ចេញប្រតិកម្មជាបន្តបន្ទាប់ដោយសម្តែងការមិនសប្បាយចិត្តចំពោះរបាយការណ៍ ស្តីពីស្ថានភាពសិទ្ធិមនុស្សនៅកម្ពុជាប្រចាំឆ្នាំ២០០៩របស់សហរដ្ឋអាមេរិក។

របាយការណ៍ដែលទើបតែត្រូវបានគេផ្សព្វផ្សាយនៅចុងសប្តាហ៍នេះ បានកត់សម្គាល់អំពីទិដ្ឋភាពពីរបែប ស្តីពីវិស័យសិទ្ធិមនុស្សក្នុងប្រទេសកម្ពុជា។ ទិដ្ឋភាពទី១ របាយការណ៍នេះបានលើកឡើងអំពីចំណុចវិជ្ជមានមួយចំនួនដែលប្រទេសកម្ពុជាបានខិតខំប្រឹងប្រែងធ្វើឲ្យមានការគោរពសិទ្ធិមនុស្ស។ ចំណុចវិជ្ជមានទាំងនោះរួមមានការដាក់ឲ្យអនុវត្តច្បាប់ ស្តីពីការការពារសិទិ្ធជនពិការ ការការពារបានល្អប្រសើរនូវសិទ្ធិជនរងគ្រោះដោយសារការជួញដូរមនុស្ស និងការថយចុះនៃអំពើសម្លាប់មនុស្សតាមទំនើងចិត្ត។ ការថយចុះនេះបានស្តែងឡើងតាមរយៈការប្រកាន់វិន័យបានល្អជាងមុនរបស់មន្ត្រីថ្នាក់ដឹកនាំនៃកងកម្លាំងរក្សាសន្តិសុខ ដោយសារការខិតខំរបស់រដ្ឋាភិបាលក្នុងការបណ្តុះបណ្តាលពួកគេបានល្អ។

យ៉ាងណាក៏ដោយការរំលោភសិទ្ធិមនុស្សនៅកម្ពុជាមិនទាន់ចប់ទេ។ សេរីភាពបញ្ចេញមតិតាមរយៈសារព័ត៌មានត្រូវបានគេរឹតត្បិតដោយសារការប្តឹងផ្តល់ក្រោមបទចោទប្រកាន់អំពីបរិហារកេរ្តិ៍ និងការផ្សព្វផ្សាយព័ត៌មានមិនពិត។ ការចាប់បញ្ជូនជនជាតិភាគតិចអ៊ុយហ្គួរចំនួន២០នាក់ ដែលប៉ុនប៉ងសុំសិទ្ធិជ្រកកោននយោបាយឲ្យត្រឡប់ទៅប្រទេសចិនវិញកាលពីចុងឆ្នាំ២០០៩ ក៏ស្ថិតក្នុងបញ្ជីនៃការរំលោភសិទ្ធិមនុស្សរបស់ទីក្រុងវ៉ាស៊ីនតោនដែរ។ ក្រៅពីនោះរដ្ឋាភិបាលកម្ពុជានៅតែបន្តនយោបាយបណ្តេញពលរដ្ឋក្រីក្រចេញពីភូមិដ្ឋានរបស់ពួកគេ។

ប៉ុន្តែចំណុចដែលបានលើកឡើងក្នុងរបាយការណ៍ទាំងអស់នេះ ត្រូវបានមន្ត្រីរដ្ឋាភិបាលបដិសេធ។ មានមន្ត្រីរដ្ឋាភិបាលយ៉ាងហោចណាស់ក៏៣រូបដែរ ដែលបានបញ្ចេញប្រតិកម្មតបទៅនឹងរបាយការណ៍នេះ គឺលោក កុយ គួង អ្នកនាំពាក្យក្រសួងការបរទេស លោក ឱម យ៉ិនទៀង ប្រធានគណៈកម្មការសិទ្ធិមនុស្សរបស់រដ្ឋាភិបាល និងលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី។

សម្រាប់មន្ត្រីរដ្ឋាភិបាល ការប្តឹងអ្នកកាសែត ឬការចាប់បញ្ជូនជនជាតិអ៊ុយហ្គួរត្រឡប់ទៅស្រុកវិញមិនមែនជាការរំលោភសិទ្ធិមនុស្សទេ ប៉ុន្តែគឺជាការអនុវត្តន៍ច្បាប់របស់ប្រទេសតែប៉ុណ្ណោះ។ មន្ត្រីរដ្ឋាភិបាលទាំងនោះបានស្តីបន្ទោសអ្នកធ្វើរបាយការណ៍ថាបានមើលរំលងបញ្ហាទាំងនេះ។ យ៉ាងណាក៏ដោយ របាយការណ៍នេះត្រូវបានទទួលស្គាល់ដោយអង្គការសង្គមស៊ីវិលនៅកម្ពុជា៕

ទាក់ទងនឹងប្រធានបទនេះ