នយោបាយ

លោក សម រង្ស៊ី គ្រោងនឹងបញ្ចេញឯកសារទាក់ទងព្រំដែនកម្ពុជាវៀតណាមបន្ថែមទៀតនៅក្នុងខែនេះ

ដោយ គី សុខលីម

អត្ថបទចុះផ្សាយកាលពីថ្ងៃទី 14/03/2010 កែប្រែលើកចុងក្រោយកាលពីថ្ងៃទី 14/03/2010 12:37 ម៉ោងសកល

នៅថ្ងៃអាទិត្យនេះលោក សម រង្ស៊ី បានបញ្ជាក់ថាលោកនឹងបញ្ចេញឯកសារទាក់ទងព្រំដែនកម្ពុជាវៀតណាមបន្ថែមទៀតនៅក្នុងខែនេះ។ ឯកសារបន្ថែមនេះ គឺត្រូវបានលោក សម រង្ស៊ី ខ្លួនឯងប្រមូលបានពីអ្នកជំនាញនៅក្នុងប្រទេសបារាំង។

សូមចុចខាងក្រោមដើម្បីស្តាប់ ៖

សេចក្តីរាយការណ៍របស់ គី សុខលីម ពីទីក្រុងភ្នំពេញ

14/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោក សម រង្ស៊ី និងអ្នកភូមិ ថ្ងៃទី ២៥ តុលា ២០០៩
(រូបថត ៖ ម៉េងហួរ/RFI)

លោក សម រង្ស៊ី ប្រធានគណបក្សប្រឆាំងសមរង្ស៊ីគ្រោងនឹងបញ្ចេញឯកសារពាក់ព័ន្ធនឹងព្រំដែនកម្ពុជាវៀតណាមមួយចំនួនបន្ថែមទៀតនៅក្នុងខែនេះ បន្ទាប់ពីលោកបានទំនាក់ទំនងជាមួយអ្នកជំនាញភូមិសាស្ត្រ និងផែនទីនៅក្នុងប្រទេសបារាំងរួចមក។

នេះគឺជាការថ្លែងតាមទូរស័ព្ទរបស់លោក សម រង្ស៊ី ពីទីក្រុងប៉ារីស ប្រទេសបារាំង មកកាន់សមាជិករបស់លោកនៅទីស្នាក់ការកណ្តាលនៅទីក្រុងភ្នំពេញ នៅរសៀលថ្ងៃអាទិត្យនេះ។ លោក សម រង្ស៊ី បានបញ្ជាក់ប្រាប់សមាជិករបស់លោកប្រមាណជាជាង១០០នាក់ថា បើផ្អែកលើសេចក្តីសន្និដ្ឋានរបស់អ្នកជំនាញតំរុយព្រំដែន ដែលលោកបានដកនៅក្នុងស្រុកចន្ទ្រា ខេត្តស្វាយរៀង និងតំរុយបង្គោលព្រំដែនមួយចំនួនផ្សេងទៀតនៅក្បែរនោះ គឺពិតជាស្ថិតនៅក្នុងទឹកដីកម្ពុជាមែន ពោលគឺវាបានបោះចូលក្នុងទឹកដីខ្មែរក្នុងចន្លោះពី៣០០ទៅ៥០០ម៉ែត្រ។

លោក សម រង្ស៊ី បានថ្លែងចោទប្រកាន់ថាបង្គោលទាំងនេះមិនមែនជាបង្គោលព្រំដែនទេ ប៉ុន្តែផ្ទុយទៅវិញវាជាបង្គោលឈ្លានពាន។ លោកប្រធានគណបក្សប្រឆាំង សមរង្ស៊ី ដែលកំពុងស្ថិតនៅក្នុងប្រទេសបារាំងបានបន្តទៀតថា នៅដំណាច់ចុងខែនេះ ប្រជាជនខ្មែរនឹងដឹងថា តើនរណាជាអ្នកស្នេហាជាតិពិតប្រាកដនោះ?

លោក វ៉ា គឹមហុង មន្រ្តីជាន់ខ្ពស់នៃរាជរដ្ឋាភិបាលកម្ពុជាទទួលបន្ទុកកិច្ចការព្រំដែនបានថ្លែងបកទៅកាន់លោក សម រង្ស៊ី នៅថ្ងៃអាទិត្យនេះវិញថា ប្រសិនបើលោក សម រង្ស៊ី មានឯកសារថ្មីៗទាក់ទងនឹងបញ្ហាព្រំដែននេះមែន គឺជាការល្អហើយ លោក សម រង្ស៊ី អាចបង្ហាញឯកសារទាំងនេះទៅកាន់តុលាការតែម្តងទៅ។

សូមបញ្ជាក់ថា ការថ្លែងរបស់លោក សម រង្ស៊ី នៅថ្ងៃអាទិត្យនេះបានធ្វើឡើងតែពីរថ្ងៃប៉ុណ្ណោះ បន្ទាប់ពីតុលាការក្រុងភ្នំពេញបានចោទប្រកាន់រូបលោកកាលពីថ្ងៃសុក្រកន្លងមក ពីបទផ្សព្វផ្សាយព័ត៌មានមិនពិត និងពីបទក្លែងបន្លំឯកសារសាធារណៈទាក់ទងទៅនឹងបញ្ហាព្រំដែន។

កាលពីប៉ុន្មានខែមុននេះ លោក សម រង្ស៊ី ក៏ត្រូវបានតុលាការខេត្តស្វាយរៀងកាត់ទោសអោយជាប់ពន្ធនាគាររយៈពេល២ឆ្នាំពីបទបំផ្លិចបំផ្លាញទ្រព្យសម្បត្តិសាធារណៈ និងពីបទញ៉ុះញ៉ុងអោយមានការរើសអើងពូជសាសន៍ ទាក់ទងទៅនឹងការដកតំរុយព្រំដែនកម្ពុជាវៀតណាមនៅក្នុងខេត្តស្វាយរៀង កាលពីខែតុលាឆ្នាំ២០០៩កន្លងមក៕