កម្ពុជា-ថៃ

ហ៊ុន សែនបញ្ជាមិនអោយខ្មែរចល័តទ័ពពេលនេះ

ដោយ លាង ដឺលុច

អត្ថបទចុះផ្សាយកាលពីថ្ងៃទី 15/03/2010 កែប្រែលើកចុងក្រោយកាលពីថ្ងៃទី 15/03/2010 14:09 ម៉ោងសកល

ចំពេលដែលក្រុមជនថៃអាវក្រហមកំពុងធ្វើបាតុកម្មទ្រង់ទ្រាយធំនៅកណ្តាលទីក្រុងបាងកកដើម្បីទាមទារអោយរដ្ឋាភិបាលថៃបច្ចុប្បន្នរំលាយសភាបោះឆ្នោតឡើងវិញនោះ ប្រមុខរដ្ឋាភិបាលកម្ពុជាបានដាក់បញ្ជាមួយចំនួនដល់កងទ័ពខ្មែរ មិនអោយបង្កើតអស្ថេរភាពនៅតាមព្រំដែននោះឡើយ។ នេះគឺដើម្បីបង្ហាញពីភាពថ្លៃថ្នូររបស់កម្ពុជា។

បទអន្តរាគមន៍របស់លាង ដឺលុច ពីទីក្រុងភ្នំពេញ

15/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោកនាយករដ្ឋមន្ត្រីខ្មែរ ហ៊ុនសែននិងលោកនាយករដ្ឋមន្ត្រីថៃអភិសីទ

បញ្ជារបស់នាយករដ្ឋមន្ត្រីខ្មែរមាន៣ចំណុច ហើយមានពាក់ព័ន្ធដល់ពលរដ្ឋខ្មែរស៊ីវិលដែលកំពុងប្រកបរបររកស៊ីនៅលើទឹកដីថៃនោះផង។ បទបញ្ជាទីមួយ គឺសំដៅចំពោះកងប្រដាប់អាវុធទាំងអស់ដែលកំពុងឈជើងនៅតាមតំបន់ព្រំដែន និងអាជ្ញាធរដែនដីដែលនៅជាប់នឹងព្រំដែនជាមួយប្រទេសថៃ គឺសូមអោយពួកគេបង្កើនទំនាក់ទំនងល្អជាមួយកងទ័ព និងរដ្ឋបាលដែនដីរបស់ថៃ។ បញ្ជាទី២ ពាក់ព័ន្ធនឹងកងទ័ពដដែល គឺលោកនាយករដ្ឋមន្ត្រីបញ្ជាមិនអោយធ្វើការចល័តទ័ពនោះទេ បើគ្មានការចាំបាច់ ដូចជាការផ្លាស់ប្តូរកំលាំងជាដើម។ ការហាមមិនអោយកងទ័ពខ្មែរចល័តកំលាំងយ៉ាងដូច្នេះ ត្រូវបានលោកនាយករដ្ឋមន្ត្រីពន្យល់ថា គឺដើម្បីកុំអោយខាងប្រទេសថៃចោទកម្ពុជាថា កម្ពុជាឆ្លៀតឱកាស ដណ្តើមកាន់កាប់កន្លែងនេះ ឬកន្លែងនោះ ឬបង្ករអស្ថេភាពនៅតាមព្រំដែន នៅពេលដែលទីក្រុងបាងកកកំពុងវឹកវរ ចលាចលនោះ។

បញ្ជាទី៣នោះ គឺជាការណែនាំដល់ពលរដ្ឋខ្មែរដែលកំពុងធ្វើការនៅលើទឹកដីថៃ។ លោកនាយករដ្ឋមន្ត្រីហ៊ុន សែនអំពាវនាវមិនអោយពលរដ្ឋខ្មែរទាំងនោះចូលរួមក្នុងបាតុកម្មរបស់ក្រុមថៃអាវក្រហមឡើយ។ ព្រោះថានេះជាការខុសច្បាប់។ ការអំពាវនាវហាមប្រាមយ៉ាងដូច្នេះ បើតាមលោកនាយករដ្ឋមន្ត្រី គឺដើម្បីចៀសវាងពីការចោទប្រកាន់ពីខាងរដ្ឋាភិបាលថៃផង ដែលកន្លងមក ធ្លាប់បានលើកឡើងថាមានជនបរទេសចូលរួមធ្វើបាតុកម្មនៅក្នុងប្រទេសថៃ។ បើទោះអាជ្ញាធរថៃមិនបាននិយាយចំថា ជាជនបរទេសណាក៏ដោយ តែលោក ហ៊ុន សែនគ្រាន់តែមិនចង់អោយមានបញ្ហាកើតឡើងលើពលរដ្ឋខ្មែរតែប៉ុណ្ណោះ ហើយម្យ៉ាងវិញទៀតនោះ លោក នាយករដ្ឋមន្ត្រីបញ្ជាក់ថា បញ្ហាបាតុកម្មសព្វថ្ងៃនេះ គឺជារឿងរបស់ប្រជាពលរដ្ឋថៃទេ គឺមិនមានអ្វីពាក់ព័ន្ធនឹងកម្ពុជានោះឡើយ។

លោកនាយករដ្ឋមន្ត្រីបានអះអាងថា បញ្ហាលោកថាក់ស៊ីននៅស្រុកខ្មែរ ឬមិននៅស្រុកខ្មែរទាល់តែលោកចេញមុខប្រកាសទើបគេអស់ចិត្ត។ ហើយកាលពីព្រឹកមិញនេះ គឺលោក ហ៊ុន សែនបានបញ្ជាក់ថា លោកថាក់ស៊ីនអត់មាននៅកម្ពុជាទេ។ លោកបន្តថា កម្ពុជាមិនត្រូវការលាក់លៀមព័ត៌មាននេះទេ។ បើថាក់ស៊ីនមកកម្ពុជា នោះកម្ពុជានឹងបញ្ចាំងផ្សព្វផ្សាយតែម្តង ដូចកម្ពុជាធ្លាប់បានធ្វើ។ និយាយដល់ត្រង់នេះ លោកនាយករដ្ឋមន្ត្រីនៅបន្តរិះគន់ សើចចំអកដល់ចារកម្មថៃនៅកម្ពុជា ដែលតែងតែផ្តល់ព័ត៌មានខុសអំពីវត្តមានរបស់លោកថាក់ស៊ីននៅកម្ពុជា។