សង្គម

ក្រុមស្ត្រីរកស៊ីផ្លូវភេទ បន្តទាមទារកន្លែងស្របច្បាប់ នៅក្នុងសង្គម

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 16/03/2010 កែប្រែលើកចុងក្រោយកាលពីថ្ងៃទី 16/03/2010 14:18 ម៉ោងសកល

ក្រុមស្ត្រីអ្នករកស៊ីផ្លូវភេទ ដោយស្ម័គ្រចិត្ត បានអំពាវនាវជាថ្មី នៅថ្ងៃអង្គារនេះ ដើម្បីរកទីកន្លែងស្របច្បាប់ណាមួយ សម្រាប់ពួកគេប្រកបរបរចិញ្ចឹមជីវិត។ ការអំពាវនាវនេះ បានធ្វើឡើង ចំពេលដែលអាជ្ញាធរកម្ពុជា បើកយុទ្ធនាការបង្ក្រាប បិទបនពេស្យា ក្លឹបកំសាន្ត និងហាងម៉ាស្សា ខារ៉ាអូខេ ស្របតាមបទបញ្ជារបស់លោកនាយករដ្ឋមន្ត្រី ហ៊ុន សែន។

សូមចុចខាងក្រោមដើម្បីស្តាប់ ៖

បទអន្តរាគមន៍របស់ លី ម៉េងហួរ ពីទីក្រុងភ្នំពេញ

16/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ក្រុមស្រ្តីរកស៊ីផ្លូវភេទនៅកម្ពុជា

ជាថ្មីម្តងទៀត នៅព្រឹកថ្ងៃអង្គារនេះ តំណាងស្ត្រីរកស៊ីផ្លូវភេទ អ្នកស្រី កែវ ថា បានអំពាវនាវយ៉ាងទទូច សុំឲ្យអាជ្ញាធរ មានសមត្ថកិច្ច ធ្វើការបង្ក្រាប និងចាប់ខ្លួនតែថៅកែ មេបន ដែលប្រកបរបរជួញដូរផ្លូវភេទ ប៉ុន្តែអាជ្ញាធរ មិនត្រូវចាប់ខ្លួន ក្រុមស្ត្រីរកស៊ីផ្លូវភេទ ដែលពួកគេអះអាងថា ក្រុមស្ត្រីទាំងនោះ បានចាប់យកអាជីព ជាអ្នកបម្រើផ្លូវភេទ ដោយស្ម័គ្រចិត្តនោះទេ។

ស្ត្រីរកស៊ីផ្លូវភេទភាគច្រើន បានប្រកបរបរ នាពេលរាត្រី នៅតាមសួនច្បារសាធារណៈ ដូចជា នៅវត្តភ្នំ និងអ្នកខ្លះទៀត រកស៊ីនៅតាមហាងខារ៉ាអូខេ និងហាងកាហ្វេ ជាដើម។ ស្ត្រីទាំងនោះ អះអាងថា មុខរបរជាអ្នករកស៊ីផ្លូវភេទ គឺជាមុខរបរសុច្ចរិត ដើម្បីរកចំណូលចិញ្ចឹមជីវិត ចិញ្ចឹមក្រុមគ្រួសារ និងចិញ្ចឹមកូនប៉ុណ្ណោះ។ ពួកគេអះអាងថា មិនបង្កបញ្ហាអ្វីដល់សង្គមទេ។

តំណាងស្ត្រីរកស៊ីផ្លូវភេទ អ្នកស្រី កែវ ថា បានបន្ថែមថា ចាប់តាំងពីអាជ្ញាធរប៉ូលិស បង្ក្រាប និងបិទផ្ទះបនស្រី ព្រមទាំងចាប់ខ្លួនក្រុមស្ត្រីអ្នករកស៊ីផ្លូវភេទតាមផ្លូវសាធារណៈ មកទល់ពេលនេះ មានអ្នករកស៊ីផ្លូវភេទប្រហែលជា ៥០% ត្រូវបាត់បង់មុខរបរ និងមិនអាចមានចំណូល សម្រាប់ចិញ្ចឹមគ្រួសារ ដូចកាលពីមុនឡើយ ជាពិសេសកូនៗរបស់ពួកគេ មិនបានទៅសាលារៀនទេ។

ជាទូទៅ មិនមានតួលេខជាក់លាក់ អំពីចំនួនស្ត្រីរកស៊ីផ្លូវភេទ ក្នុងប្រទេសកម្ពុជាទេ។ ប៉ុន្តែតំណាងក្រុមស្ត្រីរកស៊ីផ្លូវភេទ បានអះអាងថា បច្ចុប្បន្នសមាគម ដែលបង្កើតឡើងដោយអ្នករកស៊ីផ្លូវភេទ ដែលមានឈ្មោះថា បណ្តាញការងារស្ត្រីរួបរួមគ្នា មានសមាជិកជាស្ត្រីរកស៊ីផ្លូវភេទ និងសេវាកំសាន្ត ជាង ៥០០០ នាក់ នៅភ្នំពេញ និង១៤ ខេត្តផ្សេងទៀត។

ក្រុមស្ត្រីទាំងនោះ បញ្ជាក់ថា មិនមែនពួកគេសប្បាយនឹងមុខរបរនេះទេ ប៉ុន្តែដោយសារមិនមានការងារធ្វើ ដើម្បីចិញ្ចឹមជីវិត ទើបចាប់យកអាជីពផ្លូវភេទ។

ចំពោះមុខការអំពាវនាវនេះ រដ្ឋាភិបាល តាមរយៈលោកឧត្តមសេនីយ៍ ខៀវ សុភ័ក្ត្រ អ្នកនាំពាក្យក្រសួងមហាផ្ទៃ បានលើកឡើងថា សកម្មភាពបង្ក្រាបផ្ទះបនពេស្យា និងបិទហាងម៉ាស្សាខារ៉ាអូខេ ដែលប្រកបរបរផ្លូវភេទ គឺអាជ្ញាធរ គ្រាន់តែអនុវត្តតាមច្បាប់ ព្រោះថា ការបើកបនពេស្យា ជាមុខរបរខុសច្បាប់ ដែលនាំឲ្យអាប់អោនដល់សង្គមជាតិ និងជាពិសេសអាប់អោនដល់កិត្តិយសរបស់អ្នកប្រកបរបរផ្លូវភេទនោះផង។

លោកឧត្តមសេនីយ៍ បានអំពាវនាវឲ្យក្រុមស្ត្រីអ្នករកស៊ីផ្លូវភេទ ទៅរករបរផ្សេងវិញប្រសើរជាង។ អាជ្ញាធរប៉ូលិសក្រសួងមហាផ្ទៃ ក៏នឹងអនុវត្តជាប្រចាំ គឺបិទបនពេស្យា ហើយមេបន ត្រូវទទួលខុសត្រូវមុនគេ ដោយត្រូវផ្តន្ទាទោស ជាប់ពិរុទ្ធតាមច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ត្រូវជាប់ពន្ធនាគារពី ពីរឆ្នាំ ទៅ ប្រាំឆ្នាំ។

លោកឧត្តមសេនីយ៍ បានបន្ថែមថា យុទ្ធនាការបង្ក្រាបផ្ទះបនពេស្យា និងក្លឹបកំសាន្ត ដែលមានការរកស៊ីផ្លូវភេទនៅពីក្រោយ បានធ្វើឡើងស្របតាមច្បាប់ និងបទបញ្ជារបស់លោកនាយករដ្ឋមន្ត្រី ហ៊ុន សែន កាលពីដើមខែមីនានេះ៕