ជនជាតិភាគតិច

អសបស្នើឱ្យកម្ពុជាបញ្ឈប់ការយកដីព្រៃភ្នំផ្តល់សម្បទានសេដ្ឋកិច្ចដល់ក្រុមហ៊ុន

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 17/03/2010 កែប្រែលើកចុងក្រោយកាលពីថ្ងៃទី 17/03/2010 12:42 ម៉ោងសកល

គណៈកម្មការទទួលបន្ទុកអនុសញ្ញាអន្តរជាតិ ស្តីពី លុបបំបាត់ការរើសអើងពូជសាសន៍ របស់អង្គការសហប្រជាជាតិបានដាក់សំណើមួយទៅកាន់រដ្ឋាភិបាលកម្ពុជា ដើម្បីសុំឲ្យបញ្ឈប់ការយកដីព្រៃភ្នំរបស់សហគមន៍ជនជាតិភាគតិ និងបញ្ឈប់ផ្តល់សម្បទាន ទៅឲ្យក្រុមហ៊ុនឯកជនវិនិយោគ។

សូមចុចខាងក្រោមនេះដើម្បីស្តាប់៖

សេចក្តីរាយការណ៍របស់លី ម៉េងហួរពីទីក្រុងភ្នំពេញ

17/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ទេសភាពទឹកធ្លាក់ក្នុងខេត្តមណ្ឌលគិរី
(រូបថត៖រក្សាសិទ្ធិ)

អនុសាសន៍ជាច្រើនចំណុច ត្រូវបានក្រុមអង្គការការពារសិទ្ធិជនជាតិភាគតិច និងគណៈកម្មការទទួលបន្ទុកអនុសញ្ញាអន្តរជាតិ ស្តីពី ការលុបបំបាត់ការរើសអើងពូជសាសន៍អង្គការសហប្រជាជាតិ ICERD ដាក់ទៅកាន់លោកនាយករដ្ឋមន្ត្រី ហ៊ុន សែន និងមន្ត្រីរដ្ឋាភិបាលកម្ពុជា នៅថ្ងៃទី ១៧ ខែ មីនា ឆ្នាំ ២០១០។

ក្នុងកិច្ចការការពារសិទ្ធិជនជាតិដើមភាគតិច នៅកម្ពុជា នាពេលនេះ អង្គការសហប្រជាជាតិបានស្នើឲ្យរដ្ឋាភិបាលត្រូវចុះបញ្ជីដីធ្លីដល់ជនជាតិដើមភាគតិច ពិសេសត្រូវផ្អាកជាបណ្តោះអាសន្ននូវសម្បទានដីព្រៃភ្នំ ដើម្បីក្រុមហ៊ុនឯកជនវិនិយោគទេសចរណ៍ និងធ្វើអាជីវកម្មរ៉ែ។ រដ្ឋាភិបាលក៏ត្រូវបញ្ឈប់នូវរាល់គម្រោងអភិវឌ្ឍន៍ទ្រង់ទ្រាយធំៗ ដូចជា ទំនប់វារីអគ្គិសនីធំៗ និងផ្លូវធំៗ នៅក្នុងតំបន់ជនជាតិដើមភាគតិចជាដើម។

ជនជាតិភាគតិចក្នុងប្រទេសកម្ពុជា
(រូបថត៖រក្សាសិទ្ធិ)

គម្រោងអភិវឌ្ឍន៍ និងការផ្តល់ដីសម្បទានដល់ក្រុមហ៊ុនឯកជននានា នៅតំបន់ព្រៃភ្នំ បានរំលោភបំពានទៅលើសិទ្ធិជាសមូហភាពនៃជនជាតិដើមភាគតិច បំផ្លិចបំផ្លាញនូវវប្បធម៌ជនជាតិភាគតិច ជាពិសេសប៉ះពាល់ដល់ដីកប់ខ្មោចដូនតា និងបាត់បង់មុខរបររបស់ពួកគេ ក្នុងការរុករកអនុផលព្រៃឈើ។ នេះបើតាមការអះអាងរបស់តំណាងក្រុមសហគមន៍ជនជាតិដើមភាគតិច។

ក្នុងសន្និសីទកាសែតនៅព្រឹកមិញ លោក ឈិត សំអាត ប្រធានអង្គការ NGOs Forum បានលើកឡើងថា បញ្ហាជនជាតិភាគតិច នៅកម្ពុជា ជាបញ្ហាក្តៅកគុកកំពុងត្រូវបានក្រុមហ៊ុន និងជនមានអំណាចមួយចំនួន នៅតាមបណ្តាខេត្តភាគឥសាន និងនៅភ្នំឱរ៉ាល់ខេត្តកំពង់ស្ពឺ រំលោភយកដីសហគមន៍របស់ពួកគេ ដោយគ្មានការពិគ្រោះយោបល់ ធ្វើឲ្យប៉ះពាល់ដល់ប្រពៃណី វប្បធម៌របស់ជនជាតិភាគតិចទាំងនោះ។

ក៏ប៉ុន្តែលោក ខៀវ កាញារីទ្ធ អ្នកនាំពាក្យរដ្ឋាភិបាល បានលើកឡើងថា ការផ្តល់ដីសម្បទានសេដ្ឋកិច្ចដល់ក្រុមហ៊ុនកន្លងមក បានកំណត់មិនឲ្យប៉ះពាល់ដល់ដីព្រៃអារក្សអ្នកតា និងដីកប់ខ្មោចដូនតារបស់ជនជាតិភាគតិចទេ។ ម្យ៉ាងទៀត ការផ្តល់ដីសម្បទានដើម្បីវិនិយោគនេះ ក៏ដើម្បីបង្កើតមុខរបរថ្មី ជំនួសមុខរបរដូនតារបស់ជនជាតិភាគតិចផងដែរ៕

ទាក់ទងនឹងប្រធានបទនេះ