នយោបាយ

គណបក្សសម រង្ស៊ីចាប់ផ្តើមសិក្សាចំណុចខ្សោយ និងចំនុចខ្លាំងនៃវិស័យអាទិភាព

ដោយ គី សុខលីម

អត្ថបទចុះផ្សាយកាលពីថ្ងៃទី 20/03/2010 កែប្រែលើកចុងក្រោយកាលពីថ្ងៃទី 20/03/2010 13:54 ម៉ោងសកល

គណបក្សសម រង្ស៊ីចាប់ផ្តើមសិក្សា ចំណុចខ្សោយ និង ចំណុចខ្លាំងនៃវិស័យអាទិភាពមួយចំនួនដែលកំពុងដឹកនាំដោយគណបក្សប្រជាជនកម្ពុជា។ វិស័យដែលគណបក្សសម រង្ស៊ីចាប់ផ្តើមសិក្សាមុនគេ គឺវិស័យកសិកម្ម បន្ទាប់មកអាចវិស័យសុខាភិបាល និងវិស័យអប់រំ។

បទអន្តរាគមន៍របស់គី សុខលីមពីទីក្រុងភ្នំពេញ

20/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

គណបក្សសម រង្ស៊ី ជួបនឹងគណៈប្រតិភូសភាពអឺរ៉ុប
(រូបថត៖ គណបក្សសម រង្ស៊ី)

គណបក្សសម រង្ស៊ីបានសម្រេចសិក្សាចំណុចខ្សោយ និងចំណុចខ្លាំងនៃវិស័យអាទិភាពមួយចំនួនរបស់រាជរដ្ឋាភិបាល តាំងពីឆ្នាំ២០០៩មកម្ល៉េះ ប៉ុន្តែសកម្មភាពពេញទំហឹងទើបចាប់ផ្តើមផុសផុល នៅឆ្នាំ២០១០នេះ។ លោកសុន ឆ័យ ប្រធានក្រុមតំណាងរាស្រ្តគណបក្សសម រង្ស៊ីបាននិយាយប្រាប់ នៅថ្ងៃអាទិត្យនេះថា ក្រុមតំណាងរាស្រ្តគណបក្សសម រង្ស៊ី ចាប់ពីពេលនេះទៅនឹងសិក្សារកចំណុចខ្សោយ និងចំណុចខ្លាំងទៅលើវិស័យអាទិភាពមួយចំនួនដូចជា៖ វិស័យកសិកម្ម វិស័យសុខាភិបាល វិស័យអប់រំ និងវិស័យចំនួនផ្សេងទៀត។

លោកសុន ឆ័យ តំណាងរាស្រ្តគណបក្សសម រង្ស៊ីបានពន្យល់ថា ការសិក្សានេះមានគោលបំណងបីយ៉ាង។

ទី១៖ គឺដើម្បីរៀបចំគោលនយោបាយរបស់គណបក្សសម រង្ស៊ី នៅពេលគណបក្សឈ្នះឆ្នោតហើយ ត្រូវឡើងកាន់អំណាច នាពេលអនាគត។ ទីពីរ៖ គណបក្សសម រង្ស៊ីនឹងផ្តល់អនុសាសន៍ជូនដល់រដ្ឋាភិបាលនូវចំណុចខ្វះខាតរបស់រដ្ឋាភិបាល និងអ្វីជាតម្រូវការ ឬជាការប្រឈមរបស់ប្រជាជន នៅថ្នាក់មូលដ្ឋាន។ ទីបី៖ គណបក្សប្រឆាំងអាចធ្វើសេចក្តីស្នើច្បាប់ទាក់ទងទៅនឹងបញ្ហាអ្វីមួយ ប្រសិនបើចាំបាច់ បន្ទាប់ពីទទួលបានទិន្នន័យពីការស្រាវជ្រាវច្បាស់លាស់។

លោកសុន ឆ័យ តំណាងរាស្រ្តគណបក្សសម រង្ស៊ីបានបញ្ជាក់ថា ការសិក្សាភាគច្រើនត្រូវធ្វើឡើងជាមួយប្រជាជនតាមរយៈការធ្វើវេទិកាសាធារណៈ ឬតាមរយៈសមាជិកក្រុមប្រឹក្សាឃុំស្រុកខេត្តរបស់គណបក្សសម រង្ស៊ីដែលនៅជិតសិ្នទ្ធជាមួយនឹងប្រជាជន។ លោកសុន ឆ័យបានបញ្ជាក់ថា បន្ទាប់ពីទទួលបានព័ត៌មានគ្រប់គ្រាន់ហើយ ក្រុមការងាររបស់លោកនឹងជជែកគ្នាជាមួយអ្នកជំនាញ។

លោកសុន ឆ័យបានពន្យល់ទៀតថា ក្រុមការងាររបស់លោកបាន និងកំពុងសិក្សាស្រាវជ្រាវលើវិស័យកសិកម្ម ពីព្រោះវិស័យនេះមានសារៈសំខាន់ណាស់សម្រាប់ជីវិតរបស់ប្រជាជនខ្មែរ។ ការសិក្សានឹងបញ្ចប់ទាំងស្រុង នៅក្នុងខែមិថុនាខាងមុខនេះ។ តាមរយៈការសិក្សាស្រាវជ្រាវនេះ លោកសុនឆ័យបាននិយាយថា ប្រជាកសិករខ្មែរកំពុងជួបប្រទះនឹងបញ្ហាបីយ៉ាងធំៗ។ ទីមួយ៖ ប្រជាកសិករជាច្រើននាក់អត់ដីធ្វើស្រែរចម្ការ។ ទីពីរ៖ ប្រជាកសិករប្រឈមនឹងការចំណាយច្រើនលើផលិតកម្មរបស់ខ្លួន តាមរយៈការទិញជី ប្រេង។ល។ និងចំនុចទីបី៖ ប្រជាកសិករពិបាករកទីផ្សារលក់ផលិតផល។

បន្ទាប់ពីការសិក្សាលើវិស័យកសិកម្មរួចហើយ លោកសុខឆ័យ ប្រធានក្រុមតំណាងរាស្រ្តគណបក្សសម រង្ស៊ីបាននិយាយថា គណបក្សនឹងជួបប្រជុំគ្នាដើម្បីសម្រេចថា តើពួកគេត្រូវសិក្សាលើវិស័យសុខាភិបាល ឬសិក្សាលើជីវភាពរបស់ប្រជាជនទូទៅ។ ការសិក្សាលើជីវភាពរបស់ប្រជាជនត្រូវបានលោកសុនឆ័យពន្យល់ថា គឺក្នុងគោលបំណងរៀបចំសេចក្តីស្នើច្បាប់មួយស្តីពីប្រាក់បៀវត្សរ៍អប្បបរមាសម្រាប់ប្រជាជនខ្មែរ៕