ប្រទេសក្រិក

តើFMIនឹងជួយសង្គ្រោះប្រទេសក្រិក ឬទេ?

ដោយ វីនស្តុន រតនា

អត្ថបទចុះផ្សាយកាលពីថ្ងៃទី 20/03/2010 កែប្រែលើកចុងក្រោយកាលពីថ្ងៃទី 20/03/2010 14:52 ម៉ោងសកល

ការអំពាវនាវរបស់ប្រទេសក្រិកទៅកាន់មូលនិធិរូបិយវត្ថុអន្តរជាតិហៅកាត់ថា FMI ដើម្បីដោះស្រាយបញ្ហាហិរញ្ញវត្ថុរបស់ខ្លួនលែងជាប្រធានបទដែលគេពុំត្រូវនិយាយទៀតឡើយ។ ប្រទេសហ្វាំងឡង់ ហូឡង់ និងអាល្លឺម៉ង់ព្រមទទួលយកជម្រើសនេះ ហើយនៅថ្ងៃសុក្រម្សិលមិញ សូម្បីតែប្រធានគណៈកម្មការអឺរ៉ូបក៏ទំនងជាគាំទ្រសម្មតិកម្មនេះដែរ។ ជនជាតិអឺរ៉ូបជាច្រើនគាំទ្រគំនិតនេះ ប៉ុន្តែក្នុងចំណោមដៃគូនៃមណ្ឌលចាយប្រាក់អឺរ៉ូ ក៏មានទាំងគោលជំហរខ្វែងគ្នាដែរ។

សេចក្តីរាយការណ៍របស់វីនស្តុន រតនា

20/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

នាយករដ្ឋមន្រ្តីក្រិក Papandreouក្រឡេកមើលប្រធានសភាអឺរ៉ុប លោកBuzek
(រូបថត៖reuters)

ជម្រើសរបស់ប្រទេសក្រិកអំពាវនាវទៅកាន់មូលនិធិរូបិយវត្ថុអន្តរជាតិ FMI ទើបនឹងទទួលបានការគាំទ្រមួយដ៏មានទម្ងន់។ អ្នកនាំពាក្យរបស់រដ្ឋាភិបាលអាល្លឺម៉ង់ បានថ្លែងថា គេពុំបដិសេធទេការគាំទ្រនេះ ប្រសិនបើការនេះក្លាយទៅជាការចាំបាច់។

លោកប្រធានគណៈកម្មការអឺរ៉ូប José Manuel Barroso យល់ការអំពាវនាវទៅកាន់ មូលនិធិរូបិយវត្ថុអន្តរជាតិ FMI ប្រសិនបើជាមធ្យោបាយដ៏ប្រសើរបំផុតដើម្បីឆ្លើយតបចំពោះវិបត្តិនៅប្រទេសក្រិក។ សមាជិកដទៃទៀតនៃមណ្ឌលចាយប្រាក់អឺរ៉ូ ក៏មានគោលជំហរដូចគ្នានេះដែរ ដូចយ៉ាងប្រទេសហូឡង់ ហ្វាំងឡង់ និងអ៊ីតាលីជាដើម។

ដោយក្តៅក្រហាយក្រេវក្រោធនឹងដំណើរយឺតយ៉ាវរបស់បណ្ដាដៃគូខ្លួននៃមណ្ឌលចាយប្រាក់អឺរ៉ូ ក្នុងការជួយខ្លួនជាយថាហេតុ លោកនាយករដ្ឋមន្រ្តីក្រិក Geoges Papandréou បានគំរាមថានឹងងាកបែរទៅពឹងពាក់ FMI វិញ។ អ្នកខ្លះទំនងជាជឿតាមសំដីគាត់។

ប៉ុន្តែមុនពេលនេះបន្តិច ជនជាតិអឺរ៉ូបបានយល់ឃើញថា ជាកិត្យានុភាពនៃរូបិយវត្ថុអ៊ឺរ៉ុបតែមួយគត់ក្នុងការដោះស្រាយបញ្ហាវិបត្តិនៅប្រទេសក្រិកនៅក្នុងផ្ទៃសហភាពអឺរ៉ុប។ នេះជាគោលជំហររបស់លោក Jean-Claude Juncker ជាប្រធានក្រុមប្រទេសជាដៃគូមណ្ឌលចាយប្រាក់អឺរ៉ូ នឹងក៏ជាគោលជំហររបស់លោកប្រធានាធិបតីបារាំង នីកូឡាសាកូហ្ស៊ីផងដែរ។ ប៉ុន្តែ ពេលវេលានៅខើចណាស់ គេត្រូវតែខំចាត់ការជាបន្ទាន់ ដ្បិតប្រទេសក្រិកត្រូវតែរកឲ្យបានប្រាក់២ ម៉ឺនលានអឺរ៉ូចាប់ពីឥឡូវនេះ រហូតដល់ចប់ខែឧសភាខាងមុខនេះ៕

ទាក់ទងនឹងប្រធានបទនេះ