អាពាហ៍ពិពាហ៍

អាពាហ៍ពិពាហ៍រវាងជនជាតិខ្មែរ និងជនជាតិកូរ៉េត្រូវផ្អាកបណ្តោះអាសន្ន

ដោយ គី សុខលីម

អត្ថបទចុះផ្សាយកាលពីថ្ងៃទី 21/03/2010 កែប្រែលើកចុងក្រោយកាលពីថ្ងៃទី 21/03/2010 11:57 ម៉ោងសកល

ចំណងស្នេហ៍រវាងជនជាតិខ្មែរ និងជនជាតិកូរ៉េខាងត្បូងត្រូវបានប្រកាសអោយផ្អាកបណ្តោះអាសន្ន។ ការផ្អាកនេះ គឺបានធ្វើឡើងបន្ទាប់ពីមានការជួញដូរមនុស្ស តាមរយៈការរៀបអាពាហ៍ពិពាហ៍ក្លែងក្លាយ។

សេចក្តីរាយការណ៍របស់គី សុខលីមពីទីក្រុងភ្នំពេញ

21/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

បុរសកូរ៉េស្វែងរកភរិយានៅក្នុងប្រទេសអាស៊ី ដូចជានៅវៀតណាម ឬ កម្ពុជា
(រូបថត៖រក្សាសិទ្ធិ)

ក្រសួងការបរទេសខ្មែរ តាមរយៈលោកកុយ គួង អ្នកនាំពាក្យនៃស្ថាប័ននេះបានប្រកាសអោយដឹងថ ចាប់ពីពេលនេះតទៅ ការរៀបអាពាហ៍ពិពាហ៍រវាងជនជាតិខ្មែរ និងជនជាតិកូរ៉េខាងត្បូងត្រូវបានសម្រេចអោយផ្អាកជាបណ្តោះអាសន្នមួយរយៈសិន។

ក្រសួងការបរទេសខ្មែរបានផ្ញើកំណត់ទូតទាក់ទងទៅនឹងការសុំផ្អាកនេះទៅ ស្ថានទូតកូរ៉េខាងត្បូងប្រចាំ នៅកម្ពុជារួចហើយ កាលពីដើមខែមីនាកន្លងមកនេះ។

ការសម្រេចផ្អាកនេះ គឺត្រូវបានធ្វើឡើង បន្ទាប់ពីអាជ្ញាធរនៃប្រទេសកម្ពុជាបានឃាត់ខ្លួនស្រ្តីជាមេអណ្តើកម្នាក់ដែលបាននាំស្រ្តីវ័យក្មេងជនជាតិខ្មែរ ២៥នាក់ពីជនបទមកដាក់លក់អោយរៀបការ ជាមួយបុរសជនជាតិកូរ៉េខាងត្បូង កាលពីចុងឆ្នាំ២០០៩កន្លងមក។ ក្រោយពីការចាប់ខ្លួន ស្រ្តីជាមេអណ្តើករូបនោះត្រូវបានតុលាការកាត់ទោសអោយជាប់ពន្ធនាគារ រយៈពេល ១០ឆ្នាំពីបទជួញដូរស្រ្តី កាលពីដើមខែមីនាកន្លងមកនេះ។

លោកកុយ គួង អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជាបានបញ្ជាក់ នៅថ្ងៃអាទិត្យនេះថា ការព្យួរបណ្តោះអាសន្ននៃចំណងអាពាហ៍ពិពាហ៍រវាងជនជាតិខ្មែរ និងជនជាតិកូរ៉េខាងត្បូង នៅពេលនេះ គឺដើម្បីបើកផ្លូវអោយមានការត្រួតពិនិត្យនីតិវិធីមួយចំនួនឡើងវិញ ក្នុងការផ្តល់សិទ្ធិរៀបអាពាហ៍ពិពាហ៍ និងដើម្បីរួមចំណែកក្នុងការទប់ស្កាត់ការជួញដូរមនុស្ស។

អ្នកនាំពាក្យក្រសួងការបរទេសរូបនេះបានបញ្ជាក់ទៀតថា បទបញ្ជានេះ គឺធ្វើឡើងសម្រាប់តែជាមួយប្រទេសកូរ៉េខាងត្បូងមួយប៉ុណ្ណោះ រីឯទាក់ទងទៅនឹងសំនួរដែលសួរថា តើការផ្អាកនេះនឹងមានរយៈពេលឆាប់ ឬក៏យូរនោះ លោកកុយ គួង អ្នកនាំពាក្យក្រសួងការបរទេសមិនទាន់អាចបញ្ជាក់បាននៅឡើយទេ។

ក្នុងរយៈពេលប៉ុន្មានឆ្នាំចុងក្រោយនេះ ស្រ្តីខ្មែរមួយចំនួន ជាពិសេស មកពីគ្រួសារក្រីក្រ នៅជនបទ បានសម្រេចចិត្តរៀបការជាមួយជនជាតិបរទេសដូចជាជនជាតិតៃវ៉ាន់ ឬជនជាតិកូរ៉េខាងត្បូង។ ប៉ុន្តែ បន្ទាប់ពីរៀបការហើយ សេចក្តីរាយការណ៍របស់អង្គការមួយចំនួនបានអោយដឹងថា ស្ត្រីទាំងនោះមួយចំនួនមិនទទួលបានសេចក្តីសុខដូចសេចក្តីប្រាថ្នានោះទេ។

លោកយ៉ា ណាវុត នាយកនៃអង្គការខារ៉ាមកម្ពុជាដែលធ្វើការច្រើនជាមួយស្រ្តីខ្មែរ នៅក្រៅប្រទេសនោះ បានបញ្ជាក់ នៅថ្ងៃអាទិត្យនេះថា ការសម្រេចផ្អាកបណ្តោះអាសន្ននៃសិទ្ធិរៀបការរវាងជនជាតិកូរ៉េ និងជនជាតិខ្មែរ គឺជាការល្អ ពីព្រោះ នេះជាវិធានការឆ្លើយតបទៅនឹងការទប់ស្កាត់ការជួញដូរមនុស្ស នៅក្នុងកាលៈទេសៈវិបត្តិសេដ្ឋកិច្ច។