ច្បាប់ប្រឆាំងអំពើពុករលួយ

លោកហោណាំហុងព្រមានមន្ត្រីសហប្រជាជាតិនៅកម្ពុជា

ដោយ ប៉ែន បូណា

អត្ថបទចុះផ្សាយកាលពីថ្ងៃទី 21/03/2010 កែប្រែលើកចុងក្រោយកាលពីថ្ងៃទី 21/03/2010 12:10 ម៉ោងសកល

ក្រុមមន្ត្រីអង្គការសហប្រជាជាតិដែលកំពុងបំពេញបេសកកម្មក្នុងប្រទេសកម្ពុជាបានទទួលការព្រមានពីរដ្ឋមន្ត្រីក្រសួងការបរទេសទាក់ទិននឹងសេចក្តីអត្ថាធិប្បាយរបស់ពួកគេ ចំពោះច្បាប់ប្រឆាំងអំពើពុករលួយ។ សេចក្តីព្រមានរបស់ប្រមុខការទូតខ្មែរបានធ្វើឡើង បន្ទាប់ពីទីស្នាក់ការធំសហប្រជាជាតិ នៅទីក្រុងញូវយ៉កបានអះអាងថា គេមិនបានណែនាំឲ្យមន្ត្រីរបស់ខ្លួន នៅភ្នំពេញធ្វើសេចក្តីអត្ថាធិប្បាយអំពីច្បាប់ប្រឆាំងអំពើពុករលួយទេ។

បទអន្តរាគមន៍របស់ប៉ែន បូណាពីទីក្រុងភ្នំពេញ

21/03/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

លោកហោ ណាំហុងរដ្ឋមន្រ្តីការបរទេសកម្ពុជាព្រមានមន្ត្រីសហប្រជាជាតិ នៅកម្ពុជា
(រូបថត៖រក្សាសិទ្ធិ)

រដ្ឋមន្ត្រីការបរទេសខ្មែរបានព្រមានមន្ត្រីអង្គការសហប្រជាជាតិប្រចាំប្រទេសកម្ពុជាថា កុំឲ្យលូកដៃចូលក្នុងកិច្ចការផ្ទៃក្នុងរបស់កម្ពុជាទៀត ប្រសិនបើមិនដូច្នោះទេ រដ្ឋាភិបាលកម្ពុជាអាចនឹងចាត់វិធានការប្រឆាំងនឹងពួកគេ។

សេចក្តីព្រមានបែបនេះបានធ្វើឡើងតាមរយៈលិខិតមួយច្បាប់ ចុះថ្ងៃទី ២០ មីនា ម្សិលមិញ ផ្ញើទៅកាន់លោកឌូក្លាស ប្រ៊ូឌឺរិក ប្រធានក្រុមមន្ត្រីសហប្រជាជាតិប្រចាំប្រទេសកម្ពុជា។ ក្នុងលិខិតនោះ លោករដ្ឋមន្ត្រីការបរទេស ហោ ណាំហុងបានគូសបញ្ជាក់ថា សេចក្តីអត្ថាធិប្បាយរបស់មន្ត្រីសហប្រជាជាតិ គឺជាការលូកដៃចូលក្នុងកិច្ចការផ្ទៃក្នុងរបស់កម្ពុជាដែលមិនអាចទទួលយកបាន ហើយប្រសិនបើទង្វើបែបនេះកើតឡើងជាថ្មីទៀត រដ្ឋាភិបាលកម្ពុជាប្រហែលជាត្រូវបង្ខំចិត្តប្រកាន់យកសេចក្តីសម្រេចស្តីពី «បុគ្គលដែលមិនអាចទទួលយកបាន»។

ប្រតិកម្មប្រកបដោយការព្រមានរបស់ប្រមុខការទូតខ្មែរបានធ្វើឡើងតបទៅនឹងសេចក្តីថ្លែងការណ៍ កាលពីថ្ងៃទី ១០មីនារបស់ក្រុមសហប្រជាជាតិ នៅកម្ពុជាដែលកត់សម្គាល់អំពីការអនុម័តយ៉ាងតក់ក្រហល់នូវច្បាប់ប្រឆាំងអំពើពុករលួយដោយមិនបានបើកឲ្យមានការពិភាក្សាទូលំទូលាយ។ សេចក្តីថ្លែងការណ៍នោះបន្តថា ក្រុមមន្ត្រីសហប្រជាជាតិនៅកម្ពុជានឹងជំរុញលើកទឹកចិត្តឲ្យមានការពិភាក្សា និងកែប្រែមាត្រាមួយចំនួននៃច្បាប់ប្រឆាំងអំពើពុករលួយ។

ភ្លាមៗនោះ អ្នកនាំពាក្យក្រសួងការបរទេសបានបញ្ចេញប្រតិកម្មម្តងរួចទៅហើយ ដោយបញ្ជាក់ថា សេចក្តីអត្ថាធិប្បាយរបស់តំណាងសហប្រជាជាតិប្រចាំកម្ពុជាបានធ្វើឡើងហួសពីអាណត្តិរបស់ខ្លួនដែលត្រូវបំពេញ។ ប៉ុន្តែ ពេលនេះរដ្ឋមន្ត្រីក្រសួងការបរទេសបានបញ្ចេញប្រតិកម្មម្តងទៀត ដើម្បីព្រមានដល់មន្ត្រីសហប្រជាជាតិទាំងនោះ។ គេមិនទាន់ឃើញមានប្រតិកម្មតបវិញរបស់មន្ត្រីសហប្រជាជាតិ នៅកម្ពុជានៅឡើយទេ រហូតមកទល់នឹងថ្ងៃនេះ។

យ៉ាងណាក៏ដោយ ច្បាប់ប្រឆាំងអំពើពុករលួយដែលត្រូវបានរដ្ឋសភាអនុម័ត កាលពីថ្ងៃទី ១១ មីនា ឥឡូវនេះក៏ទទួលបានការអនុម័តដូចគ្នាដែរពីព្រឹទ្ធសភា កាលពីថ្ងៃទី ១៩ មីនានេះ។ ច្បាប់នេះនឹងត្រូវរដ្ឋាភិបាលប្រកាសឲ្យប្រើជាប្រញាប់ក្នុងពេលឆាប់ៗនេះ៕

ទាក់ទងនឹងប្រធានបទនេះ