រុស្ស៊ី

មានផ្ទុះឡើងជាអំពើភេរវកម្មទៀតហើយ នៅតំបន់ភ្នំកូកាសរបស់រុស្ស៊ី

ដោយ កែវ ឆាយា

អត្ថបទចុះផ្សាយកាលពីថ្ងៃទី 19/04/2010 កែប្រែលើកចុងក្រោយកាលពីថ្ងៃទី 19/04/2010 10:33 ម៉ោងសកល

ព្រឹកមិញ ក្នុងទីក្រុង Nazran នៃសាធារណរដ្ឋ Ingouchie ចំណុះសហព័ន្ធរុស្ស៊ីដែលស្ថិតនៅ ចម្ងាយប្រមាណ ១.៦០០គ.ម.ខាងត្បូងរដ្ឋធានីម៉ូស្គូ ពួកភេរវជនបានបំផ្ទុះរថយន្តរបស់អនុរដ្ឋមន្ត្រីមហាផ្ទៃនៃសាធារណរដ្ឋនោះ ប៉ុន្តែសំណាងល្អ ខុសពីលើកមុនៗ វាឥតបានបណ្តាលឲ្យមានមនុស្សស្លាប់ទេ គ្រាន់តែរបួសពីរនាក់ប៉ុណ្ណោះ។

សេចក្តីរាយការណ៍របស់កែវ ឆាយាពីទីក្រុងម៉ូស្គូ

19/04/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

មានផ្ទុះឡើងជាអំពើភេរវកម្មទៀតហើយ នៅតំបន់ភ្នំកូកាសរបស់រុស្ស៊ី
(រូបថត៖reuters)

គឺនៅម៉ោង ៨ និង៥០នាទីព្រឹកថ្ងៃចន្ទនេះ ដែលឡានJeep ម៉ាក Niva របស់លោកអនុរដ្ឋមន្ត្រីក្រសួងមហាផ្ទៃសាធារណរដ្ឋ Ingouchie ចតក្នុងយានដ្ឋាន នៅចំពីមុខអគារក្រសួងនេះ ក្នុងក្រុង Nazran ស្រាប់តែផ្ទុះក្ឌាំងតែម្តង។ ផ្ទុះនេះ តាមការសន្និដ្ឋានរបស់សមត្ថកិច្ច គឺមកពីគ្រាប់បែកដែលពួកភេរវជនបានចងលាក់ទុកជាស្រេច នៅឯក្រោមបាតរថយន្តនោះ។ ប៉ុន្តែ ដោយហេតុ តែគាត់អាយុថ្លៃ រូបលោកអនុរដ្ឋមន្ត្រី Beslan Shadiev ពេលផ្ទុះនោះឥតបានស្ថិតនៅក្នុងឡានJeep នោះឯណា។

ការផ្ទុះនោះបានប្រព្រឹត្តទៅ គឺនៅចំពេលដែល chauffeur ឡានបានបើកទ្វារប្រុងចូលទៅអង្គុយក្នុងឡាន ជាហេតុដែលបណ្តាលឲ្យគាត់ធ្លាក់ខ្លួនរបួសទៅ។ នគរបាលម្នាក់ក៏ធ្លាក់ខ្លួនរបួសដែរ ដោយមុតដោយអំបែងខ្ទាតចេញពីកន្លែងផ្ទុះ។ ហើយនៅត្រង់កន្លែងផ្ទុះនោះ ក្រុមស៊ើបអង្កេតកំពុងបំពេញការងារខ្លួន។ គួរនិយាយថា ទើប១០ថ្ងៃមុនសោះ ក្នុងទីប្រជុំជន Ekajevo លើដែនដីIngouchieនោះ មានស្ត្រីអត្តឃាតម្នាក់មុនដំបូងបានបាញ់សម្លាប់នគរបាលម្នាក់ រួចមកបំផ្ទុះខ្លួនឯងផ្តាច់ទាំងជីវិតមេនគរបាលឃុំនោះទៅផង។

វាជាការសងសឹកចំពោះប្តីខ្លួនដែលបានត្រូវកំទេចក្នុងប្រតិបត្តិការបង្ក្រាបពួកភេរវជននៅ តំបន់ភ្នំកូកាសរុស្ស៊ី។ ប្រតិបត្តិការនោះធ្វើឡើងក្នុងក្របខ័ណ្ឌនៃបទបញ្ជាចេញដោយលោកប្រធានាធិបតីរុស្ស៊ី Medvedev ដែលដាក់ទិសកំទេចគ្មានត្រាប្រណីឡើយ ពួកភេរវជនដែល បង្កើតសំបុកវា ជាពិសេស នៅតាមសាធារណេដ្ឋបីនៃតំបន់ភ្នំនោះ ពោលគឹ នៅ Daguestan Ingouchie និង Tchetchenie ដែលតាមតួលេខចុងក្រោយ គឺនៅសល់គ្នីគ្នាប្រមាណ ៥០០នាក់ទៀត។

បទបញ្ជានេះចេញយ៉ាងកំហិត បន្ទាប់ពីមានអំពើភេរវកម្ម ២ផ្ទួនគ្នាបានប្រព្រឹត្តទៅក្នុងមេត្រូក្រុងម៉ូស្គូ កាលពីចុងខែមុន។ ភេរវកម្មនេះដែលត្រូវក្រសួងសន្តិសុខរុស្ស៊ីចាត់ទុកថា មានប្រភពចេញមកពីតំបន់ភ្នំកូកាសតែម្តង បានផ្តាច់ជីវិតអ្នកក្រុងម៉ូស្គូអស់ ៣៩នាក់ឯណោះ។

បើនិយាយពី ជនជាតិIngouch នៅតំបន់ភ្នំកូកាស គេមានចំនួនកន្លះលាននាក់ គេកាន់សាសនាអ៊ីស្លាមនិកាយSunnit ដូចជនជាតិ Tchetchen។ សម័យសូវៀតគេបានស្ថិតនៅក្នុងសាធារណរដ្ឋ រួមតែមួយ អភ័ព្វដូចគ្នាបានត្រូវរបបStaline និទេសទៅតំបន់អាស៊ីកណ្តាល កាលពីឆ្នាំ ១៩៤៣-១៩៤៤ក្រោមបទចោទប្រកាន់ថា បានចូលដៃជាមួយពួកអាល្លឺម៉ង់ ហ្វាស៊ីស្ត រួចបានត្រូវអនុញ្ញាតឲ្យត្រឡប់មកស្រុកកំណើតវិញ លុះក្នុងឆ្នាំ១៩៥៧ សម័យលោក Khroutchev ទៅហើយ៕

ទាក់ទងនឹងប្រធានបទនេះ