សេដ្ឋកិច្ច

ADB៖ សេដ្ឋកិច្ចកម្ពុជាងើបឡើងវិញ ៤,៥ %ក្នុងឆ្នាំ២០១០

ដោយ លី ម៉េងហួរ

អត្ថបទចុះផ្សាយកាលពីថ្ងៃទី 20/04/2010 កែប្រែលើកចុងក្រោយកាលពីថ្ងៃទី 20/04/2010 12:09 ម៉ោងសកល

ធនាគារអភិវឌ្ឍន៍អាស៊ី ហៅកាត់ជាភាសាអង់គ្លេសថា ADB បានព្យាករថា កំណើនសេដ្ឋកិច្ចរបស់ប្រទេសកម្ពុជា នៅឆ្នាំ២០១០នេះ នឹងងើបឡើងវិញចំនួន ៤,៥ %។ ចំណែកនៅឆ្នាំ២០១១ នឹងកើនដល់ ៦ %។ ការព្យាករណ៍នេះ បន្ទាប់ពីសេដ្ឋកិច្ចរបស់កម្ពុជា បានធ្លាក់ចុះ ប្រមាណ ២ % នៅក្នុងឆ្នាំ ២០០៩។

សេចក្តីរាយការណ៍របស់លី ម៉េងហួរពីទីក្រុងភ្នំពេញ

20/04/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ADBបានព្យាករពីកំណើនសេដ្ឋកិច្ចកម្ពុជាវិជ្ជមានរហូតដល់ ៤,៥ %នៅឆ្នាំ២០១០ និង ៦% នៅឆ្នាំ២០១១
(រូបថត៖ RFIលី ម៉េងហួរ)

៤,៥ % គឺជាកំណើនសេដ្ឋកិច្ច របស់ប្រទេសកម្ពុជា នៅឆ្នាំ២០១០។ នេះជាការព្យាករណ៍ថ្មីបំផុតរបស់ធនាគារអភិវឌ្ឍន៍អាស៊ី ដែលបានប្រកាសឡើង នាព្រឹកថ្ងៃទី២០ ខែមេសា ឆ្នាំ២០១០។

ការសន្មត់ពីការកើនឡើងវិញនៃសេដ្ឋកិច្ចកម្ពុជា បន្ទាប់ពីវិបត្តិសកល ដោយសារតែ ADB រំពឹងលើអំណោយផលល្អនៃការដាំដំណាំកសិកម្ម នៅក្នុងប្រទេសកម្ពុជា និងការចំណាយរបស់អ្នកប្រើប្រាស់ក្នុងសហរដ្ឋអាមេរិក។ សហរដ្ឋអាមេរិកដែលជាទីផ្សារដ៏ធំបំផុតនៃតម្រូវការផលិតផលសំលៀកបំពាក់កាត់ដេររបស់កម្ពុជា។

លោក អេរិច សិដវីក ( Eric Sidgwick ) សេដ្ឋកិច្ចវិទូជាន់ខ្ពស់ របស់ធានាគារអភិវឌ្ឍន៍អាស៊ី ADB ប្រចាំប្រទេសកម្ពុជា បានថ្លែងក្នុងសន្និសីទកាសែត នៅព្រឹកមិញថា ក្រៅពីវិស័យកសិកម្ម និងការនាំចេញសំលៀកបំពាក់ទៅអាមេរិកត្រូវងើបឡើងវិញហើយនោះ កំណើននៅក្នុងសេវាកម្ម និងវិស័យទេសចរណ៍ ក៏ត្រូវបានព្យាករថា នឹងងើបឡើងវិញ ក្នុងអត្រា ៥ % នៅឆ្នាំ២០១០។

ចំណែកសកម្មភាពសំណង់ ក៏ត្រូវបានអ្នកសេដ្ឋកិច្ចរបស់ ADB រំពឹងថា ទំនងជាកើនឡើងក្នុងអត្រាមធ្យម ប្រហែលជា ៤ % ខណៈពេលដែលតម្រូវការឥណទានធនាគារ ក៏កំពុងតែងើបឡើងវិញបន្តិចម្តងៗ។ ក្នុងនោះ លំហូរចូលនៃការវិនិយោគដោយផ្ទាល់ពីបរទេស ( FDI ) ជាពិសេសពីប្រទេសកូរ៉េ កំពុងចាប់ផ្តើមងើបឡើងវិញ សម្រាប់គម្រោងសំណង់អគារមួយចំនួន។

ជាមួយនឹងការព្យាករណ៍ខាងលើនេះ ADB ក៏បានប៉ាន់ស្មានទុកថា នៅឆ្នាំ២០១១ សេដ្ឋកិច្ចកម្ពុជា នឹងវិលត្រឡប់មករកកំណើនខ្ពស់ជាងមុន រហូតដល់ ៦%។ កំណើននេះ ដោយសារតែការនាំចេញនូវផលិតផលសំលៀកបំពាក់កាត់ដេរ និងវិស័យទេសចរណ៍ រួមជាមួយនឹងការពង្រីកផលិតកម្មផលិតផល ក្រៅពីសំលៀកបំពាក់ និងការកើនឡើងនៃសេវាកម្មដទៃទៀត។

សូមរម្លឹកថា កាលពីថ្ងៃទី៧ ខែមេសា ឆ្នាំ២០១០ ធនាគារពិភពលោក ប្រចាំកម្ពុជា ក៏បានចេញផ្សាយនូវការព្យាករណ៍ថា កំណើនសេដ្ឋកិច្ចកម្ពុជា នៅឆ្នាំ២០១០នេះ មានកំណើន ៤,៤%។ ចំណែកនៅឆ្នាំ២០១១ សេដ្ឋកិច្ចកម្ពុជា នឹងកើនដល់ ៦%។ ចំណែករដ្ឋាភិបាលវិញ បានកំណត់ថា នៅឆ្នាំ២០១០នេះ កម្ពុជានឹងមានកំណើនសេដ្ឋកិច្ច ពី៤ ទៅ៦%។

ការព្យាករណ៍ពីកំណើនសេដ្ឋកិច្ចវិជ្ជមានរបស់កម្ពុជា ក្រោយវិបត្តិសេដ្ឋកិច្ចពេលនេះ ដោយសារតែអ្នកសេដ្ឋកិច្ច បានមើលឃើញនូវមានសញ្ញាជាច្រើន បានលេចងើបឡើងនៅចុងឆ្នាំ២០០៩។ សេដ្ឋកិច្ចកម្ពុជាកាលពីឆ្នាំ២០០៩ បានធ្លាក់ដល់កម្រិតក្រោមសូន្យ គឺចន្លោះពី -១,៥ ទៅ-២ %។ នេះក៏ដោយសារតែផលប៉ះពាល់នៃវិបត្តិសេដ្ឋកិច្ចសកល៕

ទាក់ទងនឹងប្រធានបទនេះ