សុខភាព

ពលរដ្ឋខ្មែរទី ១០បានស្លាប់ដោយសារជំងឺផ្តាសាយបក្សី

ដោយ លាង ដឺលុច

អត្ថបទចុះផ្សាយកាលពីថ្ងៃទី 21/04/2010 កែប្រែលើកចុងក្រោយកាលពីថ្ងៃទី 21/04/2010 11:34 ម៉ោងសកល

ក្រុមគ្រូពេទ្យកម្ពុជាបានរកឃើញករណីឆ្លងមេរោគផ្តាសាយបក្សីH5N1មកលើមនុស្សទី ១០ ដែលបានបាត់បង់ជីវិត កាលពីថ្ងៃទី ១៧មេសា។ ករណីឆ្លងទី ១០នេះបានកើតឡើងនៅក្នុងស្រុកកំពង់លាវ ខេត្តព្រៃវែង។ នៅពេលនេះ ក្រុមអ្នកជំនាញកំពុងតាមដានបន្តតំបន់ផ្ទុះមេរោគH5N1។

សេចក្តីរាយការណ៍របស់លាង ដឺលុចពីទីក្រុងភ្នំពេញ

21/04/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

ការត្រួតពិនិត្យលើព័ត៌មានសុខភាពដើម្បីការពារពីការឆ្លងមេរោគផ្តាសាយបក្សី
(រូបថត៖សុវណ្ណារ៉ា)

បុរសអាយុ២៧ឆ្នាំម្នាក់ ជាអ្នកស្រុកកំពង់លាវ ខេត្តព្រៃវែងបានស្លាប់ នៅថ្ងៃទី១៧មេសា ដោយសារជំងឺសួតធ្ងន់ធ្ងរ បន្ទាប់ពីបានឆ្លងមេរោគផ្តាសាយបក្សីH5N1។ សេចក្តីប្រកាសព័ត៌មានរួមរបស់ក្រសួងសុខាភិបាលកម្ពុជា និងអង្គការសុខភាពពិភពលោកដែលត្រូវបានផ្សព្វផ្សាយ នៅថ្ងៃទី ២១មេសានេះ បានសរសេរថា បុរសម្នាក់នេះ ជាករណីទី១០ នៅកម្ពុជាដែលបានឆ្លងមេរោគផ្តាសាយបក្សី និងជាករណីទី ៨ដែលបានស្លាប់ដោយសារមេរោគនេះ។

សេចក្តីប្រកាសព័ត៌មានដដែលបានរៀបរាប់ថា អ្នកជំងឺបានចាប់ផ្តើមឈឺដោយមានរោគសញ្ញាគ្រុនក្តៅ កាលពីថ្ងៃទី១៣មេសា និងបន្ទាប់មកត្រូវបានបញ្ជូនទៅគ្លីនិកមួយ នៅថ្ងៃទី១៦មេសា ដោយសារមានរោគសញ្ញាក្អក និងដង្ហើមថប់។ អ្នកជំងឺនេះត្រូវបានបញ្ជូនបន្តមកកាន់មន្ទីរពេទ្យកាល់ម៉ែត ក្នុងទីក្រុងភ្នំពេញ នៅថ្ងៃទី១៧មេសា។ ប៉ុន្តែ ដោយសារស្ថានភាពជំងឺមានសភាពធ្ងន់ធ្ងរ ក្រុមគ្រូពេទ្យមិនអាចជួយសង្គ្រោះអ្នកជំងឺបានឡើយ។

សត្វទាដែលគេឃើញស្លាប់ក្នុងកសិដ្ឋានមួយនៅជាយក្រុងភ្នំពេញ
(រូបថត៖reutersបណ្ណាសារ)

រដ្ឋមន្ត្រីក្រសួងសុខាភិបាលលោក ម៉ម ប៊ុនហេងបានថ្លែងថា ជំងឺផ្តាសាយបក្សី នៅតែបន្តគំរាមកំហែងដល់សុខភាពប្រជាពលរដ្ឋកម្ពុជា ហើយលោកបានរំលឹកដល់ពលរដ្ឋគ្រប់រូប អោយបន្តតាមដាន និងរាយការណ៍អំពីសត្វបក្សីឈឺ ឬងាប់ទៅភ្នាក់ងារសុខាភិបាល និងបសុពេទ្យ។ ទោះយ៉ាងណាក៏ដោយ នៅពេលនេះ មន្ត្រីសុខាភិបាលកំពុងសហការជាមួយមន្ត្រីនៃក្រសួងកសិកម្ម ដើម្បីអង្កេតស្រាវជ្រាវអំពីរបាយការណ៍បក្សីងាប់ នៅក្នុងភូមិដែលផ្ទុះករណីឆ្លងចុងក្រោយនេះ។

គួរបញ្ជាក់ថា រហូតដល់ថ្ងៃទី២០មេសាឆ្នាំ២០១០នេះ មានករណីឆ្លងជំងឺផ្តាសាយបក្សីH5N1ចំនួន១០ករណីហើយ ដែលក្នុងនោះ៨ករណីបានស្លាប់។ ចំពោះស្ថានភាពពិភពលោកវិញ ចាប់តាំងពីឆ្នាំ២០០៣មក មានករណីឆ្លងសរុបទាំងអស់៤៩៤ករណី ដែលក្នុងនោះ២៩៣ករណីបានស្លាប់។

សេចក្តីប្រកាសព័ត៌មានរបស់ក្រសួងសុខាភិបាលបានពន្យល់ថា ជំងឺផ្តាសាយបក្សីH5N1 គឺជាជំងឺមួយដែលធម្មតាឆ្លងពីបក្សីឈឺ ទៅបក្សីផ្សេងទៀត។ ប៉ុន្តែជួនកាល វាអាចចំលងពីបក្សីទៅមនុស្សបានដែរ។ តែវាមិនងាយឆ្លងពីមនុស្សទៅមនុស្សនោះទេ។ សេចក្តីប្រកាសព័ត៌មានបន្តថា ជំងឺផ្តាសាយបក្សីលើមនុស្ស គឺជាជំងឺធ្ងន់ធ្ងរដែលទាមទារអោយមានការព្យាបាលនៅមន្ទីរពេទ្យ។

គួររំលឹកថា ក្រៅពីជំងឺផ្តាសាយបក្សីH5N1 កម្ពុជាក៏កំពុងគំរាមកំហែងដោយជំងឺផ្តាសាយប្រភេទថ្មីA/H1N1 ដែលគេស្គាល់ជាជំងឺផ្តាសាយជ្រូកនោះផងដែរ។ យោងតាមរបាយការណ៍របស់នាយកដ្ឋានប្រយុទ្ធជំងឺឆ្លងរបស់ក្រសួងសុខាភិបាលកម្ពុជា គិតត្រឹមថ្ងៃទី១៥ខែមេសា មានករណីឆ្លងមេរោគផ្តាសាយប្រភេទថ្មីនេះ ៥៧០ករណីហើយ ក្នុងនោះមាន៦ករណីបានស្លាប់។ ក្រសួងសុខាភិបាលក៏បានផ្សព្វផ្សាយបណ្តាញទូរស័ព្ទទាន់ហេតុការណ៍ផងដែរគឺលេខ ១១៥ ដល់សាធារណៈជនទូទៅ សម្រាប់ផ្តល់ព័ត៌មានអំពីករណីសង្ស័យផ្ទុះមេរោគផ្តាសាយបក្សី និងមេរោគផ្តាសាយប្រភេទថ្មី៕

ទាក់ទងនឹងប្រធានបទនេះ