ថៃ

ពួកអាវក្រហម៖ គ្មានការចរចាដោយផ្ទាល់ជាមួយ Abhisit និងរដ្ឋាភិបាល

ដោយ គួច គន្ធារ៉ា

អត្ថបទចុះផ្សាយកាលពីថ្ងៃទី 21/04/2010 កែប្រែលើកចុងក្រោយកាលពីថ្ងៃទី 21/04/2010 12:55 ម៉ោងសកល

នៅថ្ងៃពុធ ទី២១ មេសានេះ ពួកបាតុករអាវក្រហម ដែលកំពុងកាន់កាប់សង្កាត់ជំនួញ Rachaprasong បានប្រកាសឲ្យដឹងថា ពួកគេត្រៀមខ្លួនរួចហើយ ដើម្បីបើកកិច្ចចរចា។ មិនមែនចរចាដោយផ្ទាល់ជាមួយលោកនាយករដ្ឋមន្រ្តី Abhisit ឬជាមួយរដ្ឋាភិបាលទេ តែចង់ឲ្យមានអន្តរាគមន៍ពីភាគីទី៣។

សេចក្តីរាយការណ៍របស់គួច គន្ធារ៉ា

21/04/2010

បោះពុម្ពអត្ថបទ

ផ្ញើអត្ថបទ

ប្រតិកម្មចំពោះអត្ថបទ

កងទ័ពត្រៀមបើកយុទ្ធនាការបង្រ្កាបពួកអាវក្រហម
(រូបថត៖ Reuters)

ការដែលពួកអាវក្រហមប្រកាសសុំបើកកិច្ចចរចាពេលនេះបានធ្វើឡើង ចំពេលដែលកងទ័ពបានត្រៀមខ្លួននឹងបើកការវាយបង្ក្រាបលើពួកបាតុករ ដែលបាននឹងកំពុងបន្តកាន់កាប់សង្កាត់ជំនួញ Rachaprasong អស់ជាច្រើនថ្ងៃកន្លងមកហើយ។ មេអាវក្រហម ២នាក់បានប្រាប់ឲ្យដឹងនៅថ្ងៃនេះ ថាពួកគេបានត្រៀមខ្លួនរួចជាស្រេចដើម្បីបើកកិច្ចចរចា តែមិនមែនចរចាដោយផ្ទាល់ជាមួយលោកនាយករដ្ឋមន្រ្តី Abhisit ឬក៏ជាមួយរដ្ឋាភិបាលទេ មានន័យថា ពួកគេចង់ឲ្យមានភាគីទី៣ ដូចយ៉ាងអង្គការក្រៅរដ្ឋាភិបាល ឬមួយអ្នកការរទូតបរទេស។ ការទាមទារឲ្យមានអន្តរាគមន៍ពីភាគីទី៣ ដោយពួកអាវក្រហមចាត់ទុកលោក Abhisit និងរដ្ឋាភិបាល ថាជាឃាតករសម្លាប់គ្នាគេនៅក្នុងយុទ្ធនាការបង្រ្កាបបាតុកម្មកាលពីថ្ងៃ១០ មេសាកន្លងទៅ។

ពួកអាវក្រហមបន្តកាន់កាប់សង្កាត់ជំនួញ Rachaprasong
(រូបថត៖ Reuters)

មេអាវក្រហមម្នាក់លោក Kwanchai បានថ្លែងថា កងទ័ពគ្រោងនឹងបើកយុទ្ធនាការវាយបង្រ្កាបជាលើកទី២នៅមុនថ្ងៃទី ២៥ មេសា ដូច្នេះ យើងចង់ឲ្យមានការសម្របសម្រួលដោយសន្តិវិធីជាមុនសិន ដើម្បីជៀសវាងការបង្ហូរឈាមគ្នា។ លោក Kwanchai បានដាក់សំណើថ្មី ដោយសុំឲ្យរដ្ឋាភិបាលរំលាយសភាក្នុងរយៈពេល ៣ខែទៀត ពោលគឺមិនមែនរំលាយភ្លាមៗដូចដែលពួកគេបានទាមទារពីពេលមុននោះទេ។ ចម្លើយតបវិញ អ្នកនំាពាក្យរដ្ឋាភិបាលបានបញ្ជាក់ថា លោក Abhisit ក៏បានត្រៀមខ្លួនបើកកិច្ចចរចាដែរ តែបានសុំឲ្យពួកអាវក្រហមកាត់បន្ថយភាពតានតឹងជាមុនសិន។ យោងតាមអ្នកនំាពាក្យរដ្ឋាភិបាលដដែល លោក Abhisit បានយល់ព្រមលើកយកទៅចរចា អំពីលក្ខខណ្ឌនៃការរៀបចំបោះឆ្នោតសភា និងការធ្វើវិសោធនកម្មលើច្បាប់រដ្ឋធម្មនុញ្ញ។ ប៉ុន្តែទន្ទឹមគ្នានេះ រដ្ឋាភិបាលចង់ឲ្យមានកិច្ចចរចាដោយផ្ទាល់ ដោយមិនចំាបាច់ឆ្លងកាត់តាមភាគីទី៣ទេ។

សូមជម្រាបជូនថា ១០ថ្ងៃក្រោយពីបរាជ័យក្នុងការបង្រ្កាបបាតុកម្មដែលបណ្តាលឲ្យមនុស្សជាង ២០នាក់ស្លាប់ និងរបួសប្រមាណ ៨០០នាក់មក រដ្ឋាភិបាលថៃបានប្តេជ្ញាចិត្តនឹងបញ្ចប់បាតុកម្មអាវក្រហមឲ្យបាន បើទោះបីជាត្រូវប្រើគ្រាប់កាំភ្លើងមែនទែនក៏ដោយ។ ក៏ប៉ុន្តែ រដ្ឋាភិបាលបានបដិសេធមិនបញ្ជាក់ថា តើកងទ័ពនឹងចូលទៅបង្រ្កាបបាតុករនៅពេលណានោះទេ។