ອັຟການິສຖານ

ປະທານາທິບໍດີ ກ໊າກຊ່າຍ ສາບານຕົວ

ໂດຍ ບັນດານ ສີສຸນທອນ B. Sisounthone

ບົດຄວາມນີ້ເຜີຍແຜ່ເມື່ອວັນທີ 19/11/2009 ແກ້ໄຂໃຫມ່ຫລ້າສຸດເມື່ອວັນທີ 19/11/2009 12:29 TU

ພິທີ ສາບານຕົວ ເຂົ້າຮັບຕຳແໜ່ງ ປະທານາທິບໍດີ ຂອງ ທ່ານ ກ໊າກຊ່າຍ
Reuters

ໃນພິທີ ສາບານຕົວເຂົ້າຮັບຕຳແໜ່ງປະທານາທິບໍດີ ມື້ນີ້ ທ່ານ ກ໊າກຊ່າຍ ໄດ້ສັນຍາ ຕໍ່ໜ້າປະຊາຄົມສາກົນວ່າ ຈະຖອດຖອນ ບົດຮຽນ ທີ່ຜິດພາດມານັ້ນ ແລະຈະເຮັດໃຫ້ ວັທະນະທັມ ໃນ ການບໍ່ລົງໂທດ ຜູ່ກະທຳຜິດນັ້ນ ໝົດໄປ.

 

ຫລັງຈາກ ປະຊາຄົມສາກົນ ໄດ້ກົດດັນໃຫ້ ຜູ່ນຳອັຟການິສຖານ ປາບການສໍ້ລາດບັງຫລວງ ຢ່າງເຂັ້ມງວດ ແລະໃນທີ່ສຸດກໍຍອມຮັຍ ການຖືກເລືອກຕັ້ງທີ່ຜິດກະຕິກາ ດ້ວຍການລັກໂລບຄະແນນສຽງ ຂອງທ່ານ ກ໊າກຊ່າຍ ນັ້ນ ໄດ້ພາກັນ ຮັບຟັງ ຄຳປຣາສັຍ ຂອງທ່ານ ກ໊າກຊ່າຍ ຢ່າງເອົາໃຈໄສ່.

 

ທ່ານກ໊າກຊ່າຍ ເວົ້າວ່າ "ພວກເຮົາ ຕ້ອງຖອດຖອນບົດຮຽນ ຂອງ ຄວາມຜິດພາດ ແລະຄວາມຫລົ້ມເຫລວ ຂອງພວກເຮົາ ໃນ 8 ປີຜ່ານມາ. ສ່ວນ ກ່ຽວກັບ ວັທະນະທັມ ໃນການບໍ່ລົງໂທດ ຜູ່ ກະທຳຜິດ ນັ້ນກໍຕ້ອງໃຫ້ ສິ້ນສຸດ. ໂດຍສະເພາະ ຄະດີສໍ້ເລາດ ບັງຫລວງ.

 

ປະທານາທິບໍດີ ກ໊າກຊ່າຍ ຫວັງວ່າ ກຳລັງທະຫານ ຂອງ ອັຟກາ ນິສຖານ ຄົງຈະເອົາມາຕຣະການ ຄວາມປອດພັຍ ໃນປະເທດໄດ້ ໃນ ອານາຄົດຂ້າງໜ້ານີ້.

ແຕ່ປັດຈຸບັນນີ້, ທະຫານຕ່າງດ້າວ 100.000 ຄົນ ຈາກປະມານ 40 ປະເທດ ກຳລັງປະຕິບັດງານ ປ້ອງກັນຄວາມປອດພັຍ ແລະ ຄວາມ ໝັ້ນຄົງ ໃຫ້ ອັຟການິສຖານ ນີ້ຢູ່ ແລະ ອາເມຣິກາ ກໍຍັງກຳລັງ ພິຈາຣະນາ ຈະສົ່ງທະຫານ ເຂົ້າເພີ້ມອີກ ປະມານ 40.000 ຄົນ.

 

ທ່ານ ກ໊າກຊ່າຍ ກ່າວວ່າ ແຕ່ນີ້ ຫາ 3 ປີ ກຳລັງທະຫານ ອັຟກ່ານ ຈະສາມາດຄໍ້າປະກັນ ໃນເຂດທີ່ຂາດຄວາມປອດພັຍ ໃນປະເທດໄດ້.

 

ທ່ານກ້າກຊ່າຍ ອາຍຸ 51 ໄດ້ຖືກເລືອກເປັນ ປະທານາທິບໍດີ ອີກໃໝ່ ສຳຫລັບ 5 ປີ ຫລັງຈາກ ມີການຖົກຖຽງກັນ ວ່າມີການລັກໂລບຄະແນນສຽງ ແລະ ຫລັງຈາກ ຄູ່ແຂ່ງ ໄດ້ຖອນຕົວ ອອກຈາກ ການແຂ່ງຂັນ ໃໝ່ໃນຮອບທີ 2.

 

ໃນພິທີ ສາບານຕົວ ຕໍ່ໜ້າ ປະທານສານຍຸຕິທັມ ສູງສຸດ ມື້ນີ້, ມີແຂກ ຮັບເຊີນມາຮ່ວມ 800 ຄົນ ໃນນັ້ນມີ 300 ຄົນເປັນຊາວຕ່າງດ້າວ, ບຸກຄົນສຳຄັນຕ່າງປະເທດ ມີ ຍານາງ ຮິນລາຣີ່ ກລິງຕັນ ລັຖມົນ ຕຣີການຕ່າງປະເທດ ອາເມຣິກາ ແລະ ປະທານາທິບໍດີ ປາກີສຖານ ທ່ານ ສ໊າກດາຣີ່.