អានតួអត្ថបទ

Jeffrey Epstein មហាសេដ្ឋី​អាមេរិក​​​ជាប់ចោទ​ពីបទ​បំពាន​ផ្លូវភេទ​ស្ត្រី​ ស្លាប់​​ក្នុង​គុក

មហាសេដ្ឋីជាប់ចោទឈ្មោះ Jeffrey Epstein។ រូបថតដោយ New York State Division of Criminal Justice Services
មហាសេដ្ឋីជាប់ចោទឈ្មោះ Jeffrey Epstein។ រូបថតដោយ New York State Division of Criminal Justice Services New York State Division of Criminal Justice Services/Handout/Fil

មហាសេដ្ឋីអាមេរិកវ័យ៦៦ឆ្នាំ​ ឈ្មោះ Jeffrey Epstein ដែលជាប់ចោទពីបទរំលោភបំពាន​ផ្លូវភេទ លើស្ត្រីវ័យក្មេងជាច្រើននាក់ ហើយដែលថ្ងៃសវនាកា ជិតចូលមកដល់នោះ ត្រូវបាន​គេប្រទះឃើញស្លាប់ ក្នុងបន្ទប់ឃុំឃាំង នៅ​ពន្ធនាគារក្រុងញូយ៉ក។ បើតាមការសន្និដ្ឋានបឋម ការស្លាប់នេះ ទំនងជាករណី​ធ្វើអត្តឃាត។ តែយ៉ាងណា FBI នឹងស៊ើបអង្កេតស៊ីជម្រៅ ដើម្បីស្វែងរកការពិត ជុំវិញការស្លាប់នេះ ព្រោះថាសវនាកា កាត់ទោសជននេះ អាចជាប់ពាក់ព័ន្ធ ជាមួយមនុស្សគ្រាក់ៗមួយចំនួន នៅសហរដ្ឋអាមេរិក។

ផ្សាយពាណិជ្ជកម្ម

ដំណឹងស្តីពីការស្លាប់ របស់​មហាសេដ្ឋីអាមេរិក Jeffrey Epstein ដែលជាប់​ចោទពីបទបៀតបៀនផ្លូវភេទលើអនីតិជន បានធ្វើឲ្យគ្រប់គ្នាស្រឡាំងកាំង ជាពិសេស ជនរងគ្រោះជាច្រើននាក់ ដែលកំពុងរងចាំសវនាកា​ កាត់ទោសជននេះ។ យោងតាមរដ្ឋបាល​មន្ទីរឃុំឃាំង ក្នុងសង្កាត់ម៉ាន់ហាតាន់ ក្រុងញូយ៉ក ដែលបញ្ជាក់ប្រាប់កាសែត New York Times បាន​ឲ្យដឹងថា នៅវេលាម៉ោង ៦និង៣០នាទីព្រឹក ថ្ងៃសៅរ៍ទី​​១០សីហា ជនជាប់ចោទឈ្មោះ Jeffrey Epstein ត្រូវបានគេប្រទះឃើញស្លាប់ ដោយចងក នៅក្នុងបន្ទប់ឃុំឃាំង។ ប្រភពពី​មន្ទីរឃុំឃាំងដដែល បញ្ជាក់ថាបើពិនិត្យមើលពីខាងក្រៅ គឺការស្លាប់នេះ ទំនងជាការធ្វើអត្តឃាត។

ដោយឡែក លោក William Barr រដ្ឋមន្ត្រីក្រសួងយុត្តិធម៌អាមេរិក បានលើកឡើងថា ករណីស្លាប់ជនឈ្មោះJeffret Epstein នេះ បានចោទជាសំណួរជាច្រើន ទាក់ទិននឹងអង្គសវនាកា ស្វែងរកយុត្តិធម៌។ លោកថា ក្រសួងយុត្តិធម៌ នឹងបើកការស៊ើបអង្កេតបន្ថែម ព្រមជាមួយនឹងក្រុមFBI ដើម្បីស្វែងរកការពិត ជុំវិញការស្លាប់នេះ ថាពិតជាករណីធ្វើអត្តឃាតមែន ឬយ៉ាងណា។

សូមបញ្ជាក់ថា ជនឈ្មោះ Jeffrey Epstein ត្រូវបានចាប់បញ្ជូនខ្លួន​ទៅឃុំ រងចាំសវនាកា កាលពីថ្ងៃទី​៦ ខែកក្កដា។ មានសាក្សី និងជនរងគ្រោះជាស្ត្រី ជាច្រើននាក់ បានដាក់ពាក្យប្តឹងចោទជននេះ ថាបាន​កេងប្រវញ្ច រំលោភបំពានផ្លូវភេទ។ នៅរវាងឆ្នាំ២០០២ ដល់ ២០០៥ មានស្ត្រីវ័យក្មេង ដែលខ្លះអាយុត្រឹម១៤ឆ្នាំ បានអះអាងថា ជាជនរងគ្រោះ នៃសកម្មភាពបោកបញ្ឆោតបំពារបំពានផ្លូវភេទ ពីសំណាក់មហាសេដ្ឋីរូបនេះ។ ជនរងគ្រោះ និងសាក្សី បានអះអាងជននេះ គឺជាមនុស្ស​ល្មោភកាមបំផុត។

គួរកត់សំគាល់ថា ជនឈ្មោះ Jeffrey Epstein ត្រូវបានគេស្គាល់ថាគឺជាមហាសេដ្ឋី ដែលចូលចិត្តដើរចាយ សប្បាយហ៊ឺហា និងរាប់អានជាមួយមនុស្សល្បីៗ ព្រមទាំងអ្នកមានអំណាច ឬអ្នកនយោបាយធំៗ​ ជាច្រើននាក់។ ក្នុងនោះ លោកដូណាល់ ត្រាំ និងលោក​ប៊ីល គ្លីនតុន ក៏ធ្លាប់ជាមិត្តស្និទស្នាល នឹងជននេះផងដែរ។ នៅក្នុងបទសម្ភាសន៍មួយ នៅឆ្នាំ២០០២ លោកដូណាល់ ត្រាំ ធ្លាប់បាននិយាយថា Jeffrey Epstein គឺជាមនុស្សចូលចិត្តស្រីៗរូបស្អាត ដូចលោកដែរ ហើយ​ជាពិសេសនោះគឺស្រីក្មេងៗតែម្តង។​ កាលពីថ្ងៃសៅរ៍ បន្ទាប់ពីដឹងដំណឹង​ស្លាប់ របស់ជនJeffrey Epstein នេះ លោកដូណាល់ ត្រាំ បានសរសេរ​សារ Twitter ក្នុងន័យបង្កើតការសង្ស័យ ដោយគ្មានភស្តុតាង ថាលោក ប៊ីល គ្លីនតុន ទំនងជាអាចជាប់​ពាក់ព័ន្ធនឹង​ករណីស្លាប់នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ