Caad:Lumndiiɓe laamu noddii seppooji e nder Njamena e nder ca'e goɗɗe

Seppo Njamena, talaata 27 / 4ɓuru 2021.
Seppo Njamena, talaata 27 / 4ɓuru 2021. © RFI

Seppooji waɗii hannde talaata bimmbi law Njamena. Ɗiɗo maayii e seppooɓe ɓen, seeditanɗe hollii wonnde ko fellaaɓe. Sukaaɓe yaltuɓe hollugol mettu-ɓerɗe maɓɓe. E wi'i maɓɓe, ɓe jaɓaali lomtal ɓiɗɗo Idriis Debi on.

Jeeyngal

Suukaaɓe heewɓe  mottindiri bimmbi ɗoo  Njamena, laamorgo Caad e ca’e yogaaje e nder leydi ndin.

Hiɓe lamndi yo konunkooɓe ardiiɓe laamu hakkudewu ngun immo.

Polisiiɓe e konunkooɓe no imminaa ngam haɗugol ɗin seppooji. Ɓe fetttinii ñamaku walla gaas e seppooɓe ɓen.

Seppooɓe ɗiɗo waraama, arano on ko to laamorgo Njamena, ɗiɗaɓo on e ko nokku wi’eteeɗo Mundu worgo Caad. Kumpite heewɗe no holli ɓee ɗiɗo ko fellaaɓe. Seppooji ɗin non dartaaki fii kala konunkooɓe e polisiiɓe ɓen no etaade fii accingol ɗi.

Ɓee sukaaɓe wonɓe waɗude ɗii seppooji, no sunnude pineeji, bonna estasiyonji  yeeyirɗi esansi.

Hiɓe wowla gonnguɗi mettuɗi e hoore Faransi, leydi ndi ɓe tuumiri bammbugol General Mahamat Idriis Debi lomtiiɗo baaba makko caggal maayde makko.

Ɗii seppooji waɗii bimmbi ñannde Albeer Pahimi Padakke toɗɗaa hooreejo jaagorɓe Caad.