Mali: Holko sarɗiiji ahodal laamu hakkundewu eɓɓunoo?

© RFI

Sariya laamu hakkundewu  ngu ɓiɓɓe Mali fuu darni ñannde sappo e ɗiɗi e lewru jeenaɓuru hitaande ujunaaji ɗiɗi e noogay, caggal ɓalɗe tati  diisondiral ko nii sifori. Happu ngun laamu ko leɓɓi sappo e jeetati. Si ɗuum ɓennii suɓngooji waɗee hara koonunkooɓe ɓen tawetaake e majji.

Jeeyngal

Calɗi tati ngun laamu hakkundewu no tawaa e oon sariya. Ko adii kawtital hakkundewu wonayngal suudu sarɗiiji tawa ko yimɓe teemedere e noogay e go’o suɓetee ngam taweede e ndun suudu e gardagol koonu walla siwiljo. Ɗum non ko hakkunde konunkooɓe ɓen, kawtal pelle politik lumndiiɓe tawaaɓe e M5, sosiyete siwil'en diinankeeɓe, ɓiɓɓe Mali wonuɓe caggal leydi ndii e sukaaɓe rewɓe e worɓe.

Ko hikkii ɗon, hooreejo jaagorɓe, cukko hooreejo.  Kanko non halfinaa kala ko yowitii  ndeenaangu e kisal leydi ndii. Kamɓe ɗon ɗiɗo kadi ɓe tawetaake e wooteeji ngarooji.

Sariya laamu hakkundewu no holliti kadi wonnde ɓee konunkooɓe ciwliiɓe laamu nguu ñannde sappo e jeetati lewru jeetaɓuru hitaande ujune ɗiɗi e noogay ñaawetaake. E ɗum sariyawol no holliti wonnde ɓe ñaawetaake ka cuuɗi ñaawirɗi. Konunkooɓe ciwliiɓe laamu ngun kadi waawata lontaade hooreejo leydi ndii. Ko ɗum kawtal e Dental Leyɗe hirnaange Afrik CEDAO lamndinoo ɓen dadiiɓe, caggal nde laamu hakkundewu nguu darnetee.