Emmaniyel Makron sifike konnguɗi Shogel Mayga "huunde hersinaniinde" Mali
Saakitaama ñannde :
Hooreejo Faransi Emmaniyel Makron sifike tuume ɗe hooreejo jaagorɓe laamu hakkundewu Mali, Shogel Mayga, fawi ɗen e dow Faransi, ka jonnde (ONU) Dental Leyɗe Aduna. O wi’i wonnde ɗum ko huunde « hersiniinde ».
O wi’i : « Ɗum weltinaali lam, ɗii konnguɗi jaɓetaake (…). Nde tawi ko hanki hormaaku genndi Faransi okkaa Maksiim Balasko (kononkoojo Faransiinaajo waraaɗo ñannde 24 lewru 9). Ɗu jaɓetaake. Ko hersiniiɗum, no itta teddungal e nguu laamu yaltungu ciwle laamu ɗiɗi ». Ko ɗum holliti Emmaniyel Makron, e nder jaabawol ngol waɗani RFI, ka hiraande hommbirde « Saison Africa 2020 » waɗunde ka galle laamu Elisee.
Ado ɗum tawi Paris holliino mettu-ɓernde mum e ɗee balɗe sakkitiiɗe sabu ɗii konnguɗi Shogel Mayga. Wi’uɗo wonnde Faransi tertike Mali e nder laana-weeyo.
Emmaniyel Makron ɓeydi ɗon o wi’i : « Miɗo anndi malinaaɓe mijaaki ɗum ». O tennti wonnde nguu laamu yaltungu e ciwle ɗiɗi alaa fiira hella ka demokarasi.
O waɗti ɗon kadi o wi’i : Meɗen soobinii, sabu meɗen faalaa haɓugol kuliyankaaku, haɓana kisal. Meɗen ton sabu laamu Mali ƴamii men ballal. Si tawno wonaa sabu Faransi harayno hannde Mali ko e juuɗe kuliyankooɓe woni ». O wi’i himo habbori ciwliiɓe laamu yo ɓe teddin ahdi maɓɓe ɓe yuɓɓina wooteeji ɗin e lewru 2ɓuru hitaande 2022. Yo ɓe accu nanngugol lumndiiɓe laamu soka. Yo ɓe waɗu golle maɓɓe ɗen, ɓe artira tugaale laamu ɗen. Golle ɗe alaa waɗude gila lebbi.
O hajii o wi’i : « Men jokkay waɗugol eɓɓooje ɓamtaare men e mofte winndere, kono golle ɗen waawataa waɗeede si tawii ardiiɓe ɓen waɗaali ko waɗɗii ɓe kon ». O piyi misal e Niijeer lewdi kawtalri Mali, o sifii Bazuum o wi’ on ko laamɗo suusuɗo, Ado on kadi tawno Isufu (hooreejo kiɗɗo Niijeer) ko laamɗo wakkiliiɗo. Ɓee ɗiɗo kala etanike jamaa mum hella ka cellal e ka needi. Ɓe waɗii golle lobbe.
O timmini konngol makko ngol wi’ugol wonnde, naɓidal Faransi e Afrik no haani rewrude sukaaɓe ɓen e pelle renndo ɗen ».
Anndintinde wonnde ñannde 8 lewru 10 ɓuru, jonnde ajjiinde waɗay Monpeliye. E nga’al wonaa hooreeɓe Afrik Faransi jaɓɓotoo, ko imminaaɓe pelle renndooji Afrik, Hooreejo Leydi Faransi jaɓɓotoo, yewtida.
« Saison Africa 2020 » Ko eɓɓoore nde Emmaniyel Makron fodunoo e yewtere makko Wagadugu e hitaande 2017.