Samminere laamu e nder Sudan: Jeneral hollitii wonnde o fusii laamu hakkundewu nguu

Saakitaama ñannde :

Jeneral Abdel Fattah al-Burhan jooma-dooleejo Sudan no haala e tele genndi altine 25 10ɓuru 2021.
Jeneral Abdel Fattah al-Burhan jooma-dooleejo Sudan no haala e tele genndi altine 25 10ɓuru 2021. © AFP
Golle : RFI Fulfulde

Yimɓe jogiiɓe alaaji kaɓurɗi jaggii bimmbi law, hannde 25 lewru 10ɓuru, woɓɓe e ardiiɓe laamu hakkundewu no jeyaa e maɓɓe hooreejo jaagorɓe. Caggal yontere gila pooɗondiral fuɗɗii hakkunde hooreeɓe laamu ƴanngal siwilɓe e konunkooɓe, Jeneral Abdel Fattah al-Burhan hollitii ka suudu tele wonnde laamu nguu fusaama. Ɓe nanngii silwilɓe ɗuuɗuɓe no tawaa e maɓɓe hooreejo jaagorɓe Abdallah Hamdok. Ɓe yamirii uddere leydi; Gila subaka hannde, seppooji no waɗude e nder Kartuum. Senndikaaɓe leydi noddii e anngal ɗoftaare.