Monsef Marzuki, hooreejo kiɗɗo Tuunus on fawaama kaso ngo ɗuuɓi 4
Tiniisi, Monsef Marjuki hooreeejo kiɗɗo wuuruɗo fewno oo saa’i ɗoo Faransi fawaama kaso. Ngon non ko ngo duuɓi nayi. Fawugol oo kaso ko hanki e alarba waɗi. Ko non humpitiri ɓee ka cuuɗi ñaawirɗi Tiniisi. Ummu BAH
Saakitaama ñannde :
Ko nduu suudu ñaawirdu mawndu Tinisi fawi Monsef Marzuki kaso. Ngon non ko ngo duuɓi nayi. Hiɓe tuumiri mo bonnugol innde leydi ndin e nder ɗee leyɗe janane. E bi’ol awokaajo makko on, Lamiya Kamiri, oo mo o bambani henndaaki ɗerol wullitannde hay gootol. Ngol non hara ko iwurongol ka suudu ñaawirdu. O ɓeydi ɗon, ko ɗun waɗi si o anndaa ko sabu honɗun o fawanaa kaso.Wano e lewru sappoo e go’aɓuru ndee hitaande ɗoo gooto e tawaaɗo e ɓee ñaawooɓe holliino wonnde Monsef Marjukii yi’aa kala ko yo nannge. Ɗum non waɗii e ɓaawo jonnte ɗiɗi jooni gila oo lamnɗo leydi ndin Qaays Sa'iid lamndii ɗii cuuɗi ñaawirɗi uddutogol tefoore e dow oo hooreejo kiɗɗo Monsef Marzuki mo o tuumiri wonnde gaño leydi ndin. Hari kadi himo lamndii yo passpoor diplomatik makko ƴamte. Wano e ɗii seppoji waɗunooɗi e lewru sappaɓuru Paris, Monsef Marzuki no tawanoo e ɓen seppooɓe. O lamndino nden ñannde wota ardiiɓe Faransi tammnbo Qays Sa'iid, sabu himo tawaa e kompulooji e bonnugol sariyaaji leydi ndin.