Artugol Ebola nder Gine: No Dartagol nguu Ñawu Woni e Yahrude

Pesi ( marke) faddorɗe Ebola e nder  Gekedu, Gine,  23 lewru 2ɓuru 2021.
Pesi ( marke) faddorɗe Ebola e nder Gekedu, Gine, 23 lewru 2ɓuru 2021. © RFI / Carol Valade

Mooɓondiral waɗaama ñannde 15 Colite / Ɗiɗaɓuru to Jaagorde Cellal Gine ngam ɗaɓɓugol pehe no nguu ñawu Ebola dartortee. Laamu Gine ngun tabintinno iiritagol ñawu Ebola ngun to diiwal Serekore, tawi yimɓe njeeɗiɗo raaɓaaɓe ɗaɓɓitaama, nayo e maɓɓe maayii tippude e konngol Ngoomu Ngenndiiwu fii Hoolaare Cellal (ANSS) ngun Gine.

Jeeyngal

Duuɓi jowi caggal ñawu aranndeewu warnoongu nguu ko ɓuri yimɓe 11 000 hakkunde hitaande 2013 e 2016 nder Hirnaange Afrik, cenɗe seertuɗe wonɗe Gine e wonɗe njananiri immike e gollidugol ngam eɓɓugol no nguu ñawu dartortee hikka kadi.

Fedde Cellal Winndereyankore nden (WHO/ l'OMS) imminiino yimɓe mum, ɓe yahii to Gine Foresiyeeri.

Ñannde 17 Colite / Ɗiɗaɓuru Fedde Cellal Winndereyankore e konngol jooɗaniiɗo mum Ceerno Georges Ki-Zerbo hollituno wonde arano mo Ebola wari on anndaama, ko danko (enfermiyerjo) arnooɗo to ñawndorde Guweke (Gouécké) ñannde 18 Siilo / Go’aɓuru himo wondi e muusu-hoore, e tuure, e muusu-reedu, e nguli-ɓanndu. O maayi ñannde 28 Siilo / Go’aɓuru.

Ceerno Ki-Zerbo hollituno gila nden ñannde wonde Jeneef no e jokkondiral e jogiiɓe marke ɓen ɓen, o wi’i dokimanji emportugol heblaamaa, marke arane ɗen no waawi hewtude Konaakiri nder balɗe tati.

Ko ñannde 22 Colite / Ɗiɗaɓuru Gine henndii marke Ebola 11 000 ɗe (rVSV-ZEBOV), hiɗe iwri to ñiiɓirde Fedde Cellal Winndereyankore wonnde Jeneef. Ko ɓuri marke 8500 kadi no e laawol iwrayɗe Dowlaaji Amerik Ndennduɗi (USA) ko wallitoree e huɓindagol ñawu Ebola ngun nder Gine.

Ko sakkitii koo, Ceerno Ki-Zerbo hollii wonde gila e 23 Colite / Ɗiɗaɓuru, markagol fuɗɗaama nder Guweke, to ñawu ngun iiritii ton. Ko ñawndooɓe ɓen, e yimɓe meemondirɓe e ñawɓe ɓen, e yimɓe gollooɓe ɓen woni e markeeede taho.

Tawde keeri no woodi hakkunde Gine e leyɗe ɗuuɗɗe, ndee Fedde Cellal Winndereyankore no jokkondiri e leyɗe ɓalliiɗe ɗen wano Sarlon e Laberiya ngam wallondirde e dartagol ñawu ngun, ko ɓuri heñoreede e ngal wallondiral ko e baŋŋe ndaarndagol (ƴeewndagol) e aynitugol nokkuuje ñawndorɗe. Non kadi fedde nden hino jokkondiri e Koddiwaar, e Senegaal, e Mali, e Gine-Bisaawo e leyɗe goɗɗe hulanaaɗe jeyaaɗe e nder falnde Hirnannge Afrik nden.

Nder Serekore, gila to fuɗɗoode, ANSS wiino immanto darnugol tillisaaji ngam ɓeydugol yaajeendi jaɓɓorde nden. Mojobe ɗe wonaa laamuyankooje haku-leyɗeeje kañum kadi tawi no jokki e eɓɓindagol, e piide misal Médecins Sans Frontières hollituno wonde hino siñcude ngoomu heõraangu.

Dr Alhajji Umar Paate BAH mo MSF (Médecins Sans Frontières) hollitii RFI wonde fedde maɓɓe nden faalaaka nguu ñawu heɓira doole hikka wano doole ko ngu heɓunoo e duuɓi no yawti, o wi’i kadi wonde MSF imminiino yimɓe mum yahii Serekore gila ñannde laamu Gine ngun wowli fii iiritagol ñawu Ebola ngun. Woo yimɓe anndanɓe fii ñawu ngun iwrooɓe to njananiri no tawtude Gineyankooɓe fii wallindirgol no nguu ñawu dartoree hara ngu tiiɗiraali wano hakkunde 2013 haa 2016…

 

MSF no jogii ñawndorde to seraari Konaakiri. Ko fewndo ñawu aranndeewu ngun nde siñcaa, fewndo ɗoo (ndee wakkatiire) ndee nootorde no huutoree ngam dartagol ñawu Korona ngun.

Anja Wolz mo MSF no tawaa e ngoomu iwrunoongu ngun Gine faaboyii Sarlon e 2014, ko kanko kadi woni Juɓɓo (kordinateerjo) Ngoomu Heñoraangu ngun e ngal daratal Ebola kesal. O wi’i

 “Gollidugol e jamaaji ɗin hino himmi sanne. Hiɗen haani doolnoraade yeewtidugol e heɗitagol yimɓe wonɓe ɓen e ɗee nokkuuje ɗe ñawu ngun tampini. Hiɗen haani yuɓɓinde dartal ngal hara ko tippude e ko yimɓe ɓen woni e humpitude en kon, hiɗen hatonjini e maɓɓe kamɓe kadi yo ɓe hejju e nawaaje (riskiiji) Ebola ɗen.”

Semmbe laamuyankooje hoolniiɗe

Sabu woodeede cenɗe gollooje tummbitinooɗe e ñawu Ebola aranndeewuu ngun, semmbe laamuyankooje ɗen no gasa hooloreede fota hikka. Tippude e konngol Dr Seekubaa Keetaa, yiiloowo Ngoomu Ngenndiiwu fii Hoolaare Cellal ngun (ANSS) Gine, no woodi sabuuji ɗuuɗɗi hollayɗi wondema tama’u no woodi. No woodi jarriboore ñawu aranu ngun kañum e jarriboore artugol maggu hikka to Ndenndaandi Demokrasiyankeeri Konngoo (DRC), e immintingol goomuuji e nootorɗe ñawndorɗe e woodeede marke ɗiɗi wallitorteeɗe.

Kono no woodi ko ɓurnoo aaninde en ɓayri ñawu ngun iiritike hikka, ɗum ko tawde ñawɗo Ebola arano on waawaaka anndeede e mbaadi teeŋtinaandi hoolniindi. No gasa ñawɗo arano on, oo danko mo Guweke, ko goɗɗo raaɓi mo ado o raaɓude yimɓe njeegoo jeyaaɓe e ɓeynguure makko nden ñannde surrugol (ubbugol) mo ngol 28 Siilo / Go’aɓuru. Nayo e maɓɓe maayiino gila nden ñannde, ɗiɗo e maɓɓe waɗaa e weddorde nder Serekore.

Fahin, haa jooni en anndaali ko laaɓi pos alhaaliiji no njeegaɓo on naɓiranoo Konaakiri. Ko ɗum waɗi no woodi jokkondiraaɓe e meemondiraaɓe ɗuuɗuɓe haanuɓe anndeede, gila e maayirɗe lewru Siilo / Go’aɓuru, ko ɗum woni wootere e paandaaje hooreeje ɗen fii ngol dartagol.

Ko Gine, e Laberiyaa e Sarlon ñawu Ebola ngun ɓurnoo tampinde, ngu wari  ko ɓuri yimɓe 11 000 hakkunde puɗɗorɗe 2014 e Korse / Jeegaɓuru 2016 nde Fedde Cellal Winndereyankore nden ewnii gasugol maggu nder Hirnaange Afrik.