Ko honto woni iwdi ɗii alaaji kaɓirɗi wonaaɗi e huutoreede e nder falnde Sahel?

Hito 05:32
Usmaan JALLO, wiɗtiyankoojo Amnesti Winndere, Cixtol iwdi kaɓirɗe wonaɗe e gollireede e nder falnde Sahel ndee.
Usmaan JALLO, wiɗtiyankoojo Amnesti Winndere, Cixtol iwdi kaɓirɗe wonaɗe e gollireede e nder falnde Sahel ndee. © RFI FULFULDE

Koɗo men hannde ko Usman Jallo wiɗtiyankoojo fedde "Amnesti Winndere". Nden fedde ko daraniinde hakkeeji neɗɗanke. Nde yaltinii ciimtol e ndee yontere yowitiingol e iwdi kaɓirɗe ɗe kuliyankooɓe woni e waɗirde hare e nder ngal diiwal Sahel. Usman Jallo na jaabo lamnde Ibrahiima Timmbi BAH. Ko Abdullay Jallo nantini konnguɗi ɗii.

Jeeyngal

RFI/FF: Usmaan Jallo a jaaraama !

Usmaan Jallo: A jaaraama no feewi.

RFI/FF: On yaltinii ciimtol, caggal wiɗto e dow kaɓirɗe ɗe kuliyankooɓe woni haɓirde diiwal Sahel. Ko honto ɗen kaɓirɗe woni e immorde?

UJ: No innirɗon nii, men taskike dokimanji  ɗi ngoomuuji kuliyankooɓe jogiiɓe kaɓirɗe wonuɓe Sahel yaltinii. Ɗum ko wano wa JNIM, Guruppu Diiwal lislaamu(Etaa islamik) e nder Sahara e guruppuji goɗɗi jogiiɗi kaɓirɗe wallayɗi  koneeli ɗen leyɗe. Wano Danna Ambasagu Mali e Yarlitiiɓe darniiɓe ngenndi noddirteeɓe vDP en wonuɓe Burkina Faso.

Men tawii e nder taskagol ɗen nate e mbodooji, kaɓirɗe wonɗe Sahel ɓurɗe ɗen ko leyɗe Erop baŋŋe fuɗnaange iwri, Tentinii Serbi, Republik Ceek e Eslowaki.    

E tuma goo men tawa hooreeɓe konunkooɓe konu ngenndi leyɗe goɗɗe wano Burkina Faso no wakkitii kaɓirɗe hulɓiniiɗe. E  nder ɗen nate hiɓe wonndi e Yarlitiiɓe darniiɓe ngenndi noddirteeɓe, Wallooɓe konu leydi ndin.      

RFI/FF : Ko honno ɗen kaɓirɗe woni e iwrude Erop ɗe ara Afrik, Sahel. O wiɗtike e on alhaali ?

UJ: Men wiɗtaaki on alhaali tigi-tigi. Kono hiɗen anndi ko ɓuri ɗuuɗude e ɗen kaɓirɗe ko soodaaɗe e laawol newnaagol. Ko kaɓirɗe ɗe guwerneman ɗen leyɗe soodi. Ɗum ko wano Mali, Niijeer e Burkina Faso.

Ko anngal jogagol walla aynugol ɗen kaɓirɗe no haaniri, e fiyanɗe ɗe jihaadiyankooɓe wonndude kuliyankooɓe waɗata e hoore koneeli ɗen leyɗe woni sabu yo ɗen kaɓirɗe yanu e juuɗe kuliyankooɓe. Ɓen kuliyankooɓe waɗira ɗen war-hooreeji mawɗi fewtuɗi siwil en.

Ka tigi tigi, e baŋŋe ɗen kaɓirɗe men yi’i sosiyete Serbe wi’teeɗo GESTAVA. Men anndii e ɗii duuɓi sakkitiiɗi guwerneman Burkina Faso soodii kaɓirɗe ɗuuɗuɗe e juuɗe oo sosiyete.

Ɓurɗe ɗen e ɗen kaɓirɗe soodaaɗe hulɓiniiɗe no e juuɗe kuliyankooɓe haɓayɓe koneeli ɗen leyɗe e guruppu yarlitiiɓe wonuɓe e wallitaade konu Burkina Faso haɓugol jihaadiyankooɓe.

RFI/FF: Hara ndee tefoore mon hollii ɗee kaɓirɗe kuliyankooɓe, ko e juuɗe koneeli leyɗe leyɗe sahel ɗe jaɓitaa?

UJ: Ko non tigi woniri, fii kala wiɗto amen ngon hollaali ɗum. Ko cikkal men ɓangini.

Si hiɗon maanditii e hitaande 2018 e fuɗɗoode hitaande 2020, fiyanɗe mawɗe waɗuno e daaka koneeli Mali, Niijeer e Bukina Faso to keeri ɗen leyɗe tati. Ɗen ko fiyannde Shinegodar e nder Niijeer e Sanam, tawti kadi fiyanɗe Indelimane e Anderambukane to Mali.

Ɗen fiyanɗe wonuno sabu eggugol ɓen konunkooɓe e ɗin keeri ɗen leyɗe tati.   

Kono, ado ruttagol ɗin koneeli, ɗee fiyanɗe kuliyankooɓe e ɗin daakaaji walluno ɓe jaɓitugol kaɓirɗe buuy kañun e kure e nafitorɗi goɗɗi.

Awa nde ɓe nanngi daaka kununkooɓe kala, ɓe jaɓitay kaɓirɗe hulɓiniiɗe ɗuuɗuɗe.

RFI/FF: En yi’ii jooni, kuliyankooɓe ɓen no warude siwilɓe ɗuuɗuɓe, ɓe yana kadi e konunkooɓe: ɗum ko wano Burkina Faso e Mali. Hara ɗum no holli ɓee jihaadiyankooɓe no ɓeydude cemmbe maɓɓe?

UJ: Miɗo sikki tun hiɓe ɓeydude cemmbe ka baŋŋe kaɓirɗe tuma kala. Faale maɓɓe on ko raɗagol laamu ngun few e ndee nokkuure noddiraande keeri leyɗe tati. Ɗum wallayɓe dillugol no ɓe faaliraa.

Hiɗon jogii goonga na feewi. Gila fuɗɗoode hitaande 2020, warngooji mawɗi siwilɓe ɓen no ɓeydii. Hino yewtee fii fiyanɗe Coma Bangu e Zarumadareye, 02 lewru go’oɓuru feƴƴundu, fitina mo yimɓe 103 heddii e mum. Wano kadi fiyannde Solhan Burkina Faso, warunde yimɓe 137. Hara kadi en yejjitaali fiyanɗe Ansongo e Wataguna. Ɗum fow no holli fitinaaji jokkuɗi siwilɓe ɗen leyɗe no ɓeydaade.

Hannde ko haanani ɗen leyɗe fow, woni ko leyɗe wonaaɗe e yaneede e mum, maaɗum gollidiiɗe majje, e leyɗe yeeyayɗe kaɓirɗe, ko waɗtangol yila e alhaali kaɓirɗe wonuɗe e addeede kañun e dillooje e nder Sahel. Ɓayti ɗen kaɓirɗe no wonndani e yimɓe Sahel e torraaji mawɗi. Ko siwilɓe wonaa e wareede ton. Wonuɓe e hare ɗen fow no warde ɓe.

Etoo kadi, kala ngoomu tawaangu e ɗe hare Sahel, wonungu e bonnude hakkeeji neɗɗanke, hara ngu dañaali kaɓirɗe.      

Lombu ooɗo aplikasion e nder noddirgal maa